Deutéronome 11 - Ma Zhiklè

Zhiklè mbiaʼa

¹ Sèi kin woy Ndo nzi pèc pècèk, Zhiklè kinè, va-dzodzor ma bi nengaʼa, ma nkwèr nengaʼa, ma kita nengaʼa, a ma man a de kinè a vna, pèc pècèk.

² Sèi kin sun a patsna – i gaɗa ta wudahi kinè ka ɓai, man ta sun ɓai, man ta rka ɓai, aman i gaɗa kinè; aman Ndo nzi pèc pècèk, Zhiklè kinè, a ngatsa kinè maya, a kin sun mbi nengaʼa, ri nengaʼa man wuɗi na zhè, ri nengaʼa ngeda,

³ nrkedi nengaʼa, skwi man a ngau te ndev Egypte, a sam Pharaon, bi Egypte, te kokwar nengaʼa tèlèba;

⁴ skwi man a ngau a sam ndohi var Egypte, a sam plèshi nengaʼa, a kiki var nengaʼa, man a mbuɗko ta iyam mbiaʼa a gèɗ, man ta hu a verzi kinè, a nzede ta a mèdèp.

⁵ A skwi man a gu a géɗ kinè tʼhèshèkèɗ, ha kin shkè a sam haha;

⁶ a skwi man a gu a sam Dathan a Abiram, wudahi Eliab, te verzi Ruben, aman herkeda a winè ma na, a ngerɗ ta ma, a ndohi gi tengaʼa, a gi tengaʼa tèlèba, staɗ staɗ tèlèba man to do a verzi ta, te ndev ndohi Israel.

⁷ Skwi mbiaʼa tèlèba man Ndo nzi pèc pècèk a ngau, kin rka a di kinè.

Mpshè ma te kokwar man Zhiklè a pasla ta rai

⁸ Gar haha sèi kin jèjèr ma nkwèr tèlèba man i njè kinè a gèɗ a patsna, a kin ngècè wuɗai, a kin ndikè a kokwar, a kin dumaʼa, a kin da kwèrèʼa;

⁹ a kin da nzi a ma ma tʼherkeda man Ndo nzi pèc pècèk a mbaɗa ta babhi kinè, aman a da va ta, a ndohi te verzi tengaʼa, kokwar man wa a vongwom a hi te pa.

¹⁰ Kokwar man kin da dè a pa, aman kin kwèrèʼa, nara Egypte man kin shkè auda te pa ka ɓai, man kin zlekau skwi kinè a pa, a kin gu iyam a pa, pèc pècèk, nara gi lak.

¹¹ Kokwar man kin dè a pa aman kin da kwèrèʼa, kokwar man za a slrats te pa, man a ngècè iyam te zhiklè,

¹² kokwar man Ndo nzi pèc pècèk, Zhiklè kinè, a wèrèʼa, a pi di a pa pèc pècèk, a ngwar ba, a vi ba.

¹³ Aman kin da cinè ma nkwèr ga man i njè kinè a gèɗ a patsna, a kin woy Ndo nzi pèc pècèk, Zhiklè kinè, a kin gi mizlinè nengaʼa a ndav kinè tèlèba, a nshèffè kinè tèlèba,

¹⁴ i da vi iyam a kokwar kinè, aman tidè sam na; iyam nzlekai, a iyam via; a kin da ɓicè dau kinè a marori kinè a mbar kinè.

¹⁵ A i va na mandi a skwihi kinè te dak. Kin da ndi skwai, a kin ngézhè hwaɗ a vna.

¹⁶ Va-gu maya, ndav kinè da pe kinè a wi ɓai, a kin jèkeda Ndo nzi pèc pècèk a kin dzodzor zhiklèhi ngidè tsaɗ ɓai, a kin tsu ri a tengaʼa ɓai!

¹⁷ Man ɓai Ndo nzi pèc pècèk a da gi ndav a géɗ kinè, a ɓara giɗfèk, a iyam a shkè azɓai, a herkeda a fcè skwi azɓai, a kin zi kinè auda tsam tsam te kokwar mbelaʼa man Ndo nzi pèc pècèk a va kinè.

¹⁸ Gar haha vo-co ma ga haha a ndav kinè, a nshèffè kinè! Va-windo a deɓ ri kinè, ara lamba a medi kinè, aman kin hérè te pa!

¹⁹ Va-slebda ta wudahi kinè, va-goɗo, man kinè te gai, man kinè a civèɗ, man kin manatʼhai, man kin slèmbèɗè.

²⁰ Va-windo a ri ntamagi kinè, a ntamagi kokwar ngaya,

²¹ a kin nzi dai, a wudahi ngaya, te herkeda man Ndo nzi pèc pècèk a mbaɗa ta babhi kinè, a woya a nva ta, ha giɗfèk a herkeda a ndev na.

²² Aman kin jèjèr ma nkwèr haha, man i gaɗa kinè va-dzodzora, amba amba, a di na, a di na, a kin woy Ndo nzi pèc pècèk, Zhiklè kinè, a kin dè a civèɗ nengaʼa tèlèba, a kin gshè va a vna,

²³ Ndo nzi pèc pècèk a da dzam ta ndohi herkeda haha tèlèba auda a ma kinè, a kin da dum kokwar bihai man mba tengaʼa, a wuɗi tengaʼa a fena man a kinè.

²⁴ Sam tèlèba man kin mbatseda sak a pa, a ka kinè. A hinè tʼhèshèkèɗ, ha ndè Liban, a hinè te woyam Egypte, te woyam Euphrate, ha ndè a ma iyam mbiaʼa, nasa kuma kokwar kinè.

²⁵ Ndo da Sala kinè va a gèɗ ɓai! Ndo nzi pèc pècèk, Zhiklè kinè a da pra ta zlau a va a géɗ kinè, a kokwar tèlèba man kin dè dè a pa, a gudzi a géɗ kinè, ara man a mpasla kinè rai.

²⁶ Ani haha, a patsna i geda ka ma mpshè ma kinè, a ma mphomde kinè.

²⁷ Ma mpshè ma, aman kin tsena ma nkwèr Ndo nzi pèc pècèk, Zhiklè kinè, man i njè kinè a gèɗ a patsna.

²⁸ Ma mphomde kinè, aman kin tsena ma nkwèr Ndo nzi pèc pècèk, Zhiklè kinè, azɓai, a kin jèkeda civèɗ man i njè kinè a gèɗ a patsna, a kin jèjèr zhiklèhi ngidè tsaɗ man kin sen ta ɓai.

²⁹ Te deɓaʼa, aman Ndo nzi pèc pècèk, Zhiklè kinè, a nde kinè a kokwar ma, man kin da dè a pa, a kin kwèrèʼa, a kin da gadda mpshè ma a hai a géɗ za Garizim, a ma mphomdaʼa a géɗ za Ebal.

³⁰ Za haha ta zhè tʼwud woyam Jourdain, te civèɗ nkèl pats, te kokwar ndohi Canaan, man ta nza a vara, zuraʼa a ma Guilgal, a tsagi wof Moré.

³¹ Aman kin da tèwèɗè woyam Jourdain, a kin dè a kokwar, a kin kwèrèʼa, kokwar man Ndo nzi pèc pècèk, Zhiklè kinè, a woya a nva kinè. A kin da dumaʼa, a kin da nzi a pa;

³² te deɓaʼa sèi kin jèjèr ma kita tèlèba, a ma nkwèr tèlèba man i va kinè a patsna.