Daniel 9 - Ma Zhiklè

Daniel a tsi rai a géɗ ndohi Juif te ɓèlè

¹ Aman bi Darius, kra Assuérus, te verzi Medes, man ta fu a bi a géɗ kokwar Chaldée, a ngu bi te mvi nengaʼa nshèlèkuraʼa, te nhin bi mvi nshèlèkuraʼa,

² iyè Daniel, i wor te ɗèlèwèr a géɗ nʼngér mvai man Ndo nzi pèc pècèk a goɗ te ma Jérémie, ndo nhadka ma, te deɓ man Jérusalem a mbeɗ na: mvi 70.

³ A i ngwoda na ma a Bi Zhiklè, aman i tsi ri a nengaʼa, a i gi mbuh mbuh, a i jèkeda skwi nʼndai, a maslaka sam kuɗa a va te mèrwèc;

⁴ a i tsu ri a Ndo nzi pèc pècèk, Zhiklè ga, a i nju ma, a i gada: Wa, Bi Zhiklè mbiaʼa, mwuɗitpa, man ka ɓer nderzlè-ma a sam ndohi man ta woy ka a ta jèjèr ma nkwèr ngaya, a ta se ka te va.

⁵ Nga gu malai, nga gau ambaɓai, nga woy ka ɓai, nga kwol ka, nga jèkeda ma nkwèr ngaya, a ma ngaya man a de nga.

⁶ Nga fa gèɗ a ma ndohi nhadka ma, ɓèlèlihi ngaya, ɓai, man ta gada ta bihi nga a tsuvomhi nga a bababhi nga a ndohi herkeda tèlèba a nzlembaɗ ngaya.

⁷ Ka Bi Zhiklè, ka gi zuraʼa; aman hori a di nga, a patsna, a ndohi Juda a Israel tèlèba, ko ndul ndul, ko dra, tʼherkeda tèlèba a sam man ka dzam ta a gèɗ mali man ta gu a sam ngaya.

⁸ Ndo nzi pèc pècèk, hori a di nga, a di bihi nga, a di tsuvomhi nga, a bababhi nga, a gèɗ man nga gu mali a sam ngaya.

⁹ Bi Zhiklè nga, ndo a sia te va, a prè malai; a nga, nga slambaɗa na va.

¹⁰ Nga tsena daʼai Ndo nzi pèc pècèk Zhiklè nga ɓai, a nga dzodzor ma kita man a ngra nga te ma ndohi nhadka ma, ɓèlèlihi nengaʼa, ɓai.

¹¹ Ndohi Israel tèlèba ta tawaɗaha ma kita ngaya, a ta bez ta zlawa, a ta fa gèɗ a ma ngaya ɓai. Ndo nzi pèc pècèk a mphomde nga, a mʼmbèɗè, man a mwindo te ɗèlèwèr ma kita Moise, ɓèl Zhiklè, a gèɗ man nga gu malai a sam na.

¹² Ndo nzi pèc pècèk a ngau ara man a goɗ a gèɗ nga, a gèɗ ndohi kita man ta bazla nga kita, a ngu arsa a vava, a nzlündo skwi mwuɗitpa mbiaʼa a gèɗ nga, skwi man a gu te Jérusalem tar sa ɓai a gèɗ herkeda.

¹³ Ara man ta Windo te ɗèlèwèr ma kita Moise, skwi mwuɗitpa mbiaʼa haha tèlèba a mshkè a gèɗ nga. Ko gar haha nga mbatsedaha ndzoan Ndo nzi pèc pècèk, Zhiklè nga, a hi ɓai, a nga ngwoda na deɓa a mali ɓai, a nga dzadzara ma nzura ngaya ɓai.

¹⁴ Gar haha Ndo nzi pèc pècèk a nhur skwi ngedassa nga, a gaka nga a gèɗ. A gèɗ man Ndo nzi pèc pècèk, Zhiklè nga, nzuraʼa te skwi man a gia tèlèba: aman nga, nga fa gèɗ a ma nenga ɓai.

