Actes 18 - Ma Zhiklè

Paul te kokwar Corinthe

¹ Te deɓaʼa Paul a njèkeda kokwar Athène, a mdo a kokwar Corinthe,

² a nʼngots ndo Juif ngiɗè, nzlembaɗ na Aquilas, ta yau te kokwar Pont. Nengaʼa a mshkè te Italie tok tok, ta a Priscille, ngwoz na (aman bi Claude a ngaɗa ta ndohi Juif tèlèba, aman ta jekeda Rome).

³ A mdo a sam tengaʼa, te man mizlinè nengaʼa lèmèlèmè ara mizlinè ta (ndohi ngi gi maslaka), a nʼnza a sam ta, a ngu mizlinè a sam ta.

⁴ A pats nshèk va tèlèba, Paul a njè ta ma te gi njèngè ma Zhiklè, a ndohi Juif ba, a ndohi Grec ba ta zhè, man ta fu gèɗ a ma nengaʼa.

⁵ Aman Silas a Timothée ta shkè te kokwar Macédoine, Paul a nfu gèɗ a njè ma Zhiklè genè, a ngreda ta ndohi Juif: Yèsu, nengaʼa Kristi.

⁶ Aman ta Sala va ta, a ta durdo Paul, Paul a ngégérdè maslaka na, a ngaɗa ta: Aman kita a nda gs kinè, mali kinè! Antanta i dè a ndav mpana, a sam ndohi nte deɓa.

⁷ A mdo, a mshkè a gi ndo ngiɗè, nzlembaɗ na Justus, man a gi zlau Zhiklè. Gi nengaʼa ndul ndul a ma gi njèngè ma Zhiklè.

⁸ Crispe, bi gi njèngè ma Zhiklè, a nco Bi Zhiklè a ndav na, a gi nengaʼa tèlèba, a ndohi Corinthe kumba, aman ta tsenaʼa, ta co a ndav, a ta gu baptême.

⁹ Bi Zhiklè a ngaɗa na Paul te nshunè a vaɗ: Ka gu zlau ɓai, sèi ka gèɗè, ka nza tètè ɓai!

¹⁰ Aman i zhè a nda ka, a ndo ngiɗè a slaha a nga ka matakwan azɓai. Aman ndohi ga kumba te kokwar haha.

¹¹ A nengaʼa a nʼnza a pa mvi staɗ a ki mokwa, a nsenda ta ma Zhiklè.

¹² Aman Gallion ngomna te kokwar Achaie, ndohi Juif tèlèba ta slambaɗa na va a Paul, a ta daʼa a sam kita.

¹³ A ta gaɗa: Ndo haha a fa ta ma a gèɗ a ndohai, aman ta jèjèr ma Zhiklè, a ta jèkeda ma kita Zhiklè, man Moise a va nga.

¹⁴ Aman Paul a woy a nhinè ngèɗè, Gallion a ngaɗa ta ndohi Juif: Aman ma metsar, man ma ncèkèlma, a ndohi Juif ga, i woya man i tsena ma kinè mènè.

¹⁵ Aman ma haha gèjau a gèɗ njè-ma, a géɗ nzlembaɗhai, a géɗ ma kita ndohi Juif, va-döl skwi kinè! I woy a i gi kita nengaʼa azɓai.

¹⁶ A ndzar ta auda a sam kita.

¹⁷ Ta tèlèba ta gso Sosthène, bi gi njèngè ma Zhiklè, a ta tsu a sam kita, a Gallion a nʼnga kita a géɗèʼa ɓai.

Mshkè Paul a deɓa a kokwar Antioche

¹⁸ A Paul a nʼnza a pa nʼnzi a zhè. Te deɓaʼa a nʼnga ta mbalai a kramamhi na, a woya a ndè a Syrie a wurom, a Priscille a Aquilas a nda nengaʼa. A nengaʼa a nsha gèɗ te kokwar Cenchrées, a géɗ man a ngaɗda ma ngiɗè a hai.

¹⁹ A mshkè na a kokwar Ephèse, a njèke ta a pa. A nengaʼa a mdo a gi njèngè ma Zhiklè, a njè ta ma a ndohi Juif.

²⁰ A ta tsu riaʼa, aman a nzi a pa nʼnzi kètè.

²¹ Aman nengaʼa nca ɓai, a nʼnga ta mbalai, a ngaɗa: Sèi i dè a i da gi ngolala a kokwar Jérusalem; aman Zhiklè a woyaʼa, i da shkè a deɓa a sam kinè. A njèkeda kokwar Ephèse,

²² a mdo a kokwar Césarée a wurom, a mdo a kokwar Jérusalem, a nʼnga ta mbalai a mpi ndohi Zhiklè, a mdo a kokwar Antioche.

²³ A ngu ndudoh kètè, te deɓaʼa a mdo a ma a nshèwèlè te Galaties, te deɓaʼa a Phrygie, a mva ta wuɗai a ndohi Yèsu.

Apollos a njè ma Zhiklè te kokwar Ephèse

²⁴ Ndo Juif ngiɗè, nzlembaɗ nengaʼa Apollos, a mshkè a kokwar Ephèse, ta yau te kokwar Alexandrie, ndo man a sun ngèɗè ma amba, a sun ɗèlèwèr Zhiklè a vata.

²⁵ A sun civèɗ Zhiklè, a njè ma Yèsu pèc pècèk, a mpi vogwa a ndo a ma. Aman nengaʼa a sun sèi baptême Jean.

²⁶ Nengaʼa a hüno man a wuzhko ma auda tèlè te ndav a mwuffe te gi njèngè ma Zhiklè. Aman Aquilas a Priscille ta tsenaʼa, ta co a gi ta, a ta ngra na civèɗ Zhiklè a vaʼa.

²⁷ Aman a woya a ndè a kokwar Achaie, kramamhi nengaʼa ta da na va. A ta zlündo ɗèlèwèr, a ta tsa ta ri a ndohi Yèsu, aman ta cèʼa. Aman a ndika a pa, a ntakaha ta ndohi kumba, man ta co Yèsu a ndav, a pombi Zhiklè.

²⁸ Aman nengaʼa a ntseda ta ma a pa a ndohi Juif, a nʼngreda ta, a sam di ndohi tèlè, a ɗèlèwèr Zhiklè: Yèsu, nengaʼa Kristi.