Deutéronome 19 - Ma Zhiklè

Kokwar matarai ngiɗè

¹ Aman Ndo nzi pèc pècèk, Zhiklè ngaya, a da zede ta ndohi herkeda man Ndo nzi pèc pècèk, Zhiklè ngaya, a va ka kokwar ta, aman ka dzam ta ma, a ka da nzi te kokwar ta, te gi ta,

² ka da kuzlkoɗi kokwar makar auda te ndev kokwar man Ndo nzi pèc pècèk, Zhiklè ngaya, a va ka a skwi nʼndi gai.

³ Ka da bazla civèɗ, a ka da ngela kokwar man Ndo nzi pèc pècèk, Zhiklè ngaya, a da va ka a skwi nʼndi gai, te va makar. Da gu arsa, aman ndohi nkeɗe ndo tèlèba ta slaha a ta hi a kokwar sa.

⁴ Ma kita haha a zhè a gèɗ ndo nkeɗe ndo man a da hi a mbél nshèffè na, man a keɗa nslamagi na, a shèwa ka ɓai, a nʼnga na a rai, man ndo mayam na ka ɓai.

⁵ Ara ndo ngidè, a dè a ngél shegwa te dak a nda ndo ngidè, dzana te rai, a nceda ri a zhiklè, aman a ngél wof; züdo a sundolkaɗ na auda te mèrfèɗ, a tsi mandal ndo sa, a nkeɗaʼa.

⁶ Te deɓaʼa a da hi a kokwar haha staɗ te vaʼa, a mbelda nshèffè na, te ri zlau aman a da pil gèɗ, man ndo sa a gi ndav, a hi a verzi ndo nkeɗe ndo, a ngècèʼa man a nhu na a civèɗ dra, a nkeɗa ndo man agassa ar ta kéɗè azɓai, a géɗ man nengaʼa ndo mayam nslamagi na ka ɓai.

⁷ Gar haha i njè ka ma haha a gèɗ: Ka da ngela kokwar makar.

⁸ Aman Ndo nzi pèc pècèk, Zhiklè ngaya, a da herda ka kuma ngaya a deɓa deɓa, ara man a mbaɗa ta babhi ngaya, a mva ka kokwar tèlèba man a mpasla ta ri a babhi ngaya,

⁹ a ka dzodzor ma nkwèr haha tèlèba man i njè ka a patsna, a ka woy Ndo nzi pèc pècèk, Zhiklè ngaya, a ka dè a civèɗ nengaʼa pèc pècèk,

¹⁰ ka da pi kokwar makar a va makar ngiɗè. Da keɗa ndo man mali na azɓi ɓai! Te kokwar man Ndo nzi pèc pècèk, Zhiklè ngaya, a va ka a skwi nʼndi gai; man ɓai kita ndo nkeɗe ndo a zhè a géɗ ngaya.

¹¹ Aman ndo ngidè a hi a kokwar haha, te deɓ man a nkeɗa nslamagi na a shèwa, aman a ntsau a woya a nkeɗaʼa,

¹² sèi ndohi nhalaʼa te kokwar na ta zlinde ndo a ta gshèʼa a ta va na a ri ndo man a jhèdè mpil gèɗ; da mets na.

¹³ Da se ka te va ɓai; te kokwar ngaya ndo man a keɗa ndo man nʼnga na a ri ka ɓai, sèi ta ga na kita a gèɗ ndo nkeɗe ndo.

¹⁴ Ka herda na kuma nslamagi ngaya a pa ɓai, man bababhi ngaya ta vau, a sam skwi nʼndi gi man ka ngots te kokwar man Ndo nzi pèc pècèk, Zhiklè ngaya, a va ka.

Ndo malwuɗai

¹⁵ Ndo malwuɗi staɗ a sam ndo ngidè a slra ɓai, ko a géɗ nkédè ndo, ko a géɗ mali mèmè. Skwi man a gau a vava, sèi man ndohi malwuɗihi cèw, man makar.

¹⁶ Aman ndo malwuɗi ncèkèlma a slèmbèdè, a pin ndo ngidè a géɗ malai,

¹⁷ ndohi ncèwa sa ta zlècè a sam Ndo nzi pèc pècèk, a sam ndohi mvi skwi a Zhiklè, a sam ndohi kita man ta da gi mizlinè a pats sa.

¹⁸ Ndohi kita ta jénjèrèʼa a maya maya. Ndo malwuɗi haha, ndo malwuɗi ncekèlma dè? Ntsokol ma a géɗ kramam na dè?

¹⁹ Te deɓaʼa ka ga na ara man a woya a nga na kramam na. Aranta ka da cè mali auda te ndev ngaya.

²⁰ A ndohi ngidè ta da tsenaʼa, a ta da gi zlau, a ta gi mali mbiaʼa aranta te ndev kinè te deɓaʼa asaɓai.

²¹ Da se ka te va ɓai – zlèʼèn te di man a zlèʼèn – ri te di man a rai – sak te di man a sak.