Deutéronome 16 - Ma Zhiklè

Ngolala

¹ Hur ki Abib, a ka da gi ngolala Pâque a sam Ndo nzi pèc pècèk, Zhiklè ngaya! Aman a ki Abib Ndo nzi pèc pècèk, Zhiklè ngaya, a nhelka ka auda te kokwar Egypte, a vaɗ.

² Ka da zli Pâque a Ndo nzi pèc pècèk, Zhiklè ngaya: tambak nkèshèa a mbiaʼa, a sam man Ndo nzi pèc pècèk a ngotskoɗauda, a nzlembaɗ nengaʼa a nzi a pa.

³ Te va ngolala ka ndau movar man nsegaraʼa ɓai, sèi movar nsegarbiaʼa, mʼmèn tsaraɗ, movar nlèyè, a géɗ man kin shkè auda te kokwar Egypte tsam tsam. Gu arsa, a ka hér pats man ka shkè auda te kokwar Egypte pèc pècèk a pats nshèffè ngaya tèlèba.

⁴ Da ngots skwi nshégèr skwai a sam ngaya ɓai, te kokwar ngaya tèlèba, mʼmèn tsaraɗ. Te skwi man ka zlaha a dakwaɗ, pats nshèlèkuraʼa, kin fedahi a vaɗ a géɗ mangoslèm ɓai!

⁵ Ka slaha ka zli Pâque azɓai te gi man Ndo nzi pèc pècèk, Zhiklè ngaya, a va ka a ka nzi a pa;

⁶ sèi a sam man Ndo nzi pèc pècèk, Zhiklè ngaya, a ngotskoɗauda, a nzlembaɗ nengaʼa a nzi a pa, ka da zli Pâque, a dakwaɗ, man pats a kèlè, man kin shkè auda te Egypte te va nasa.

⁷ Ka ti tambak, a ka da ndiaʼa a sam man Ndo nzi pèc pècèk, Zhiklè ngaya, a ngotskoɗauda. A prèk, ka minè a deɓa a ka dè ngwai.

⁸ Mʼmèn 6 ka da ndau movar man nsegara ɓai. Mʼmèn 7, mɓicè-va nkezlaʼa a nslébèrdè Ndo nzi pèc pècèk, Zhiklè ngaya. Ka da gu mizlinè ɓai!

⁹ Ka nger luma tsaraɗ. Daga man ka hinè ntsi dau, ka nger luma tsaraɗ.

¹⁰ Te deɓaʼa ka da gi ngolala luma matsaraɗaʼa, a ka vi skwi a Zhiklè ara man ndav ngaya a woyaʼa, ara man Ndo nzi pèc pècèk, Zhiklè ngaya, a va ka.

¹¹ Ka dawuffèasam Ndo nzi pèc pècèk, Zhiklè ngaya, a sam man Ndo nzi pèc pècèk, Zhiklè ngaya, a ngotskoɗauda, a nzlembaɗ na a nzi a pa: kinè, kra ngaya, nguraʼa a demaʼa, ɓèl ngaya, ko nguraʼa ko ngwoz, ndo Lévi mana zhè a sam ngaya, ndo man verzi na tsaɗ, kra dikai, ngwoz mazai man ta zhè a sam ngaya tèlèba.

¹² Ka da hérèʼa, ara man te va nasa ka ɓèlè te Egypte, a ka da jèjèr ma kita haha, a ka gia ara man a gaɗa.

¹³ Ka da gi ngolala te godzovok, mʼmèn tsaraɗ, aman ka biceda skwi a hedak ngaya ma, a klok ngaya ma.

¹⁴ Ka da wuffè a géɗ ngolala haha, kinè a kra ngaya a dem ngaya, ɓèl ngaya, ko nguraʼa ko ngwoz, a ndo Lévi, a ndo mbrok man verzi tsaɗ, kra dikai, a ngwoz mazai man ta zhè a sam ngaya.

¹⁵ Ka da gi ngolala mʼmèn tsaraɗ, a nslébèrdè Ndo nzi pèc pècèk, Zhiklè ngaya, a sam man a ngotskoɗauda. Aman Ndo nzi pèc pècèk, Zhiklè ngaya, a da pshè ka ma te skwi man ka ɓüco tèlèba, te mtzlinè man ka gu a ri ngaya tèlèba, a ka da wuffè genè.

¹⁶ Sak makar tʼhwaɗ mvai, ngurhi tèlèba ta da zlècè a sam Ndo nzi pèc pècèk, Zhiklè ngaya, a sam man a ngotskoɗauda: a pats ngolala movar man skwi nshégèrè a te dia ɓai; a pats ngolala luma; a pats ngolala te godzovok. Man skwa a te ri ɓai, kin da zlatsa a sam Ndo nzi pèc pècèk ɓai!

¹⁷ Ko wawa a da vi skwi ara man a slaha, ara man Ndo nzi pèc pècèk, Zhiklè ngaya, a pshè na ma, a va na.

Ndohi kita

¹⁸ Ka da pi ndohi kita, a ndohi nwèr kokwar, te kokwar ngaya tèlèba man Ndo nzi pèc pècèk, Zhiklè ngaya, a va ka, ara verzi ndohai, ara verzi ndohai. A ta da gi kita ndohi, zuraʼa.

¹⁹ Ka da ngwoda kita ɓai, ka da por ndo mpèrè ɓai, ka co skwi man ta woy a ta ruɓ ka a vna ɓai; aman skwi mbalai a ndeda ndohi a mandazlai, a ngwèdè ma ndohi nzuraʼa.

²⁰ Ka da dzodzor ngi-zuraʼa, a ka da nzi a nshèffè, a ka kwèr kokwar man Ndo nzi pèc pècèk, Zhiklè ngaya, a va ka.

²¹ Ka da gu sam mʼmbèh skwi ngiɗè a wof, a tsagi sam mvi skwi a Zhiklè, ɓai, nengaʼa man ka ga na Ndo nzi pèc pècèk, Zhiklè ngaya.

²² Ka da Zlatseda skwi ara zhiklè ɓai, man a ndara na Ndo nzi pèc pècèk, Zhiklè ngaya.