2 Corinthians 6 - Ma Zhiklè

¹ Nga ndohi man nga mbi a mizlinè a nengaʼa, a nga bid kinè, kin co pombi Zhiklè ambali ɓai!

² Aman nengaʼa a gaɗa: A pats man amba, i co ntsi ri ngaya. A pats mʼmbélè, i takaha ka. Na haha, antanta pats man amba, na haha, pats mʼmbélè.

³ Nga woya a nga slafaɗama na sak a ndo ngiɗè ɓai, a ta da tsa nga derngasl a géɗ mizlinè nga azɓai.

⁴ Aman te skwi tèlèba nga ngreda va nga auda ara ndohi mizlinè Zhiklè: te nzhèr skwia dai a ma ma, te matakwan, te skwi mwuɗitpa, te zlau,

⁵ a sam man ta ndah nga, te gi dangai, a sam nrubai, man ntulè a keɗ nga, te nʼnzi a dai, a ntiɗè a mai,

⁶ te mɓer va, te nshin skwai, te nzhèr skwi a ma ma, a ndav amba, te Mèzhèɓ nkezlaʼa, te mwoy-ndo a ndav man a vava,

⁷ te ngèɗè ma nzuraʼa, a wuɗi Zhiklè. Nga ngots skwi var ngi-zuraʼa te ri mandai, te ri gula,

⁸ a sam man ta nzal nga, a sam man ta pa nga hori a dai. Ta gèɗè a gèɗ nga, gar amba, gar ambaɓai. Ta gèɗè a gèɗ nga: Nga ndohi mpi ndo a wai, aman nga gèɗè ma nzura genè.

⁹ Nga ndohi man ta sen nga ɓai, aman ta sen nga genè. Nga ndohi man nga metsi nga, a nga nzi a nshèffè genè. Nga ndohi man ta ga a nga matakwan, aman nga metsa ɓi genè.

¹⁰ Nga ndohi man nga kuɗai, aman nga wuffè pèc pècèk ba. Nga ndohi ntawassaʼa, aman nga ga ta ndohi kumba a ndohi mèshèlè genè. Nga ndohi man nga ngatsa skwi ɓi fèt, aman skwi tèlè a nga genè.

¹¹ Kinè ndohi Corinthe, nga goɗ ma kumba a sam kinè; ndav nga mwina twèng.

¹² Kin ngots sam kumba te ndav nga. Aman ndav kinè a mwinè kètè a geɗ nga.

¹³ I gèɗè a nda kinè ara a nda wudahi ga. Va-gu lèmèlèmè arsa, va-wina ndav kinè ba twèng!

Kinè gi Zhiklè man a zhè a nshèffè

¹⁴ Kin humda va ɓai a nda ndohi man ta ca a ndav ɓai. Ngi-zuraʼa a ngi-zura ka ɓai, ta hümdè te mè? Skwi nhél sam a ruva ta hümdè te mè?

¹⁵ Nda Kristi a Sadan ta mbi a ma ɗè? Ndo ncè a ndav, a ndo man nca a ndav ɓai, ta hümdè ɗè?

¹⁶ Gi Zhiklè a vrihai ta hümdè te mè? Aman nga, gi Zhiklè man a zhè a nshèffè. Ara Zhiklè man a gaɗa: I war a i nzi a sam tengaʼa, i shèwèlè te ndev tengaʼa; a i gi a Zhiklè ta, a tengaʼa ta gi a ndohi ga.

¹⁷ Gar haha vo-do kinè auda a sam tengaʼa, va-kezla va kinè, Bi Zhiklè a gaɗa, kin lama na skwi nlizhèa ɓai, a i woy a i ce kinè,

¹⁸ a i gi a Bab kinè, a kin gi a wudahi a dalahi ga, Bi Zhiklè wuɗi tèlèba a gaɗa.