¹⁵ Anai Bi Zhiklè nga, ka man ka helka ta ndohi ngaya auda te kokwar Egypte a wuɗi ri ngaya, man ka ga nzlembaɗ ngaya a mbiaʼa ha patsna, nga gu malai, nga ga skwi man ambaha ka ɓai.

¹⁶ Bi Zhiklè, ara man ndo a se ka te va pèc pècèk, jèkeda ndzoan ngaya, a ka gu ndav a gèɗ kokwar Jérusalem, za ngaya nkezlaʼa, asaɓai; a gèɗ mali nga, a gèɗ mphömè bababhi nga, Jérusalem a ndohi ngaya ta ga a skwi man ndohi a tsagi nga tèlèba ta ngwèshè a pa.

¹⁷ Anai, Zhiklè nga, tsena ntsi ri nga a kuɗa ɓèl ngaya, di ngaya da hela sam nkezlaʼa ngaya ngedassaʼa, a géɗ nzlembaɗ Bi Zhiklè.

¹⁸ Zhiklè ga, fu zlembaɗ a ka tsenaʼa, pu dai a ka rka skwi ngedas nga a kokwar man ta va na nzlembaɗ ngaya. Aman nga tsi ri a sam ngaya, nga gada: nga ndohi nzura ka ɓai; nga pi di a ka a géɗ man ndo a se ka te va.

¹⁹ Bi Zhiklè, tsenaʼa! Bi Zhiklè, pra malai! Bi Zhiklè, slambaɗa, a ka takaha nga! Ka zhor ɓai, a géɗ nzlembaɗ ngaya, Zhiklè nga, man ta va ta nzlembaɗ ngaya a kokwar ngaya, a ndohi ngaya.

Gabriel a gaɗa na Daniel

²⁰ Aman i gèɗè dai, a i tsi ri dai, a i nju ma mali ga a mali ndohi Israel, ndohi ga, dai, a i tsu ri mbuh mbuh a sam Ndo nzi pèc pècèk, Zhiklè ga, a géɗ za Zhiklè ga nkezlaʼa,

²¹ i tsi ri dai, a Gabriel, nguraʼa, man i rka te nshunè te va nasa, a nhaka tsam-tsam, a pats dakwaɗ, man ta va na skwi a Zhiklè.

²² A mshkè a ngadayè: Daniel, i shkè aman i ngra ka zuraʼa.

²³ Aman ka hüno ntsi rai, Zhiklè a ngoɗa, a i shkè aman i ngra ka, te man Zhiklè a woy ka kumba. Fu gèɗ a ma haha a ka sun nshunè ngaya.

²⁴ Nga va ta mvi 70 a ndohi ngaya a kokwar ngaya nkezlaʼa, ha mphömè a mali nʼnga tèlèba ma, ha mali ta mpela ma, a ngi-zuraʼa a zhè a mèdèp, ha ma nshunè a ma ndo nhadka ma a ndikè a pa, a ta bada na mbar a gèɗ a ndo nkezlaʼa a géɗ ndohi nkezli nkezlaʼa tèlèba.

²⁵ Sèi ka cinèʼa a ka suna! Daga mshkè maʼa a géɗ nrèm kokwar Jérusalem zaʼa, ha bi man ta bada na mbar a gèɗ a zhè, a gi luma 7. Ha ta ɗèɗèya a pa, a kokwar ba a dal kokwar a civèɗ ba, a gi luma 62, a pats mwuɗitpa.

²⁶ Te deɓ luma 62, ndo man ta bada na mbar a gèɗ ta zeda ambalai, ta ga kita a géɗèʼa ɓai. A kokwar, a sam nkezlaʼa, ndohi bi ngiɗè ta shkè, a ta gedassaʼa. Te deɓaʼa, ndikè-ma skwi a shkè a nda gedassa skwi tèlèba; a var a zhè pèc pècèk, ha nʼndikè-maʼa.

²⁷ A da derzlè ma zuraʼa a nda ndohi kumba, luma staɗ; tʼhwaɗ luma a gaɗa aman ta jèkeda mvi skwi a Zhiklè. Ndo ngedassa skwai a da gi skwi man a ndèr a ndo holholaʼa, ha skwi man a huro a da gédèshè skwi a vna, a kala na a gèɗ a nengaʼa.