Deutéronome 21 - Ma Zhiklè

Man ta sun ndo nkeɗe ndo ɓai

¹ Aman te kokwar man Ndo nzi pèc pècèk, Zhiklè ngaya, a va ka a skwi ngaya, ta ngècè ndo nkeɗaʼa te dak, a ta sun ndo nkeɗa ɓai,

² ndohi ngaya nhalaʼa a ndohi kita ngaya sèi ta dè a ta livè sam te ndev ndo nkeɗaʼa matsa a kokwarhi man a tsagai.

³ Aman ta ngots kokwar ndul ndul a sam nckondo, ndohi nhalaʼa te kokwar sa ta cè dem zlè man ta ga mizlinè a vna ɓai, man ta kelawa na wof a daʼai di ɓai.

⁴ Ta daʼa a sam woyam man a shè azɓai, man ta peza skwi a pa ɓai, man tà zleka skwa a pa ɓai, a pa ta da berɗama na daʼai a dem zlè matsa, te woyam.

⁵ Te deɓaʼa ndohi mvi skwi a Zhiklè, ndohi Lévi, ta da herda na va. Aman Ndo nzi pèc pècèk, Zhiklè ngaya, a par ta, aman ta gi mizlinè nengaʼa, aman ta pshè ta ma ndohai a nzlembaɗ Ndo nzi pèc pècèk; a ta gèɗèʼa, a géɗ matakwan tèlèba, a géɗ mblè tèlèba.

⁶ Ndohi nhalaʼa te kokwar haha man ndul ndul a sam nckondo, ta da pènè ri ta a géɗ zlè man ta berɗama na daʼai te woyam.

⁷ A ta da gaɗa: Ri nga a nkeɗe ndo ɓai, di nga a rka man ta keɗa ɓai.

⁸ Ndo nzi pèc pècèk, pra ta ndohi man ka sumka ta a deɓa, ndohi Israel, ndohi ngaya! Ka da dzhoɗ nshèffè ndo man mali na azɓai a sam Israel, ndohi ngaya ɓai, ka fa ta mali a gèɗ a géɗ ndo nkeɗa a haha ɓai.

⁹ A ka cè kita nkeɗe ndo man a nʼnga mali ɓai auda te ndev ngaya, a ka gi skwi nzuraʼa a sam di Ndo nzi pèc pècèk.

A géɗ ngwozai

¹⁰ Aman ka da gi var a mayamhi ngaya, a Ndo nzi pèc pècèk, Zhiklè ngaya, a mpe ta a ri a ka, ka da ge ta a ɓèlè.

¹¹ Aman ka rka ngwoz mbelaʼa man ndav ngaya a woyaʼa, a ka woy a ka cè a ngwoz, ka ceda a gi ngaya.

¹² A nengaʼa da sha gèɗ, da ratsa gi ndzhan na, da suɗa na maslaka ɓèlè auda a va, da nza a gi ngaya.

¹³ Da kuɗau bab na a mam na ki staɗ, te deɓaʼa ka cè a ngwoz a ka mènè a vna.

¹⁴ Aman te deɓaʼa a ngezla ka a gèɗ ma, ka praʼa, a ndo na, aman ka preda ma a Suli ɓai, ka ga a bèlè ngaya ɓai, a géɗ man ka mana a vna.

Tsuvomaʼa

¹⁵ A ndo man ngwozi na cèw, a woy ngidè, aman a woy ngidè ɓai; tsuvom kra ngwoz man a woya bi sa, a ngècè skwi tsuvom genè.

¹⁶ A pats man bab na a kezli skwi nʼndi gi na a wudahi na, bab na a slaha a ncè skwi kra ngwoz man a woya ɓi sa, a mva na a kra ngwoz man a woya sa, azɓai, a gèɗ man tsuvomaʼa.

¹⁷ Aman da fu kra ngwoz man a woya ɓai a ndo nʼndi gi na, te skwi tèlèba man a ngotso; a va na man a nengaʼa sak cèw, te man babgi sak na, nengaʼa a ngècè skwi nʼndi gi tsuvomaʼa.

Kra man a gi mèdègèɗ

¹⁸ Aman ndo ngidè a ngots kra man a gi mèdègèɗ, a tsena gèɗ ɓai, a tsena ma bab na a ma mam na ɓai man ta ngézhèʼa,

¹⁹ bab na a mam na ta gshèʼa a ta daʼa a sam ndohi nhalaʼa te kokwar na, a ntamagi kokwar na,

²⁰ a ta da gaɗa ta ndohi nhalaʼa te kokwar na: Kra nga a gi mèdègèɗ, a tsena gèɗ ɓai, a tsena ma nga ɓai, fali ndo, ndo zom.

²¹ Te deɓaʼa ndohi kokwar na tèlèba sèi ta kèlèʼa a kwa, a metsi na. Aranta ka da zedko skwi ambaɓiaʼa auda te ndev ngaya, a ndohi israel tèlèba ta da cinèʼa, a ta gi zlau.

Ma kita ngiɗè

²² Ndo man ka fa na kita mʼmetsai a gèɗ, a géɗ man a nkeɗa ndo, ktsalda a wof! Nckondo nengaʼa da mana a pa ɓai!

²³ Aman ka da rda a vèvèɗ a pats nasa. Aman ndo man ta ktsalda a wof, skwi mphomdaʼa a sam Zhiklè. Ka da lizhè kokwar ɓai, man Ndo nzi pèc pècèk, Zhiklè ngaya, a mva ka a skwi nʼndi gai!