Deutéronome 13 - Ma Zhiklè

¹ Aman te ndev ngaya ndo nhadka ma, man ɓai ndo man nshunè a keɗaʼa, a slèmbèdè, a njè ka nrkedai, man ɓai a ngra ka skwai,

² a gi ara man nengaʼa a goɗa, te deɓaʼa a gaɗa ka: ngo-dzodzorokoy zhiklèhi ngiɗè tsaɗ, ngo-tsokoy rai a skwi mbèh skwi tengaʼa! –

³ ka fu zlembaɗ a ma ndo nhadka ma sa a ndo man nshunè a keɗaʼa sa ɓai! Aman Ndo nzi pèc pècèk, Zhiklè ngaya, a jkede ka, a woy a suna, ka gshè va a Ndo nzi pèc pècèk, Zhiklè ngaya, a ndav ngaya tèlèba, a nshèffè ngaya tèlèba ɗè, ɗè azɓi dè.

⁴ Sèi ka jèjèr Ndo nzi pèc pècèk, Zhiklè ngaya, a ka gi zlau nengaʼa, a ka gi ara ma nkwèr nengaʼa a gaɗa, a ka tsena daʼa nengaʼa, a ka gso va a vna!

⁵ Aman ndo nhadka ma matsa, a ndo man nshunè a keɗa matsa, sèi ta keɗaʼa, a géɗ man a njè ta ma a ndohai, a gaɗa ta, aman ta jèkeda civèɗ Ndo nzi pèc pècèk, Zhiklè ngaya, man a helka ka auda te kokwar Egypte, man a preka ka auda te gi ɓèlè; a ta bi-zhè ta zlawa a civèɗ man Ndo nzi pèc pècèk, Zhiklè ngaya, a nʼngra ka. Sèi ka zede skwi ambaɓiaʼa, auda te ndev ngaya!

⁶ Aman kramam ngaya a giɗagèɗ, man ɓai kra ngaya, a dem ngaya, ngwoz ndav ngaya, mandai ngaya man ka woyaʼa ara nshèffè ngaya, ta woy a ta pe ka a wai, a ta gaɗa ka: ngo-dokoya, ngo-dzodzorokoy zhiklèhi ngiɗè tsaɗ! – man ko ka, ko babhi ngaya kin sen ta ɓai,

⁷ zhiklèhi ndohi man ta zhè a tsagi ngaya, ko ndul ndul, ko dra, a hinè te verzi herkeda ngidè, ha ndè a verzi herkeda ngidè,

⁸ ka fa na gèɗ ɓai, ka fa na zlembaɗ ɓai, da se ka te va ɓai, ka jèkeda ɓai, ngreda mali na auda!

⁹ Sèi ka keɗaʼa! Faha ri nshèlèkuraʼa, ga ndohi ngidè!

¹⁰ Kolo a kwa a mʼmets na, a géɗ man a woy a nzlakede ka auda a civèɗ Ndo nzi pèc pècèk, Zhiklè ngaya, man a nhelka kinè auda te kokwar Egypte, te gi bèlè.

¹¹ A ndohi Israel tèlèba ta da cinèʼa, a ta gi zlau, a ta da gi skwi ambaɓiaʼa aranta te deɓaʼa asaɓai a sam ngaya.

¹² Aman ka tsena te kokwar man Ndo nzi pèc pècèk, Zhiklè ngaya, a mva ka, ndohi ngidè ta zhè man ta gaɗa:

¹³ Fali ndohai ta slambaɗa, ta zlakede ta ndohi kokwar a ta gaɗa ta ndohai: ngo-dokoya, ngo-dzodzorokoya, ngo-tsokoy rai a zhiklèhi ngidè tsaɗ, man ká sen ta ɓai,

¹⁴ sèi ka njénjèrèʼa, a ka jhèɗèʼa, a ka wèrèʼa. Aman a vava ta gu arsa, a ta gu skwi hori aranta a sam ngaya,

¹⁵ sèi ka bazl ta ndohi kokwar sa a tsakwal; ka phomda skwi tèlèba te pa, ko skwi kuɗom. Ka bazl ta a tsakwal.

¹⁶ Skwi ndümè ka hulko te kokwar sa, a ka peda a dal luma, a ka fa na vogwa a kokwar a skwi ndümè nengaʼa tèlèba. A mèdèp a Ndo nzi pèc pècèk, Zhiklè ngaya. A ndi a dikai, ta dèdèya a pa te deɓaʼa asaɓai.

¹⁷ Skwi mphomdaʼa da nza a ri ngaya ɓai! A Ndo nzi pèc pècèk a jèkeda ndzoan a géɗ ngaya, a ka sia te va, a gi a ka mènè a vata, ara man a mbaɗa ta babhi ngaya.

¹⁸ Aman sèi ka tsena daʼai Ndo nzi pèc pècèk, Zhiklè ngaya, a ka dzodzor ma nkwèr nengaʼa tèlèba, man i njè ka a gèɗ a patsna, a ka gi skwi zuraʼa a sam di Ndo nzi pèc pècèk, Zhiklè ngaya!