Actes 7 - Ma Zhiklè

Etienne a njè ta ma a gèɗ nʼnzakaɗi Israel

¹ A bi ndohi mvi skwi a Zhiklè a ndzhoɗo: Narsa ɗè?

² A nengaʼa a ngaɗa: Dalahimam ga, babhi ga haha, va-tsenaʼa! Bi Zhiklè, Bab nʼnjèlè, a ngudoko na va a dai a Abraham, bab nga, te va man a zhè te kokwar Mèsopotamie dai, a nʼnza a Charran di ɓai,

³ a ngaɗa na: Jè-keda kokwar ngaya, a gwoli ngaya, a ko do a kokwar ngiɗè, man i da ngra ka.

⁴ A nengaʼa a njèkeda kokwar Chaldée, a nʼnza a Charran. Aman bab nengaʼa a mʼmets na ma, Zhiklè a nckoɗa a kokwar haha, man kin nza te pa antanta.

⁵ A mva na skwi nʼndi gi te pa ɓai, ko sam man a pi sak a pa. A nʼngra na, a woya a mva ta ndohi te verzi nengaʼa, ko a mya kra di ɓai.

⁶ Aman Bi Zhiklè a goɗ ar haha: Ndohi te verzi ngaya ta da gi a ndohi mbrokihai te kokwar ngiɗè, man kokwar tengaʼa ka ɓai, a ta da ga ta ɓèlè, a ta da ga ta matakwan mvi tèmèrè Gad.

⁷ Bi Zhiklè a ngaɗa: I woya man i gi kita ndohi man ta ga ta ɓèlè. Te deɓaʼa ta da dè auda a samaʼa, a ta tsi ri a iyè a haha.

⁸ A mva na nderzlè-ma te nʼngél ngwon. Abraham a myu Isaac, a nʼngela na ngwon te pats matsamakaɗaʼa. A Isaac a myu Jacob, a Jacob a myu babhi zlèzlèa kula a géɗèʼa cèw.

⁹ A babhi zlèzlèa ta gu srak a géɗ Joseph, a ta preda ma a kokwar Egypte.

¹⁰ Aman Zhiklè a zhè a sam nengaʼa, a mʼmbelaʼa te ri matakwan, a mva na pombai a maya a sam di Pharaon, bi Egypte. Nengaʼa a nʼngaʼa a ngomna te kokwar Egypte, a géɗ gi nengaʼa tèlèba.

¹¹ Aman mi mbiaʼa mwuɗitpa a ngu te kokwar Egypte a Canaan tèlèba, a babhi nga ta ngatsa skwi nʼndi ɓai.

¹² Aman Jacob a ntsenaʼa, dau a zhè te kokwar Egypte, a nzlinde ta babhi nga sak staɗ.

¹³ Ma-cecèwaʼa, Joseph a nʼngreda ta va nengaʼa a kramamhi na, a ta ngreda na verzi Joseph a Pharaon.

¹⁴ A Joseph a nzlündo ndo, a mbaha na Jacob, bab na, a gwoli nengaʼa tèlèba, a sam na, ndohi 75.

¹⁵ A Jacob a ndo a kokwar Egypte, a mʼmets na, a va babhi nga ba.

¹⁶ A ta daʼa a kokwar Sichem, a ta rda a gi dzavai a sam man Abraham a suma a Suli na ma, te ri ndohi Hémor te kokwar Sichem.

¹⁷ Aman ndul ndul pats nʼndev mpèsl ri man Zhiklè a ngaɗa na Abraham, ndohi ta zlèzlèmè a ma ma te kokwar Egypte.

¹⁸ A bi ngiɗè a nshkè, man a sun Joseph ɓai.

¹⁹ Nengaʼa a nʼngwode ta gwoli nga, a nʼnga ta matakwan a babhi nga, aman ta jèkeda wudahi nkèshèa a dala, a ta bazl ta.

²⁰ Te ndev nasa ta yu Moise, nengaʼa kra man amba a sam di Zhiklè, a ntsuɗo wa mam na te gi bab na ki makar.

