2 Corinthians 8 - Ma Zhiklè

Mvi skwi a ndav amba

¹ Nga ngreda kinè, dalahimam ga, pombi Zhiklè man mpi ndohi Zhiklè Macédoine a nʼngotso.

² Ko ta te ndev matakwan kumba, ta wuffè holholaʼa gènè. Ko ta tawassa kumba, ta vau skwi a vata, a ndav nzuraʼa.

³ I ndo malwuɗai tengaʼa, aman ta vau skwai a ndav amba, a fena wuɗi ta ba.

⁴ Ta tsa nga ri kam kam, ta dzhoɗ civèɗ, aman ta mbi a mizlinè ntakaha ta ndohi Zhiklè.

⁵ A ta gau ara man nga hur genè ka ɓai, aman ta vau va ta, nshèlèkuraʼa a Bi Zhiklè, te deɓaʼa ta vau va ta a gèɗ nga, ara man Zhiklè a woyaʼa.

⁶ Gar haha Tite a ndeva mizlinè pombi a sam kinè, ara man a hüno.

⁷ Lèmèlèmè ara man kin ngots kumba te skwi tèlèba, te ncè-a-ndav, te ngèɗè, te nshin skwai, te ngi gazawa te skwi tèlèba, te mwoy-ndo, man kin ngotso a sam nga, va-ngreda mwoy-ndo kinè auda te mvi skwi ba.

⁸ I gèɗè ara man i fa kinè a gèɗ a wuɗi ka ɓai. Aman agéɗ man ndohi ngiɗè ta vi skwi a vata, i jkedè mwoy-ndo a ndav kinè ba: kin woy ndo a vava ɗè?

⁹ Aman kin sun pombi Bi nga Yèsu Kristi, ko nengaʼa ndo mèshèlè, a nʼnde na a ndo ntawassaʼa, a géɗ kinè, a géɗ man te ntèwèshè nengaʼa kin ndi a ndohi mèshèlè.

¹⁰ I hur ar haha: aman skwi haha a da takaha kinè. Atutsa kin hüno ngiaʼa, a gèɗ man kin woyaʼa.

¹¹ Aman ara man kin woy a kin giaʼa, va-rufa skwi man kin hüno, a kin vi skwi man kin ngotso.

¹² Aman ndo a wuffè a géɗ mvi skwi man a ngotso, ambaha Zhiklè. Zhiklè a jhèɗè skwi man a ngatsa ɓai, ka ɓai.

¹³ I woy aman ndohi ngiɗè ta wèl va, a kinè, kin si matakwan te riaʼa, azɓai; aman skwi da lèmda.

¹⁴ Te njèkèɗi skwi kinè, kin takaha ta tengahiaʼa man antanta skwi dèʼa ta ɓai. Te deɓa ba te njèkèɗi skwi tengaʼa, ta da takaha kinè te skwi man dèʼa kinè ɓai: a skwi a nlèmdè aranta, ara man ɗèlèwèr Zhiklè a gaɗa:

¹⁵ Ndo man a ɓica skwi kumba, mpatakaʼa azɓai; ndo man a ɓica skwi kumba ɓai, skwi man dèʼa na ɓi ba, azɓai.

Tite a golahi nengaʼa

¹⁶ Nga shid gèɗ a Zhiklè, aman a nʼndha ndav Tite, a gi wudi kumba a géɗ kinè aranta.

¹⁷ Nengaʼa a ngu ara man nga dzhodo a ndav amba; aman nengaʼa a nhur a ri na, aman a ndè a sam kinè.

¹⁸ Nga zlündo kramam ngiɗè a nda nengaʼa, man labar ma nengaʼa a géɗ man ma mbelaʼa amba, a zlèzlèmè a sam mpi ndohi Zhiklè tèlèba.

¹⁹ Mpi ndohi Zhiklè ta co nengaʼa auda a ndo man kin tsakala na skwi a rai, a nga dè a vna, a nga ngreda skwi man amba man nga woya a nga giaʼa, a nʼnjèl Zhiklè.

²⁰ Gar haha nga nga gi maya a sam ndohi man ta tsa nga derngasl a géɗ skwi mbiaʼa man a shkè auda te mizlinè nga.

²¹ Aman nga gi maya, aman skwi tèlè a gi zuraʼa a sam di Bi Zhiklè, a sam di ndohi ba.

²² A nga zlündo kramam nga ngiɗè a nda tengaʼa, man nga ngotso a géɗ mizlinè man a gia zuraʼa. Antanta a gi holholaʼa zaʼa a géɗ man a fi géɗ a kinè.

²³ Anai Tite, ndo ga, man nga gi mizlinè a vna te ndev kinè; kramamhi nga man ta zlündo ara ndohi sak mpi ndohi Zhiklè, man nengaʼa njèl Kristi;

²⁴ va-ngreda mwoy-ndo a ndav kinè a sam di mpi ndohi Zhilkè tèlèba; va-gu malwuɗai, ara man nga tsi wi a gèɗ kinè ambali ka ɓai.