Deutéronome 17 - Ma Zhiklè

¹ Zlè a tambak man skwa a dza ta, man va ambaɓai, ka da zla na Ndo nzi pèc pècèk, Zhiklè ngaya, ɓai! Skwi haha a ndara na Ndo nzi pèc pècèk, Zhiklè ngaya.

² Aman a sam ngaya, man ɓai te kokwar man Ndo nzi pèc pècèk, Zhiklè ngaya a va ka tèlèba, nguraʼa ngidè a zhè, ngwoz ngidè a zhè, man ta gi skwi man ambaɓai a sam Ndo nzi pèc pècèk, Zhiklè ngaya,

³ a ta tawaɗaha nderzlè-ma, a ta jèjèr zhiklèhi ngidè tsaɗ, ta gi mizlinè ta, ta gurɓahi a sam ta, ta tsi ri a pats, a kia, a bantihai te giɗfèk – i nja nengaʼa ɓai;

⁴ aman ka da suna, aman ka da tsenaʼa, ka da njénjèrèʼa. Aman a vava, a ngu arsa, skwi hori sa a ngu te Israel, ka baha na nguraʼa man ɓai ngwoz

⁵ a dal kokwar man a gau skwi ambaɓiaʼa sa a pa, a ka kèlè a kwa, a ka ga na kita mʼmetsai, a nguraʼa ba, a ngwoza ba.

⁶ Nengaʼa man a ngu mali mʼmetsai, sèi ta keɗaʼa, man ndohi malwuɗihi ta zhè cèw, makar. A géɗ ndo malwuɗi staɗ, ta ga na kita mʼmetsi a gèɗ azɓai.

⁷ Ndohi malwuɗihi ta hinè nfi ri a pa, ga ndohi ngidè. Aranta ka cè skwi ambaɓiaʼa auda te ndev ngaya.

⁸ Aman skwi ngidè a zhè, wuɗitpa aman ka gi kita a géɗèʼa – gar nkédè ndo, gar mbèzl va, gar ntsi ndo, kita man a sam ngaya-sèi ka dè a sam man Ndo nzi pèc pècèk, Zhiklè ngaya, a ngotskoɗauda.

⁹ Ka dè a sam ndohi mvi skwi a Zhiklè, a sam ndohi Lévi, a sam ndo kita man a zhè a pats sa, a ka jhèɗèʼa. Ta da ngra ka kita man ka da giaʼa.

¹⁰ Ka da gi ara man ta gaɗa ka, a sam man Ndo nzi pèc pècèk a ngotskoɗauda, a ka gi maya aman ka gi skwi tèlèba ara man ta ngra ka.

¹¹ Ara ma kita man ta ngra ka, ara kita man ta gaɗa ka, ka da giaʼa, ka beza zlawa ɓai, ko te civèɗ ri mandai, ko te civèɗ ri gula.

¹² A ndo man a fi va, a cinè ma ndo mvi skwi a Zhiklè man ta vau a ngi mizlinè Ndo nzi pèc pècèk, Zhiklè ngaya, azɓai, a cè ma ndo kita azɓai, sèi ta keɗaʼa. Aranta ka da cè skwi ambaɓiaʼa auda te ndev Israel,

¹³ a ndohi tèlèba man ta tsenaʼa, ta da gi zlau, a ta jèkeda nfi va.

A géɗ ɓai

¹⁴ Aman ka da dè a kokwar man Ndo nzi pèc pècèk, Zhiklè ngaya, a va ka, aman ka da ngotso a skwi ngaya, a ka da gu gi a pa, a ka gaɗa: I woy a i fi bi ga, ara ndohi herkeda man ta zhè a tsagi ga –

¹⁵ ka da fi nengaʼa man Ndo nzi pèc pècèk, Zhiklè ngaya, a ngotskoɗauda, a ɓai. Ka da woy ɓai te va kramamhi ngaya; ka feda ndo te verzi tsaɗ a bi ngaya ɓai! Sèi staɗ te va kramamhi ngaya!

¹⁶ A woy da ngots plèshi kumba ɓai, da shum plèsh te Egypte ɓai, da zlinde ta ndohi a deɓa a kokwar Egypte ɓai! Aman Ndo nzi pèc pècèk a ngaɗa kinè: Kin da shkè a deɓa a civèɗ haha ɓai!

¹⁷ A woy da hul ngwozi kumba ɓai, man ɓai ndav nengaʼa a nʼngwode na. A woy da ɓüc Suli, guro, a verzhègenè kumba ɓai!

¹⁸ Aman a da nzi a géɗ sam nʼnzi bi te kokwar-bi nengaʼa, da co ɗèlèwèr ma kita haha a sam ndohi mvi skwi a Zhiklè, a sam ndohi Lévi, da Windo a ɗèlèwèr na!

¹⁹ Ma kita haha da zhè a sam na, da jongo te pa a pats nshèffè na tèlèba, aman a slebi zlau Ndo nzi pèc pècèk, Zhiklè nengaʼa, a jèjèrèʼa, a gi skwi tèlèba ara man ma kita haha a ma nkwèr haha a gaɗa.

²⁰ A ndav nengaʼa da fu va a sam kramamhi na ɓai. Da tawaɗaha ma kita haha ɓai, ko te civèɗ ri mandai, ko te civèɗ ri gula, a nzi a nshèffè a ma mate kokwar-bi nengaʼa, nengaʼa a wudahi na, te ndev ndohi Israel.