²¹ Aman ta jèkeda a dala, dem Pharaon a mco, a nʼngraʼa, ara kra na.

²² A ta senda na Moise maya ndohi Egypte tèlèba, a nengaʼa a ngu a ndo nʼnzalaʼa te mizlinè, te ma.

²³ Aman mvi nengaʼa 40 ma, a nhur a ndè, aman a rka kramamhi na, ndohi Israel.

²⁴ A nrkaʼa, ta ga na matakwan a ndo ngiɗè ambalai, a nzlatsa, a mpela na di man a na, a nkeda ndo Egypte.

²⁵ A nhuro kramamhi nengaʼa ta suna, Zhiklè a woya a mbel ta a ri nengaʼa. Aman ta sun ɓai.

²⁶ Te mangoslèmaʼa a mshkè a sam ta, aman ta bozl va, a ngaɗa ta, aman ta tsi gumai: Dalahimam ga, kinè a kramama! Ngidè a ga na skwi ambaɓiaʼa a ngiɗè èhèmè?

²⁷ Aman ndo mwoy ma a nzukda Moise a deɓa, a ngaɗa:

²⁸ Nʼnge ka a ndo mbiaʼa, a ndo kita te ndev nga wa? Ka woy a ka keɗyè lèmèlèmè ara man ka keɗa ndo Egypte madatsa ɗè?

²⁹ Aman Moise a ntsena ma haha, a nhu na, a nʼnza a mbrok te kokwar Madian. Te pa a myu wudahi cèw.

³⁰ Te deb mvi kulkul faɗ gol Zhiklè a ngudoko na va a dai tʼhèshèkèɗ te nèʼèn vogwa te va vatak nthososaʼa, te verzi za Sinai.

³¹ A Moise man a rkaʼa, a nrzl na a géɗ skwi man a rkaʼa. Aman a herda na va, a mpi diaʼa, a ntsena ngèɗè Bi Zhiklè:

³² Iyè Bi Zhiklè bababhi ngaya, Bi Zhiklè Abraham, Bi Zhiklè Isaac, Bi Zhiklè Jacob. A Moise a ngudzi a ngu zlau man a pi diaʼa.

³³ A Bi Zhiklè a ngaɗa na: Suɗko kotokoroh auda te sak ngaya! Aman sam man ka zlatsa a pa, sam nkezlaʼa.

³⁴ I pu dai, a i rka matakwan ndohi ga te kokwar Egypte, i tsena kuɗ tengaʼa, a i shkè a hai, aman i mbel ta. Antanta sèi ka shkè, i woya man i zlinde ka a kokwar Egypte.

³⁵ Moise haha, man ta kwolaʼa, a ta gaɗa: Nʼnge ka a ndo mbiaʼa a ndo kita te ndev nga wa? Nengaʼa Zhiklè a nzlündo a ndo mbiaʼa, a ndo mʼmbel ndo, man gol Zhiklè a ngudoko na va a dai te ndev vatak.

³⁶ Nengaʼa a nde ta auda, a ngu nrkedai, a nʼngreda ta skwi tsaɗ tsaɗ te kokwar Egypte, te woyam mbiaʼa nduzoaʼa, tʼhèshèkèɗ, mvi kulkul faɗ.

³⁷ Nengaʼa Moise man a gaɗa ta ndohi Israel: Bi Zhiklè kinè a di a slambaɗda kinè ndo nhadka ma te ndev kramamhi kinè, ara va ga.

³⁸ Nengaʼa man a zhè a sam mɓicè ndo tʼhèshèkèɗ, a nda gol Zhiklè, man a gaɗa na a géɗ za Sinai, a nda bababhi nga.

³⁹ Nengaʼa a nʼngots ma nshèffè, man a da va nga. Aman bababhi nga ta woy a ta fa na gèɗ ɓai, aman ta kwolaʼa, a ta woy a ta min ta a deɓa a kokwar Egypte.

⁴⁰ Ta gaɗa na Aaron: Rama nga zhiklèhai, man ta dè a ma nga! Nga sun skwi man a ga na Moise ɓai, man a helka nga auda te kokwar Egypte.

