2 Corinthians 5 - Ma Zhiklè

¹ Nga suna: aman gi nga ntʼherkeda haha, nengaʼa va nga, mʼmbeɗ na, nga ngots gi man Zhiklè a nɗüzlo, gi man ri ndo a ngu ka ɓai, man a nzi te zhiklè te géɗèʼa a mèdèp.

² A géɗ nengaʼa ba nga ɗish va, mpataka skwi Zhiklè man nga da fi a va, a keɗ nga, a nga zhèrè te ndav,

³ a skwi a va; ta da ngatse nga adi azɓai.

⁴ Aman nga te gi haha dai, nga ɗish va a nga si matakwan. Nga woy a ta suɗama nga skwi auda a va ɓai, nga woy a ta va nga skwi a va, a nshèffè a gérɗè skwi mʼmetsi a hwaɗ.

⁵ Aman Bi Zhiklè a ri na a ntil nga hi a géɗ skwi sa, a va nga Mèzhèɓ a hai a géɗ skwi man a da va nga.

⁶ Gar haha nga fi gèɗ a vna pèc pècèk: nga suna, aman nga te va nga dai, nga dra a sam Bai Yèsu.

⁷ Aman nga dè te ncè-a-ndav, te nrkè skwi a di ka ɓai.

⁸ Aman nga mana ndav nga, ko ambaha nga holholaʼa aman nga jèkeda va nga a nga dè ngwi a sam Bai Yèsu.

⁹ A géɗ nasa nga gi maya maya, aman nga nzi a nshèffè ara man ambaha Zhiklè, ko nga te ngwi ma, ko nga te va nga haha dai.

¹⁰ Aman nga tèlèba, sèi nga da zlècè a sam nʼnzi kita Kristi, a sam man ndo staɗ staɗ a ngè-cèʼa, gar amba, gar ambaɓai, ara man a gu a pats nshèffè na tʼherkeda.

Mizlinè mʼméndè gumi a hai

¹¹ A zlau Zhiklè aranta, nga war a nga bid ta ndohai. A sam di Zhiklè, nshèffè nga nʼngreda tʼuda ma. Aman i hur te gèɗ, ko a sam kinè ba, nshèffè nga nʼngreda tʼuda ma.

¹² Antanta nga tsi wi va nga a sam kinè a ri nga azɓai; sèi nga gi aman kin slaha kin jégèr va a géɗ nga. A kin slaha kin da mbeɗa ta ma a tengahiaʼa man ta jégèr va a géɗ skwi man a deɓaʼa, skwi te ndav ka ɓai.

¹³ Aman gèɗ nga nza, a za a géɗ Bi Zhiklè. Aman nga a maya te gèɗ; a maya te gèɗ a géɗ kinè.

¹⁴ Aman mwoy-ndo a ndav te Kristi a erɗe nga, a géɗ man nga huro, aman ndo staɗ a mʼmets na te di man a ndohi tèlèba, ta tèlèba ta bazl ta.

¹⁵ A nengaʼa a mʼmets na te di man a ndohi tèlèba, a géɗ man ndohi a nshèffè ta da nzi a nshèffè man a tengaʼa genè ka ɓai, aman a géɗ nengaʼa man a mets na, a nslambaɗkaɗauda a géɗ tengaʼa.

¹⁶ Anai nga ɗèl ndo ara nyakaɗ na a sakaɓai; ko halaʼa nga sun Kristi nara ndo, antanta nga sun nengaʼa ar haha ɓai.

¹⁷ Gar haha man ndo a zhè te Kristi, nʼngaʼa a ndo mɓuaʼa, skwi mʼmovaʼa kala a deɓa ma, na haha skwi tèlèba nʼnga a mɓuaʼa.

¹⁸ Aman skwi tèlèba a shkè te Zhiklè, man a menda nga gumi a hai a Kristi, a mva nga mizlinè mʼméndè gumi a hai.

¹⁹ Aman Zhiklè, te Kristi, a mʼmenda gumi a hai a ndohi herkeda, a nhera mali ta asaɓai. A mva nga ma mʼméndè gumi a hai.

²⁰ Anai nga gaʼa a ndohi sak te di man a Kristi, te man Zhiklè a bid ndo, te nga: Anai nga tsi ri te di man a Kristi: Va-gau aman kin menda gumi a hai a Zhiklè!

²¹ Aman Zhiklè a ndeda nengaʼa man a sun mali ɓi fèt, a malai a géɗ nga, aman te nengaʼa nga da ndi a ndohi nzuraʼa a sam di Zhiklè.