2 Peter 1 - Ma Zhiklè

Mbalai

¹ Simon Pierre, ɓèlè, ndo sak Yèsu Kristi, a sam tengahi man ta ngots ncè-a-ndav mbelaʼa lèmèlèmè ara nga, te ngi-zura Bi Zhiklè a Ndo mʼmbel nga Yèsu Kristi.

² Pombai a gumi kumba da zhe a nda kinè te nshin Zhiklè a Bi nga Yèsu!

Zhiklè a baha nga, a mpar nga mpèrè

³ Wuɗi Zhiklè a mva nga skwi tèlèba a géɗ nshèffè a civèɗ Zhiklè, aman nga sun nengaʼa man a baha nga te nʼnjèlè, te wuɗi nengaʼa.

⁴ Te nʼnjèlè a wuɗi nengaʼa nga ngots skwihi man a mpasla nga rai, mbelaʼa mbiaʼa holholaʼa, a géɗ tengaʼa kin slaha kin mbel kinè te ri ntétékè tʼherkeda man a gédèshè ndo, a nge kinè ara Zhiklè.

⁵ Ani haha, va-gu maya a géɗ skwi haha: va-ngatsa na maya nshèffè te ndav a va ncè-a-ndav kinè; va-ngatsa na maya te gèɗ a va maya nshèffè te ndav;

⁶ va-ngatsa na ngshè-va a va maya te gèɗ; va-ngatsa na nzhèr skwi a ma ma a va ngshè-va; va-ngatsa na zlau Zhiklè a va nzhèr skwi a ma ma,

⁷ va-ngatsa na mwoy kramamhi kinè a va zlau Zhiklè; va-ngatsa na mwoy ndo a ndav a va mwoy kramamhi kinè.

⁸ Aman skwihi haha a sam kinè, a kin ngots tèlèba a vata, ta ɓir kinè, aman kin nzi a deli azɓai, aman kin gi a dèngwèr azɓai, te nshin Bi nga Yèsu Kristi.

⁹ Ndo man a ngatsa skwi haha ɓai, mandazlai, a tètèmè va te ruva. Mpca na a gèɗ, ara man mpana ma te malihi nengaʼa nzlèzlèa.

¹⁰ Gar haha, dalahimam ga, va-gu maya a vata, aman kin nzi te skwi man Zhiklè a baha kinè a pa, man a par kinè a mpèrè a pa. Aman kin gi ar haha, kin kèlèhi azɓai.

¹¹ Ar haha kin ngots civèɗ a kokwar-Bi a Bi nga a Ndo mʼmbel nga Yèsu Kristi, kokwar-Bi man a nzi a mèdèp.

¹² Gar haha i woya man i jèkè azɓai, a i hadka kinè ma a gèɗ pèc pècèk, ko kin sun maʼa, a kin pa verzi kinè te ma nzuraʼa ma.

¹³ Aman i hur amba, aman i hadka kinè ma a gèɗ, a i piɗèkwud kinè, man i zhè a nshèffè haha tʼherkeda dai.

¹⁴ Aman i suna, ara man Bi nga Yèsu Kristi ba a ngrayè, i zhuwaʼa a ma dzavai.

¹⁵ Aman i woya a i gi maya a vata, aman ko te deɓaʼa man i do ga ma, kin slaha a kin hér skwi haha pèc pècèk.

Ndohi man ta rka nʼnjèl Kristi

¹⁶ Aman nga ngreda kinè wuɗi Bi nga Yèsu Kristi, mshkè nengaʼa, nga goɗ a tsaval ambali genè ka ɓai. Aman nga rka mbi nengaʼa a di nga.

¹⁷ Nengaʼa a nʼngots nʼnjèlè a nslébèrdè te ri Zhiklè, Bab na, a ngèɗè ngiɗè staɗ man a shkè te nʼnjèlè mbiaʼa, man a gaɗa na: Na haha kra ga, man i woyaʼa a ndav ga. Ndav ga a wuffè kumba a géɗ nengaʼa.

¹⁸ A nga tsena ngèɗè haha man a shkè te zhiklè te géɗèʼa, aman nga zhè a nda nengaʼa a géɗ za nkezlaʼa.

¹⁹ Aman skwi haha tèlèba a ngreda nga ma ndohi nhadka ma auda zuraʼa, a kin gi amba, aman kin wèrèʼa. Aman nengaʼa ara skwi nhél sam man a hela sam te ruva, ha pats man sam nciɗaha nga, a mavar prèk a vèngè te ndav kinè.

²⁰ Aman sèi kin suna: Ma nhadka ma a te ɗèlèwèr Zhiklè ɓai, man ndo a slaha a ngrédè verziaʼa a ri na.

²¹ Daga zlèzlèa ta hodko nga ma ɓai, man ndav ndo a huro ara man a woyaʼa. Aman ndohi ta goɗ ma Zhiklè, ara man Mèzhèɓ Zhiklè nkezlaʼa a va ta.