⁴¹ A ta rom kra zlè a pats nasa, a ta zla na skwi a skwi mbèh skwi haha, a ta wuffè a géɗ skwi man ta roma a ri ta.

⁴² Aman Zhiklè a mʼmenda va na a deɓa, a njèke ta, aman ta tsi ri a mèzhèɓhi tʼhwaɗ giɗfèk, ara man ta Windo te ɗèlèwèr ndohi nhadka ma: Kinè ndohi Israel! Mvi kinè kulkul Gad te hèshèkèɗ, kin zlau skwai a kin vayè a iyè dè?

⁴³ Kin co gi Moloch a bantihi Remphan, zhiklè kinè, man kin roma, a kin tsu ri a sam ta. I woya man i de kinè a deɓ Babylone.

⁴⁴ Bababhi nga ta ngots gi malwuɗi Zhiklè tʼhèshèkèɗ, ara Zhiklè a ngaɗa na Moise, a nʼngra na aman a giaʼa, a lèmdè a skwi man a rkaʼa.

⁴⁵ A bababhi nga te deɓaʼa ta co, a ta daʼa a verzi Josuè a kokwar ndohi nte deɓa, ndohi man Zhiklè a ndzar ta auda a ma bababhi nga, ha ndè a ma David.

⁴⁶ David a nʼngots pombai a sam di Zhiklè, a ntsu rai, aman a ngatsa na gi a Zhiklè Jacob.

⁴⁷ Aman Salomon, nengaʼa a nrama na gai.

⁴⁸ Aman Zhiklè te géɗèʼa a géɗ skwi tèlèba, a nzi te gi man ri ndo a ngau, azɓai, ara man ndo nhadka ma a gaɗa:

⁴⁹ Gidfèk sam nʼnzi ga, a herkeda skwi nfi sak ga. Kin woy a kin ramay gi mè? Bi Zhiklè a gaɗa. Sam man i shèk va a pa tema?

⁵⁰ Ri ga a ngu skwi haha tèlè ka ɓi dè?

⁵¹ Kinè ndohi mèdègèɗ, ndav kinè a zlembaɗ kinè ntil ɓai, kin Sala na va a gèɗ a Mèzhèɓ Zhiklè nkezlaʼa pèc pècèk, lèmèlèmè ara babhi kinè.

⁵² Ndo nhadka ma tema, man babhi kinè ta dzara ɓai? A ta bazl ta ndohi man daga zlèzlèa ta ngreda nshkè ndo nzuraʼa. Aman kinè, ndohi man kin ga na ri a gèɗ, a kin keɗaʼa.

⁵³ Kin ngots ma kita Zhiklè te ri golahi Zhiklè, kin dzadzara ɓai.

Ta kola Etienne a kwa

⁵⁴ Aman ta tsena ma haha, a ndza ta a ndav, a ta peɗi zlèʼèn a géɗ nengaʼa.

⁵⁵ Aman Mèzhèɓ Zhiklè nkezlaʼa a nʼndha ndav Etienne, a mpu di a zhiklè, a nrka nʼnjèl Zhiklè, a Yèsu nzlatsa te civèɗ ri mandi Zhiklè, a ngaɗa:

⁵⁶ Na haha i rka giɗfèk mwinèa, kra-ndo nzlatsa te civèɗ ri mandi Zhiklè.

⁵⁷ A ta hè-zlèwè a ta pizlè zlembaɗ ta, a ta humda na va a gèɗ,

⁵⁸ a ta ngazleda auda te kokwar, a ta kola a kwa a ta keɗaʼa. A ndohi malwuɗihai ta pa na maslaka tengaʼa a ri a gol ngiɗè, nzlembaɗ nengaʼa Saul.

⁵⁹ A ta kol Etienne a kwa. Aman nengaʼa a mboho: Bai Yèsu, co mèzhèɓ ga!

⁶⁰ A nkalahi a gurmbèzh, a ngoɗ a wudar. Bi Zhiklè, ka da jèka ta mali tengaʼa haha a gèɗ ɓai! Aman a goɗ ma haha, a mʼmets na. Nkéɗ na ambaha Saul.