Apocalypse 7 - Ma Zhiklè

Ndohi Israel 144.000 man ta ndè ta a pa

¹ Te deɓ nasa i rka golahi Zhiklè faɗ, ta zlatsa te tsagi herkeda faɗ, kozlarhi herkeda faɗ te rai, a kozlar a gi azɓai a géɗ herkeda, ko a géɗ iyam mbiaʼa, ko te wof.

² A i rka gol Zhiklè ngiɗè a mshkè a sam mvèng pats, nengaʼa a nʼngots skwi mpizlè ntkotsaʼa a Zhiklè man a zhè a nshèffe, a ngoɗ a ngèɗè mbiaʼa a sam golahi Zhiklè faɗ man ta ngots wuɗai, aman ta gedassa herkeda a iyam mbiaʼa,

³ a ngaɗa ta: Kin gedassa herkeda a iyam mbiaʼa a wofhi di ɓai, ha ta tsa ta lamba a medi ɓèlèlihi Zhiklè nga.

⁴ A i tsena man ta ngra ta, man ta tsa ta lamba a medai: tèlèba ndohi gozhèm 144, te verzi Israel tèlèba.

⁵ Te verzi Juda ndohi gozhèm 12, te verzi Ruben ndohi gozhèm 12, te verzi Gad ndohi gozhèm 12,

⁶ te verzi Aser ndohi gozhèm 12, te verzi Nephtali ndohi gozhèm 12, te verzi Manassé ndohi gozhèm 12,

⁷ te verzi Siméon ndohi go-zhèm 12, te verzi Lévi ndohi gozhèm 12, te verzi Issacar ndohi gozhèm 12,

⁸ te verzi Zabulon ndohi gozhèm 12, te verzi Joseph ndohi gozhèm 12, te verzi Benjamin ndohi gozhèm 12, man ta tsa ta lamba a medai.

Nhèyè ndo te verzi ndohi herkeda tèlèba

⁹ Te deɓaʼa i rka nhèyè ndo mbiaʼa, ndo a slaha a nʼngrè ɓai, te va ndohi herkeda, a ndohi kokwar, a gerzi ndohai, a daʼai ta tsaɗ tsaɗ tèlèba, ta zlatsa a ma sam nʼnzi bai, a ma kra tambak, a maslaka nslekaɗa a va, a vah gangar te rai,

¹⁰ a ta boho tèlèba, a ta gaɗa: Skwi mʼmbel nga a shkè te ri Zhiklè nga, man a nza a géɗ sam nʼnzi bai, a shkè te ri kra tambak.

¹¹ A golahi Zhiklè tèlèba ta zlatsa a sam nʼnzi bai, a ta tèuda ndohi nhalaʼa a skwihi faɗ a nshèffe a pa, a ta tuzlom ta a hai a sam nʼnzi bai, a ta slubordo Zhiklè,

¹² a ta gaɗa: Amen, nshid gèɗ, a nslébèrdè, a maya, a susai, a nʼnjèlè, a wuɗi-bai, wuɗai a Zhiklè nga te nhinkaɗ na a mèdèp. Amen.

¹³ A ndo nhalaʼa staɗ a ngaɗayè: Ndohi haha a maslaka nslekaɗaʼa a va, wa? Ta shkè tema?

¹⁴ A i gaɗa na: Bi ga, ka, ka suna. A nengaʼa a ngaɗayè: Tengaʼa man ta shkè auda te matakwan mbiaʼa, a ta pana maslaka tengaʼa, a ta slekaɗa maslaka tengaʼa te Pombaz kra tambak.

¹⁵ A géɗ nengaʼa ta zhè a ma sam nʼnzi bi Zhiklè, a ta takaha a pats a vaɗ te gi Zhiklè nengaʼa. A nengaʼa man a nzi a géɗ sam nʼnzi bai a da nza ta a dai.

¹⁶ Mi a da keɗ ta te deɓaʼa asaɓai, iyam a da dza ta te deɓaʼa asaɓai, pats a da te ta te deɓaʼa asaɓai, a vazaza a da ga ta asaɓai,

¹⁷ aman kra tambak te ndev sam nʼnzi bai a da war ta, a de ta a sam nlèlè a iyam nshèffe, a Zhiklè a da saha ta kuɗa auda a dai.