Deutéronome 18 - Ma Zhiklè

Skwi ntul ndohi mvi skwi a Zhikìè

¹ Ndohi mvi skwi a Zhiklè, ndohi Lévi, ndohi teverzi Lévi tèlèba, ta ngècè skwi nʼndi gai ara Israel azɓai. Ta ngècè skwi nʼndai a sam nʼndèr skwi a Zhiklè man ta slébèrdè Ndo nzi pèc pè-cèk a vna, a sam skwi nʼndi gi Ndo nzi pèc pècèk.

² Ta ngècè skwi nʼndi gai te ndev kramamhi ta azɓai. Ndo nzi pèc pècèk, nengaʼa skwi nʼndi gi ta, ara man a gaɗa ta.

³ Na haha skwi man ndohi mvi skwi a Zhiklè ta ngècè a sam ndohai, a sam tengaʼa man ta zli skwi a Zhiklè: marai, man ɓai tambak, ta va na kelbadza a mahazau a gi zai.

⁴ Ka va na géɗ dau ngaya, marori ngaya, a mbar ngaya, a gwots tambak ngaya nshèlèkuraʼa.

⁵ Aman Ndo nzi pèc pècèk, Zhiklè ngaya, a nʼngotskoɗi ndo Lévi auda te va verzi ndohi ngiɗè, da gu mizlinè a nzlembaɗ Ndo nzi pèc pècèk, nengaʼa a wudahi nengaʼa pèc pècèk.

⁶ Aman ndo Lévi a shkè a ntamagi ngaya, ko tema man a nʼnza a pa te Israel, a dè ko ahngwa ahngwa man ndav nengaʼa a woyaʼa, a sam man Ndo nzi pèc pècèk a ngotskoɗauda,

⁷ a ngi mizlinè a nzlembaɗ Ndo nzi pèc pècèk, Zhiklè ngaya, lèmèlèmè ara kramamhi na tèlèba; ndohi Lévi ta zhè a pa a sam Ndo nzi pèc pècèk;

⁸ a da ngècè skwi lèmèlèmè ara tengaʼa, ta ɗèlè te skwi bab na azɓai.

Skwi mbèh skwai

⁹ Aman ka da dè a kokwar man Ndo nzi pèc pècèk, Zhiklè ngaya, a va ka, ka da slebau mʼmbèh skwi man hori te pa man a ndohi herkeda te pa ɓai!

¹⁰ Ndo man a bezda kra na a dem na a vogwa;

¹¹ ndo mpi kwa; ndo kilèa; ndo nɗèl bantai; ndo mʼmbèh skwai; ndo vrai; midè; da ngots a sam ngaya ɓai!

¹² Aman ndo man a gi skwi arsa, a ndara na Nco nzi pèc pècèk. A géɗ nengaʼa Ndo nzi pèc pècèk, Zhiklè ngaya, a da dzam ta auda a ma ngaya.

Ndo nhadka ma, ara Moise

¹³ Ka lèbèslè a sam Ndo nzi pèc pècèk, Zhiklè ngaya, te skwi tèlèba!

¹⁴ Ndohi herkeda man ka da dzam ta, ta fi gèɗ a ndohi kilèa a ndohi mpi kwa; aman ka, Ndo nzi pèc pècèk, Zhiklè ngaya, a va ka civèɗ a pa ɓai.

¹⁵ Ndo nzi pèc pècèk, Zhiklè ngaya, a da ckoɗa te ndev ngaya, te va kramamhi ngaya, ndo nhadka ma auda, lèmèlèmè ara iyè: Kin da cinè nengaʼa!

¹⁶ A da gi ara man ka dzhoɗo a sam Ndo nzi pèc pècèk, Zhiklè ngaya, a der za Horeb, a pats mɓicè-va man ka gaɗa: I woy a i tsena daʼai Ndo nzi pèc pècèk, Zhiklè ga, asaɓai; i woy a i rka vogwa mbiaʼa asaɓai; man ɓai i metsi ga.

¹⁷ Ndo nzi pèc pècèk a ngadayè: Ma man ta goɗa, amba.

¹⁸ I da ngècè te ndev kramamhi tengaʼa ndo nhadka ma auda, ara ka, i da va na ma ga a ma nengaʼa, a nengaʼa a da gaɗa ta ma tèlèba man iyè i njè na.

¹⁹ A ndo man a tsena ma ga man a menda ta a nzlembaɗ ga ka ɓai, i jhèdè te riaʼa.

²⁰ Aman ndo nhadka ma man a fi va, a gèɗè ma a nzlembaɗ ga man iyè i gaɗa na ɓai, man ɓai a gèdè a nzlembaɗ zhiklèhi ngidè, ndo nhadka ma sa sèi a metsi na.

²¹ Wa ngidè ba ka hur te ndav ngaya: Nga da sunko ma man Ndo nzi pèc pècèk a ngaɗa bi tema?

²² Aman skwi man ndo nhadka ma a ngoɗo, a gi azɓai, nasa ma man Ndo nzi pèc pècèk a ngaɗa ɓai; ndo nhadka ma sa a fi va, ka gu zlau nengaʼa ɓai!