Deutéronome 22 - Ma Zhiklè

¹ Aman ka rka zlè man ɓai tambak kramam ngaya a zlak na, ka ngwoda na deɓa ɓai, sèi ka da a deɓa a sam kramam ngaya!

² Aman gi kramam ngaya az a sam ngaya ɓai, a ka sun nengaʼa ɓai, ka gshè skwi a gi ngaya, da nza a sam ngaya, ha kramam ngaya a jhèɗèʼa. Te deɓaʼa ka va na.

³ Gu arsa a sam kdèh na, gu arsa a sam maslaka na, gu arsa a sam kolongwi tèlèba man a ze na, a ka ngotso. Ka da ngheda ɓai!

⁴ Aman ka rka kdèh kramam ngaya, man ɓai zlè, nkala tʼhai a civèɗ, ka jèkeda ɓai, ka slambaɗda.

⁵ Ngwoz da feda maslaka nguraʼa a va ɓai, a nguraʼa da feda maslaka ngwoz a va ɓai, aman ko wawa man a gia arsa, skwi horai a sam Ndo nzi pèc pècèk, Zhiklè ngaya.

⁶ Aman ka ngècè gi ɗiak a civèɗ ngaya, te wof, man ɓai tʼherkeda, a wud ɗiakihi man ɓai slasli te pa, a mam na a nʼnza a pa, ka da hul mamaʼa a wuda ɓai –

⁷ hul wuda genè, a ka da nzi a mwuffè, a kaʼnzi a ma ma te nshèffè ngaya.

⁸ Aman ka da pi gi mɓuaʼa, gu maya, a ndo da kalkaɗahi a géɗ gi ngaya ɓai, man ɓai mʼmetsi a gi a gi ngaya.

⁹ Te gi dau, te gi lak, ka zleku tser skwi tsaɗ tsaɗ ɓai, man ɓai ka da ngècè skwa te pa azɓai.

¹⁰ Aman ka pizhè, ka humda nda zlè a kdèh ɓai!

¹¹ Maslaka man ta tsu a skwi tsaɗ tsaɗ – ara gwots tambak a bata – ka feda a va ɓai!

¹² A ka ga na dzadzaɓi a ma zlogomhi fad a sam maslaka ngaya!

Bidalihai

¹³ Aman ndo ngidè a nco ngwoz, a mʼmana a vna, te deɓaʼa ngwoz sa a nʼndara na,

¹⁴ a dè a fa na mali a gèɗ, a gedassa labar ma nengaʼa, a gaɗa: I co ngwoz haha, i mana a vna, aman i ngotso nsossura —

¹⁵ te deɓaʼa bab a mam bidalai ta cè maslaka man ta mana a pa nshèlè-kuraʼa, a ta ngreda ta ndohi nhalaʼa te kokwar, a ntamagi kokwar.

¹⁶ A bab dam a da gaɗa ta ndohi nhalaʼa: I va na dem ga a ndo haha a ngwoz, a ndara na.

¹⁷ Na haha a fa na mali a gèɗ, a gaɗa a ngau mphömè, i ngots dem sa, nsossura. Na haha maslaka man ta mana a pa nshèlèkuraʼa. A ta da wuzhè maslaka a sam di ndohi nhalaʼa te kokwar.

¹⁸ A ndohi nhalaʼa te kokwar haha ta da cè ndo a ta ngatsa na maya,

¹⁹ ta da ga na kita, a nengaʼa a pilèʼa, a gi Suli gurso 100 man ta va na bab dam, a géɗ man a ngedassa labar ma bidalai te Israel. A giaʼa a ngwoz na, a slaha a nkwola ɓai, a pats nshèffè nengaʼa tèlèba.

²⁰ Aman a ngau mphömè a vava, aman ta ngècè maslaka man ta mana a pa nshèlèkuraʼa a sam dema azɓai,

²¹ ta da dam a ma gi bab na, a ndohi kokwar ta da kèlè a kwa, a metsi na, a géɗ man a ngau skwi horai te Israel, a ngau mphömè te gi bab na. Aranta ka da cè mali auda te ndev kinè.

²² Aman ta ngècè ndo, mʼmana a ngwoz ndo ngidè, sèi ta bazl ta cèw cèw ba, ndo mʼmana a ngwoz, a ngwoza ba. Aranta ka da cè mali Israel auda.

²³ Aman bidalai, medemi ndo ngidè, a ta zli gèɗ a ndo ngidè te kokwar, a mʼmènè a vna,

²⁴ kin de ta auda a ntamagi kokwar haha cèw ba, kin da kal ta a kwa, a ta bazl ta; bidalai a géɗ man a ntsu lalau te kokwar ɓai, ndo a géɗ man a mana a ngwoz nslamagi na. Aranta ka da cè mali auda te ndev ngaya.

²⁵ Aman masli sa ta zli gèɗ a bidalai, medemai, te dak, a ndo a ngshèʼa, a mènè a vna, sèi ta keɗa ndo man a mana a vna.

²⁶ Ka da lama na dem sa ɓai, mali mʼmetsi az a géɗ nengaʼa ɓai. A gi lèmèlèmè ara ndo man a keɗa nslamagi na.

²⁷ A géɗ man ta zlü gèɗ te dak, a demaʼa, medemai, ko man agassa a tsi lalau, ndo a slaha a ntakaha ɓai.

²⁸ Aman ndo ngidè ta zli gèɗ a bidalai, medemi ndo di ka ɓai, a ngshèʼa, a mènè a vna,

²⁹ da va na Suli gurso 50 a bab dam. A demaʼa a gi a ngwoz na, a géɗ man a nkala na va, a slaha a nkwola ɓai, a pats nshèffè nengaʼa tèlèba.

³⁰ Ndo da co ngwoz bab na ɓai, man ɓai a derde bab na a vna.