2 Thessalonians 3 - Ma Zhiklè

Va-tsu rai a géɗ nga!

¹ A vaʼa, dalahimam nga: Va-tsu rai a gèɗ nga, aman ma Zhiklè a zlèzlèmè tsam tsam, a ndohi ta slébèrdèʼa, ara man a ga a sam kinè,

² a nga pra te ri ndohi man ambaɓai, a ndohi shèwa. Aman ncè-a-ndav ambaha ta ndohi tèlè ɓai.

³ Aman Bi mʼmbel nga, nengaʼa nlèɓèslèʼa, a di a va kinè wuɗai, a ɓer kinè te skwi man ambaɓai.

⁴ Aman nga fi gèɗ a kinè te Bai Yèsu, aman skwi man nga fa kinè a gèɗ, kin giaʼa, a kin da gi a ma ma ba.

⁵ Aman Bai Yèsu da ngwodkoɗi ndav kinè a sam mwoy-ndo Zhiklè, a sam nzhèr skwia dai te Kristi.

Sèi nga gi mizlinè ndèzl

⁶ Nga fa kinè ma a gèɗ, dalahimam nga, a nzlembaɗ Bi Yèsu Kristi, aman kin mende va a deɓa a sam kramam kinè staɗ staɗ tèlèba man ta jèjèr civèɗ Zhiklè a falai, a njèjèr njè-ma man kin ngotso a sam nga ka ɓai.

⁷ Kin suna, ara man kin lèmdè va kinè a nga, a nga nza a sam kinè, nga ga fali ɓai.

⁸ Nga nda skwi ndo ngiɗè ambali ɓai, aman nga gu mizlinè a ri nga a pats a vaɗ, a vazaza a va a nga rzla kinè va a gèɗ ɓai.

⁹ Ar nga slaha nga gi arsa; aman nga woy a kin lèmdè va kinè a nga, a kin dzadzar nga.

¹⁰ Aman nga nza a sam kinè dai, nga fa kinè ma a gèɗ: Ndo man a woya a ngi mizlinè ɓai, da ndu skwa ɓai.

¹¹ Aman nga tsenaʼa, matrhiaʼa te ndev kinè ta gi falai, ta gi mizlinè azɓai, a ta kèlè a skwi ndohi ngiɗè, a ta gi a tengaʼa azɓai.

¹² A sam tengaʼa nga fa ta ma a gèɗ, a nga bid ta te Bi Yèsu Kristi, da gu mizlinè, da nza ɓislèʼa, a ta ngècè skwi nʼndi a ri ta.

¹³ Aman kinè, dalahimam nga, kin ngez ɓai te ngi skwi man amba!

¹⁴ Aman ndo ngiɗè a fi gèɗ a ma te ɗèlèwèr haha azɓai, kin humda va a nengaʼa ɓai, hori da keɗaʼa hovkorngwaʼa.

¹⁵ Aman kin rkaʼa ara ndo mayam ɓai, va-ngra na maya ara kramam kinè.

Mpshè ma

¹⁶ Aman nengaʼa, Bi gumai, da va kinè gumi a sam tèlèba, a maya na tsaɗ tsaɗ. Bi Zhiklè da zhè a nda kinè tèlèba!

¹⁷ Mbali man i Windo a ri ga, iyè Paul. Na haha sam ri ga man i geda a ɗèlèwèrhi ga staɗ staɗ tèlèba. Aranta i windèʼa.

¹⁸ Pombai Bi Yèsu Kristi da zhè a nda kinè tèlèba!