Deutéronome 20 - Ma Zhiklè

Ngi var

¹ Aman ka da gi var a nda ndohi mayamhi ngaya, a ka da rka plèshihi a kiki var a ndohi kumba a fena man a ngaya, ka da gu zlau ɓai! Aman Ndo nzi pèc pècèk, Zhiklè ngaya, man a cka ka auda te kokwar Egypte, a zhè a nda ka.

² Aman var a hinè, ndo mvi skwi a Zhiklè da shkè a maʼa, da gaɗa ta ndohai:

³ Israel, tsenaʼa! A patsna kin da gi var a mayamhi kinè. Kin gu zlau ɓai, kin gudzu ɓai, va-gsa ndav kinè, ndav kinè da mbeɗa a sam ta ɓai!

⁴ Aman Ndo nzi pèc pècèk, Zhiklè kinè, a dè a nda kinè, a nda gi var a mayamhi kinè, aman a da mbél kinè.

⁵ Te deɓaʼa bihi ndohi var sèi ta gaɗa ta ndohai: Ngau gi tok-tok man a nʼnza a pa di ɓi wa? Do do na, da mena a deɓa a gi na, man ɓai man a da metsi na te var, ndo ngidè a da nzi a pa.

⁶ Ngau gi lak man a nʼnda nyiaʼa di bi wa? Do do na, da mena a deɓa a gi na, man ɓai man a da metsi na te var, ndo ngidè a da ndiaʼa.

⁷ Nco ngwoz man a mʼmana a vna di bi wa? Do do na, da mena a deɓa a gi na, man ɓai man a da metsi na te var, ndo ngidè a da cèʼa.

⁸ Bihi ndohi var ta dè a ma ma, a ta gaɗa ta ndohai: Ngi zlau wa, a ngi slagama azɓi wa? Do do, da mena a deɓa a gi na, man ɓai kramamhi na ta da gi zlau lèmèlèmè ara nengaʼa.

⁹ Aman bihi ndohi var ta goɗ ma klèng ma a ndohai, ta da pi bihi nʼngél va a ma ndohai.

¹⁰ Aman ka herda va a kokwar man ka da kala na va, gaɗa na ma gumai.

¹¹ Aman a cè gumai, a winè ntamagi na, ndohi tèlèba te pa ta va ka budu, ta gi ɓèl ngaya.

¹² Aman ta tsi gumi a ka azɓai, a woya a ngi var a ka, ka da nza na ma.

¹³ Te deɓaʼa man Ndo nzi pèc pècèk, Zhi-klè ngaya, a mpe ta a ri ngaya ma, ka da bazl ta ngurhi tèlèba a tsakwal.

¹⁴ Aman ka da hil ngwozi tèlèba a sam ngaya, a wudahi, a skwi gai, skwi te kokwar tèlèba, a skwi man ka dumkoda tèlèba; a ka da ndi skwi man mayamhi man Ndo nzi pèc pècèk, Zhiklè ngaya, a mva ka, ta jèkeda.

¹⁵ Ka da gia lèmèlèmè arsa a sam kokwarhi tèlèba man ta dra a sam ngaya, man ta te verzi ndohi kokwar haha ɓai.

¹⁶ Aman te kokwar ndohi haha, man Ndo nzi pèc pècèk, Zhiklè ngaya, a va ka herkeda a skwi nʼndi gai, ka jèkeda skwi a nshèffè ɓai.

¹⁷ Ndohi haha, ndohi Heth, Amor, Canaan, Phérez, Hévi a Jébus, ka da gedas ta, ara man Ndo nzi pèc pècèk, Zhiklè ngaya, a njè ka a gèɗ,

¹⁸ a ta slebda kinè mʼmbèh skwi tèlèba man ta gi a sam zhiklèhi ta azɓai, a kin da gu mali a sam Ndo nzi pèc pècèk, Zhiklè kinè, ɓai.

¹⁹ Aman ka nza na ma a kokwar ngiɗè kumba te var, ha ka dumaʼa, ka da ngela wofhi ɓai, sèi ka ndi nyiaʼa; ka ngela ɓai! Wof te dak lèmèlèmè ara ndo man ka dumaʼa ɗè?

²⁰ Aman ka da gedassa a ka ngela wof sèi man ka suna, ta yi azɓai. A ka da gi zlazlar a ma kokwar man ka gi var a vna, ha ka dumda ma.