Amos 1 - Ma Zhiklè

¹ Ma Amos, ndo mɓer tambak te Tekoa. Skwi man a rka na di a géɗ Israel, te va man Ozias bi Juda, a Jéroboam, kra Joas, bi Israel, mvi cèw, ga herkeda a gudzai.

² A gaɗa: Ndo nzi pèc pècèk a bèhè a wuɗai te Sion. Te Jérusalem a gèɗè a wuɗai. Sam man ndohi nwèr skwai ta wèr skwi a pa, a lèyè; géɗ za Carmel a ngwor na.

Damas

³ Ndo nzi pèc pècèk a goɗ ar haha: A géɗ mali kokwar Damas man a gi makar, a gi faɗ, i méndè kita a deɓa azɓai, a géɗ man ta tsau ndohi Galaad a gada züdo.

⁴ I da fa na vogwa a gi bi Hazael, a da ndeda gibihi Ben-Hadad a ma.

⁵ A i da pasla skwi mɓèr ntamagi Damas, a i zede ta ndohi Bikath-Aven tèlèba, a nda ndo ngs gada-bi te Beth-Eden. A ndohi Syrie sèi ta dè dangai a Kir, Ndo nzi pèc pècèk a gada.

Gaza

⁶ Ndo nzi pèc pècèk a goɗ ar haha: A géɗ mali kokwar Gaza man a gi makar, a gi faɗ, i méndè kita a deɓa azɓai, a géɗ man ta par ta ndohi tèlèba a ta pe ta a ri a ndohi Edom.

⁷ I da fa na vogwa a zlazlar Gaza, a da ndeda gi-bihi nengaʼa a ma.

⁸ A i da zede ta ndohi Asdod tèlèba, a nda ndo ngs gada-bi te Askalon. Te deɓaʼa i lama na Ekron, a i gedassa njèkèɗi ndohi Philistie, Bi Zhiklè Ndo nzi pèc pècèk a gaɗa.

Tyr

⁹ Ndo nzi pèc pècèk a goɗ ar haha: A géɗ mali kokwar Tyr, man a gi makar, a gi faɗ, i méndè kita a deɓa azɓai, a géɗ man ta pre ta ndohi kumba a ma a ɓèlè a ri a Edom; ta hur ma man ta durzlo a kramamhi ta ɓai.

¹⁰ Gar haha i da zlindè vogwa a kokwar Tyr, a da ndeda gi bihi a ma.

Edom

¹¹ Ndo nzi pèc pècèk a goɗ ar haha: A géɗ mali kokwar Edom man a gi makar, a gi faɗ, i méndè kita a deɓa azɓai, a géɗ man a ndzama kramam na a tsakwal, a nsa te va ɓai, a ngu ndav pèc pècèk, a njèka shèwa ɓai, nte ndav na a mèdèp.

¹² I da fa na vogwa a Théman, a da ndeda gi-bihi te Botsra a ma.

Ammon

¹³ Ndo nzi pèc pècèk a goɗ ar haha: A géɗ mali ndohi Ammon man a gi makar, a gi faɗ, i méndè kita a deɓa azɓai, a géɗ man ta cizla hwaɗ ngwozi te Galaad, man ta a hwaɗ, a ta herdaha kuma kokwar a deɓa arsa.

¹⁴ I da fa na vogwa a zlazlar Rabba, a da ndeda gi-bihi nengaʼa a ma, a pats nguzli var, a pats lokotor a ndombozlor;

¹⁵ bi tengaʼa a dè a dangai a nda wud bihi nengaʼa, Ndo nzi pèc pècèk a gada.