2 Thessalonians 2 - Ma Zhiklè

Ndo ngedas ndo

¹ A géɗ mshkè Bi nga Yèsu Kristi, a géɗ mɓicè-va nga a nengaʼa, nga tsa kinè rai, dalahimam nga:

² Skwi man ta gaɗa kinè, a ma, te ɗèlèwèr, ara man nga zlinda kinè, a kin huro a kin gaɗa, pats Bi Yèsu a zhè ma, da dzakaɓama kinè gèɗ ɓai, kin gu zlau ɓai.

³ Va-gau, aman ko staɗ da pe kinè a wi ɓai, pal ba. Aman patsaʼa a shkè di azɓai, sèi ndohi ta gi mèdègèɗ a sam Zhiklè holholaʼa, a ndo malai mbiaʼa a ngredekaɗ na auda, nengaʼa ndo ngedas ndo.

⁴ Nengaʼa mayam, man a fi va a géɗ skwi Zhiklè tèlèba, a géɗ ntsi ri Zhiklè ba, a nzi a hai te gi Zhiklè, a da fi va na a Zhiklè.

⁵ Mpca kinè a gèɗ ɗè, aman i gaɗa kinè maʼa, te va man i zhè a sam kinè dai?

⁶ Antanta kin suna, skwi man a gedassa civèɗ nengaʼa, a gèɗ mè man nʼngredkaɗauda di ɓai; a géɗ man pats nengaʼa di ka ɓai.

⁷ Skwi nʼnghedaʼa a sam skwi malai, a hinè mizlinè na ma, aman sèi ta ceda nengaʼa man a gedassa civèɗèʼa auda dai.

⁸ Te deɓaʼa tsam tsam ndo nderdè Zhiklè a da gudko va, a Bai Yèsu a di a keɗaʼa a nshèffè man a shkè auda te ma na; ngedè va Yèsu a zeda langa.

⁹ Aman ndo nderdè Zhiklè a di a slèmbèɗè a wuɗi Sadan, a wuɗihi ncèkèlma tsaɗ tsaɗ,

¹⁰ a skwi man zura ka ɓai a sam tengahi man ta ze ta, a géɗ man ta woy ma nzuraʼa a ndav ɓai, ta cè aman ta mbel ta azɓai.

¹¹ Gar haha Zhiklè a zlinda ta skwi nzlakede ta, aman ta cè ncèkèlma a ndav.

¹² Aranta tengahi tèlèba man ta ca ma nzura ɓai, aman ta woy skwi man zura ɓai, ta ngècè kita ta.

Zhiklè a mpar nga aman nga mbel nga

¹³ Aman sèi nga shid gèɗ a Zhiklè pèc pècèk a géɗ kinè, dalahimam nga, man Bi Zhiklè a woy kinè, man Zhiklè a mpar kinè te nhinkaɗ na, a kin ndikè a sam mʼmbel ndo, a sam nkezlaʼa te Mèzhèɓ Zhiklè, te ncè ma nzuraʼa a ndav.

¹⁴ Ma nzuraʼa man Zhiklè a baha kinè a pa, a géɗ ma mbelaʼa man nga njè kinè, a kin ngècè nʼnjèl Bi nga Yèsu Kristi.

¹⁵ Gar haha va-zlatsa taraʼa, dalahimam nga, vo-gso njè-ma man nga njè kinè, ko a ma, ko te ɗèlèwèr.

¹⁶ Aman nengaʼa, Bi nga Yèsu Kristi, a Zhiklè, Bab nga, man a woy nga a ndav na, a va nga skwi mbid nga man a nzi dai a mèdèp, a skwi man nga zhèrè te ndav,

¹⁷ da büdo ndav kinè, da va kinè wuɗai te mizlinè, te ma kinè man amba tèlèba.