Deutéronome 2 - Ma Zhiklè

Tʼhèshèkèɗ

¹ A nga ngwoda gèɗ a deɓa, a ngo do hèshèkèɗ, a civèd ndè woyam mbiaʼa, ara man Ndo nzi pèc pècèk a goɗa, a nga beza a der za Seir, mʼmènè a zhè kumba.

² Te deɓaʼa Ndo nzi pèc pècèk a ngaɗayè:

³ Kin do a der za kumba. Va-gso civèɗ man a dè aman a gédèʼa!

⁴ Gaɗa ta ndohai; aman kin bizhè a ndev kokwar kramamhi kinè, wudahi Esau, man ta te Seir, ta da gi zlau kinè.

⁵ Kin zlor var a tengaʼa ɓai! Te kokwar tengaʼa i va kinè sam te pa azɓai, ko hüɗök kata.

⁶ Sèi kin shum skwi nʼndi te ri tengaʼa nshumè. Ko iyam, man kin da siaʼa, va-sum nshumè!

⁷ Te man Ndo nzi pèc pècèk, Zhiklè kinè, a mpshè kinè ma te skwi man kin gu tèlèba, a mɓerka kinè te ri man kin dè tʼhèshèkèɗ, mvi 40, Ndo nzi pèc pècèk, Zhiklè kinè, a zhè a nda kinè, kinè tèkwona skwa ɓai.

⁸ A nga beza a ndev kokwar kramamhi nga, ndohi Esau, man ta te kokwar Seir, a civèd ndè a vara, Elath a Etsjon-Guéber, a nga jèkeda civèɗ, a nga ngalda ma nga a civèɗ ndè hèshèkèɗ Moab.

⁹ A Ndo nzi pèc pè-cèk a ngaɗayè: Ka gu var a ndohi Moab ɓai, ka zlor var a tengaʼa ɓai! Te kokwar tengaʼa i va ka sam te pa azɓai, ko hüɗök kata. I va ta Ar a wudahi Lot a skwi ta.

¹⁰ Zlèzlèa, ndohi Emim ta nza a pa, ndohi mbiaʼa, a vata, ngur-gurhiaʼa, ara Anak.

¹¹ Ta nger ta a va gwoli Rephaim, a va ndohi Anak. Aman ndohi Moab ta baha ta Emim.

¹² Zlèzlèa ndohi Hor ta nza te kokwar Seir. Aman wudahi Esau ta bazl ta, a ta nza a sam nʼnzi ta, lèmèlèmè ara Israel a ngu te kokwar man Ndo nzi pèc pècèk a mva ta.

¹³ Anai, va-slambaɗa, va-tawaɗa woyam Zéred! A nga tawaɗa woyam Zéred.

¹⁴ Daga man ngo do te Kades-Barnea, ha ndè a sam woyam Zéred, a nga tawaɗa woyam Zéred, te mvi 38, ha verzi ndohi var ta bazl ta tèlèba auda te va nga, ara man Ndo nzi pèc pècèk a gaɗa nga a mʼmbèɗè.

¹⁵ Ndo nzi pèc pècèk a ri na a nzede ta te va ndohai.

¹⁶ Aman ndohi var tèlèba ta bazl ta ma te va ndohai,

¹⁷ Ndo nzi pèc pècèk a ngadayè:

¹⁸ A patsna ka da bizhè a ndev Ar, a kuma Moab,

¹⁹ a ka da ndikè ndul ndul a sam ndohi Ammon. Ka gu var a tengaʼa ɓai, ka zlor var a tengaʼa ɓai, te kokwar ndohi Ammon i va ka sam te pa azɓai. I va ta wudahi Lot a skwi ta.

²⁰ Nengaʼa ba ta ngra na va kokwar Rephaim. Zlèzlèa ndohi Rephaim ta nza a pa, a ndohi Ammon ta baha ta Zam-zummim,

²¹ ndohi kumba, a vata, ngur-gurhiaʼa, ara Anak, a Ndo nzi pèc pècèk a nzede ta a ma tengaʼa, a ta dum ta, a ta nza a sam nʼnzi ta.

²² A ngau lèmèlèmè ara a sam wudahi Esau, man ta nza te Seir, a nzede ta ndohi Hor a ma tengaʼa, a ta dum ta, a ta nza a sam nʼnzi ta, ha patsna.

²³ A ndohi Avvi ba, man ta nza te kokwar Gaza, ndohi te verzi Caphtor, ta zede ta, a ta nza a sam nʼnzi ta.

²⁴ Va-slambaɗa, vo-do, va-tawaɗa woyam Arnon! Na haha i va ka Sihon, bi te Hesbon, ndo Amor, a kokwar nengaʼa, a ri a ka! Hüno a ka dumaʼa, hün var a nengaʼa!

²⁵ I da pa ta zlau a gèɗ a ndohi a géɗ herkeda tèlèba, a ta gudzi a sam ngaya. Aman ta da tsena labar ma ngaya, ta da gi zlau a ta gudzi langa.

²⁶ Te hèshèkèɗ Kedémoth, i zlinde ta ndohi sak a sam Sihon, bi te Hesbon, a ma gumai, a i gaɗa na:

²⁷ I woy a i bizhè a ndev kokwar ngaya! I da gshè bual bual genè, i da bizhè zlawa azɓai, ko te civèɗ ri mandai, ko te civèɗ ri gula.

²⁸ Pra nga skwi nʼndai, a nga shumaʼa a Suli nga, a nga da ndiaʼa. Ko iyam nga da shuma a sulai. I woya aman i bizhè auda a pa genè.

²⁹ Ara wudahi Esau te kokwar Seir, a ndohi Moab te kokwar Ar. Vay civèɗ arsa, a i tawaɗa woyam Jourdain, a ngo do a civèɗ ndè kokwar man Ndo nzi pèc pècèk, Zhiklè nga, a va nga.

³⁰ Aman Sihon, bi te Hesbon, a woya a va nga civèɗ ɓai. Ndo nzi pèc pècèk, Zhiklè ngaya, a nsala na gèɗ na, a nsassaya ndav na, a woya a nva ka a ri a ka.

³¹ A Ndo nzi pèc pècèk a ngadayè: Wora! i hüno a i va ka Sihon, a kokwar nengaʼa, a ri a ka. Hüno a ka dumaʼa, gu var a kokwar nengaʼa!

³² A Sihon a mshkè a nga gu var a vna, nengaʼa a ndohi nengaʼa tèlèba, te Jahats.

³³ A Ndo nzi pèc pècèk, Zhiklè nga, a mva nga a ri a nga. Nga fenaʼa, a wudahi nengaʼa ba a ndohi nengaʼa tèlèba,

³⁴ a nga duma kokwar nengaʼa tèlèba, a nga gedassa kokwar staɗ staɗ tèlèba, a nga phomde ta, ngurhi, ngwozai, wudahi nkèshkèshèʼa, ko staɗ mʼmbel ɓai.

³⁵ Aman skwai, a kolongwi kokwar, nga hulkoɗai.

³⁶ A hinè te Aroer, a ma woyam Arnon, a kokwar man a ma woyam, ha ndè Galaad, kokwar ngiɗè azɓai man a fen nga. Ndo nzi pèc pècèk, Zhiklè nga, a mpa nga a ri tèlèba.

³⁷ Sèi kokwar ndohi Ammon, ka herda na va ɓai, sam tèlèba a ma woyam Jabbok, kokwar a der za tèlèba, ara man Ndo nzi pèc pècèk, Zhiklè nga, a goɗa.