Deutéronome 10 - Ma Zhiklè

Nderzlè-ma

¹ Te ndev nasa Ndo nzi pèc pècèk a ngaɗayè: Posl kwa cèw lèmèlèmè ara nshèlèkurhiaʼa! Washkè a sam ga a géɗ za; gum koti wof ba!

² Ma man i Windo a deɓ kwa man ka paslaʼa, i woy a i windè a pa zaʼa, a ka peda a koti.

³ A i gu koti a wof acacia, a i posl kwa cèw lèmèlèmè ara nshèlèkurhiaʼa; te deɓaʼa i do a géɗ za a kwa cèw te rai.

⁴ A nengaʼa a mwindeda deɓ kwa ma lémélémé ara nshèlèkuraʼa; ma kula man Ndo nzi pèc pècèk a ngaɗa kinè a gèɗ za te va vogwa, a pats mbicè-va. A Ndo nzi pèc pècèk a mvayè.

⁵ A i menkaɗ ga a deɓa, a i shkèhi te za, i peda kwa a koti man i gau, a ta nza te pa, ara man Ndo nzi pèc pècèk a njèy a gèɗ.

⁶ A ndohi Israel ta jèkeda Beeroth-Bené-Jaakan a ta dè Moséra. A Aaron a mʼmets na a pa, a ta rda a vèvèd a pa. Eléazar, kra nengaʼa, a ngu mizlinè mvi skwi a Zhiklè te di man a nengaʼa.

⁷ Te pa to do a ma ma a Gudgoda; te Gudgoda a Jothbatha, sam a ma iyam.

⁸ Te ndev nasa Ndo nzi pèc pècèk a mparka ta ndohi Lévi auda, aman ta zuɓ koti nderzlèma Ndo nzi pèc pècèk, aman ta zlècè a sam di Ndo nzi pèc pècèk, ara ndohi mizlinè nengaʼa, a ta pshè ta ma ndohai a nzlembaɗ na, ha patsna.

⁹ A géɗ nengaʼa ndohi Lévi ta ngots skwi nʼndi gai ara kramamhi tengaʼa ɓai. Ndo nzi pèc pècèk, nengaʼa skwi nʼndi gi tengaʼa, ara man Ndo nzi pèc pècèk, Zhiklè ngaya, a gaɗa na.

¹⁰ Aman iyè, i zlatsa a géɗ za lèmèlèmè ara nshèlèkuraʼa, mʼmèn 40, a pats a vaɗ, a Ndo nzi pèc pècèk a ntsena ntsi ri ga haha zaʼa, a woya a ngedas ka ɓai.

¹¹ Te deɓaʼa a ngadayè: Slambaɗa, a ko do a ma ndohai, aman ta dè a ta duma kokwar man i mbaɗa ta a babhi tengaʼa, i woy a i va ta.

Sei nga fi gèɗ a Zhìklè

¹² Anai, Israel, Ndo nzi pèc pècèk, Zhi-klè ngaya, a jhèɗè a sam ngaya mè? Sèi ka gi zlau Ndo nzi pèc pècèk, Zhiklè ngaya, a ka dè a civèɗ nengaʼa tèlèba! Ka woyaʼa, a ka gi mizlinè Ndo nzi pèc pècèk, Zhiklè ngaya, a ndav ngaya tèlèba, a nshèffè ngaya tèlèba,

¹³ a ka dzodzor ma nkwèr Ndo nzi pèc pècèk, a ma ndè kinè man i va kinè a patsna, a ka da nzi amba.

¹⁴ Na haha, giɗfèk, a zhiklè nte géɗèʼa tèlèba, herkeda a skwi te pa tèlèba, a Ndo nzi pèc pècèk, Zhiklè ngaya.

¹⁵ Aman Ndo nzi pèc pècèk a ngwodko ndav a sam babhi kinè genè, a woy ta, a mparka ta ndohi te verzi tengaʼa auda – nasa kinè – te ndev ndohi herkeda tèlèba, ara man kin ngotso a patsna.

¹⁶ Gar haha va-tila ndav kinè, kin gu mèdègèd a ma ma ɓai!

¹⁷ Aman Ndo nzi pèc pècèk, Zhiklè kinè, Zhiklè a géɗ zhiklèhi tèlèba, Zhiklè mbiaʼa, man wuɗi na zhè, man wuɗitpa, man a pèr ndo mpèrè azɓai, a cè skwi man ta rubè a vna azɓai;

¹⁸ man a nza ta a deɓa a kra dikai a ngwoz mazai, a woy ndo mbrok, a va na skwi nʼndai a maslaka.

¹⁹ Sèi kin woy ndo mbrok, a géɗ man kinè ba zlèzlèa mbrokihai te kokwar Egypte.

²⁰ Sèi ka gi zlau Ndo nzi pèc pècèk, Zhiklè ngaya, a ka gi mizlinè nengaʼa, ka gshè va a vna, a ka mbèɗè a nzlembaɗ nengaʼa.

²¹ Nengaʼa man ka slébèrdèʼa, nengaʼa Zhiklè ngaya, nengaʼa man a ngau skwi mbiaʼa wuɗitpa, man ka rkaʼa a di ngaya, a géɗ ngaya. Babhi ngaya 70 man to do a kokwar Egypte. Antanta Ndo nzi pèc pècèk, Zhiklè ngaya, a nge ka kumba ara bantihai te giɗfèk.