Deutéronome 14 - Ma Zhiklè

Mbèzlè dai

¹ Kinè wudahi Ndo nzi pèc pècèk, Zhiklè kinè! Kin bazla di ɓai, a géɗ ndo man a mets na! Kin sha gèɗ ɓai!

² Aman kinè ndohi nkezlaʼa a sam Ndo nzi pèc pècèk, Zhiklè kinè. Kinè man Ndo nzi pèc pècèk a ngatska kinè auda, aman kin ndi a ndohi na, te ndev ndohi herkeda tèlèba man a géɗ herkeda.

Zluèɗ nlizhèa a zluèɗ nlizhɓiaʼa

³ Kin ndau skwi man a ndara na Zhiklè ɓai!

⁴ Na haha zluèɗ man kin ndiaʼa: zlè, tambak, ɓok,

⁵ bhwal, mènèɗ, ɓok za, skwi lèmèlèmè ara ɓok dak tèlèba.

⁶ A skwi tèlèba man kotèkwèr nkezla cèw, mbazla tèlèba, a ta zhèm skwai, tengaʼa kin ndiaʼa.

⁷ Aman tengaʼa man ta zhèm skwai, a tengaʼa man kotèkwèr mbazla cèw, di man kin ndia azɓai: zlugumai, wandav, hpat; ta zhèmè skwi ma ba, aman kotèkwèr tengaʼa mbazla tèlè ɓai. Sèi ta gi a skwi nlizhèa a sam kinè.

⁸ Wodala: kotèkwèr nengaʼa mbazla ma ba, mbazla tèlèba, aman a zhèm skwi azɓai. Nengaʼa skwi nlizhèa a sam kinè. Kin ndau zluèɗ nengaʼa ɓai, kin lama na nckondo nengaʼa ɓai!

⁹ Te va skwi tèlèba man a zhè a nshèffè tʼhwaɗ iyam, kin ndi nta: skwi tèlèba man bèjbèji a lakalav a deɓa, kin ndiaʼa.

¹⁰ Aman skwi man bèjbèji a lakalav az a deɓa ɓai, kin ndi azɓai. Nengaʼa skwi nlizhèaasam kinè.

¹¹ Ɗiakihi man nzlizhɓai tèlèba kin ndiaʼa.

¹² Aman tengaʼa haha kin ndi azɓai: mangayak, vezai, mangayak zai,

¹³ mangalah, mangayak zopom,

¹⁴ ngwakihai,

¹⁵ zhérèu, wuzhèm, nkèlègègai, zligijè,

¹⁶ kalama, ntèzhèva, tugom,

¹⁷ nslepats nguzotok, nzlatsama,

¹⁸ massai, zulazula, parmagerzai, gèzhègèzh, a faya.

¹⁹ A skwi nkütè-kütèa tèlèba man kelpasl a va, skwi nlizhèa a sam kinè. Kin ndau ɓai!

²⁰ Skwi tèlèba man kelpasl a va, man nlizhɓai, kin ndiaʼa.

²¹ Skwi mʼmets mʼmetsai kin ndau ɓai! Va na ndo mbrok te kokwar ngaya, man ɓai pra na ndo man verzi na tsaɗ! Aman kinè ndohi nkezlaʼa a sam Ndo nzi pèc pècèk, Zhiklè ngaya. Kin tau kra ɓok te wa mam na ɓai!

²² A ka vau skwi staɗte va kula te skwi tèlèba man ka zlekau, man a gra te gi dau, a mvi a mvai.

²³ A ka ndau skwi staɗ te va kula te dau a barassa ngaya a sam Ndo nzi pèc pècèk, Zhiklè ngaya, a sam man a ngotskoɗauda, a nzlembaɗ na da nza a pa. Lèmèlèmè tsuvom zlè ngaya, a tambak ngaya; a ka slebi ngi zlau Ndo nzi pèc pècèk, Zhiklè ngaya, pèc pècèk.

²⁴ Aman civèɗ dra, ka slaha ka zhüɓa ɓai, a géɗ sam man Ndo nzi pèc pècèk, Zhiklè ngaya a ngotskoɗauda a nzlembaɗ nengaʼa da nza a pa, dra a sam ngaya, – aman Ndo nzi pèc pècèk, Zhiklè ngaya, a mpshè ka ma,

²⁵ ka humbaɗaʼa a sulai, a ka gshè Suli te ri ngaya, a ka daʼa a sam man Ndo nzi pèc pècèk, Zhiklè ngaya, a ngotskoɗauda.

²⁶ A ka humbaɗa sulai a skwi man ndav ngaya a woyaʼa: zlè, tambak, barassa, zom, skwi mèmè man ndav ngaya a woya tèlèba, a ka ndia te pa, a sam Ndo nzi pèc pècèk, Zhiklè ngaya, a ka wuffè, kinè a ndohi gi ngaya.

²⁷ A ndo Lévi man a zhè te kokwar ngaya, ka pra na ma a gèɗ ɓai, a géɗ man a ngots skwi nʼndi gi ɓai; skwi nʼndi gi nengaʼa az a sam ngaya ɓai.

²⁸ Te deɓ mvi makar ka hulko skwi staɗ te va kula te va skwi man ka ɓüco a vi sa auda tèlè, a ka fedahi a sam ngaya.

²⁹ A ndo Lévi man a ngatsa skwi ɓai, man skwi nʼndi gi nengaʼa az a sam ngaya ɓai, ndo mbrok, kra dikai, a ngwoz mazai man ta zhè a sam ngaya, da shkè, da ngeza hwaɗ a vna. A Ndo nzi pèc pècèk, Zhiklè ngaya, a pshè ka ma te mizlinè ri ngaya tèlèba.