Deutéronome 15 - Ma Zhiklè

Mvi nshèk va

¹ Te deɓ mvi tsaraɗ, mvi tsaraɗ, mvi nshèk va pèc pècèk.

² Na haha ara man ta jèjèrèʼa. Aman ta nju maʼa, a nslébèrdè Ndo nzi pèc pècèk, ko wawa man a mva na skwi a dua a nslamagi na, a jèkeda, a jhèɗè dua a deɓa a sam nslamagi na, a sam kramam na, asaɓai.

³ Ka jhèdè te ri ndo man verzi na tsaɗ; aman te ri kramam ngaya ka jhèdè asaɓai.

⁴ Ndo a da tèkwèn skwi a sam ngaya azɓai, te man Ndo nzi pèc pècèk a da pshè ka ma te kokwar man Ndo nzi pèc pècèk, Zhiklè ngaya, a da va ka a skwi nʼndi gi ngaya.

⁵ Aman sèi ka fi gèɗ a ma Ndo nzi pèc pècèk, Zhiklè ngaya, a ka gi skwi tèlèba ara man a gaɗa ka te ma nkwèr man i ngra ka mbelembela a patsna.

⁶ Ndo nzi pèc pècèk, Zhiklè ngaya, a da pshè ka ma, ara man a gaɗa ka. Ka da va ta skwi a ndohi herkeda kumba; aman ka, ka jhèdè skwi azɓai. Ka da kwèr ndohi herkeda kumba; aman tengaʼa ta da kwèr ka azɓai.

⁷ Aman kramam ngaya a tsagi ngaya, te kokwar man Ndo nzi pèc pècèk, Zhiklè ngaya, a va ka, a tawas na, ka da sassaya ndav ngaya ɓai, – pra ri ngaya a sam kramam ngaya ntawassaʼa.

⁸ Pra ri ngaya, a ka va na skwi man a tèkwènè sa a dua.

⁹ Ka da hur skwi ambaɓiaʼa te ndav ngaya ɓai, a ka gaɗa; Mvi matsaradaʼa ndul ndul, njèkè skwi dua a mshkè ma! Gu maya, kramam ngaya ntawassaʼa da se ka te va, ka kwolaʼa ɓai! Man ɓai nengaʼa a kuɗi a sam Ndo nzi pèc pècèk, Zhiklè ngaya, a géɗ ngaya, a nengaʼa a fa ka mali a gèɗ.

¹⁰ Va na, ndav ngaya da kuɗau a géɗ nengaʼa ɓai! A géɗ nengaʼa Ndo nzi pèc pècèk, Zhiklè ngaya, a da pshè ka ma te mizlinè ngaya tèlèba, te skwi man ka gia tèlèba.

¹¹ Ndohi ntawassaʼa ta da zhè te kokwar pèc pècèk. A géɗ nengaʼa i vi ma nkwèr a haha. Pra ri a sam kramam ngaya, ntawassaʼa, man a tèkwèn skwai te kokwar ngaya!

Ɓèlèlihai

¹² Aman staɗ te va kramamhi ngaya, ndohi Hébreu, ko nguraʼa ko ngwozaʼa, a mprèda va na a ma a sam ngaya, a da gi ɓèl ngaya mvi 6. Aman mvi matsaradaʼa, ka da praʼa.

¹³ Aman ka praʼa, ka da praʼa adi ɓai.

¹⁴ Ka da va na skwi te va tambaki ngaya, te va hedak ngaya, te va klok ngaya, te skwi man ka ngots a pombi Ndo nzi pèc pècèk, Zhiklè ngaya.

¹⁵ Ka hérèʼa, ara man ka ba ka ɓèlè te kokwar Egypte, te va nasa, a Ndo nzi pèc pècèk, Zhiklè ngaya, a msumka ka a deɓa. A géɗ nengaʼa i va ka ma nkwèr haha a patsna.

¹⁶ Aman bèl ngaya a gaɗa ka: I woy a i nzi a sam ngaya, a géɗ man a woy ka, a woy gi ngaya, a nzi amba a sam ngaya,

¹⁷ ka da cè sulom a ka tuma na zlembaɗ, a tsagi ntamagi ngaya; a nengaʼa a gi a ɓèl ngaya a mèdèp. Ka gia lèmèlèmè a sam ɓèlè, ngwoz.

¹⁸ A ga ka wuɗi azɓai aman ka jèkeda a ka praʼa, te man nengaʼa a ngau mizline mvi 6; skwi ntul nengaʼa a fena Suli ndohi mizlinè cèw. A Ndo nzi pèc pècèk, Zhiklè ngaya, a da pshè ka ma te skwi tèlèba man ka giaʼa.

Tsuvomaʼa

¹⁹ Ka da va na skwi nkaldeka ma hai tèlèba a Ndo nzi pèc pècèk, Zhiklè ngaya, nguraʼa tèlèba, ko te skwi mbiaʼa, ko te skwi nkèshèa. Ka pizhè a tsuvom zlè ngaya azɓai, ka zli gwots tsuvom tambak azɓai.

²⁰ A mvi a mvai ka da ndiaʼa, kinè a ndohi gi ngaya, a sam di Ndo nzi pèc pècèk, Zhiklè ngaya, a sam man a ngotskoɗauda.

²¹ Man va nengaʼa ambaɓai, a tèfè, di azɓai, man skwi ngiɗè a zhè, ka da zla na Ndo nzi pèc pècèk, Zhiklè ngaya, ɓai.

²² Ka da ndi a skwi ngaya. Ko ndo a ndav nlizhèʼa, ko ndo mpanaʼa, da da ndau, lèmèlèmè, ara man ta ndi mènèɗ a kevar.

²³ Aman pombaz, ka da ndau ɓai! Ka da badaussa lèmèlèmè ara iyam.