2 Corinthians 13 - Ma Zhiklè

Mbali man a deda

¹ Antanta i dè a sam kinè mamakaraʼa. A ndohi malwuɗihi cèw, makar, ta da gèɗ ma mali staɗ staɗ telèba.

² I gaɗa kinè nshèlèkuraʼa ma, a i gaɗa kinè zaʼa – ara man i do a sam kinè macecèwaʼa, antanta ba man i dra a sam kinè – a sam tengaʼa man ta gu malai, a sam ndohi ngiɗè tèlèba: Aman i dè a deɓa a sam kinè zaʼa, i jèke ta ndohi azɓai.

³ Kin gaɗa; nga woya nga sun Kristi man a gèɗè te nengaʼa. Kristi wuɗi nʼazɓai ka ɓai a sam kinè; aman wuɗi na zhè a sam kinè.

⁴ Ko ta gezlala, te man wuɗi na azɓai, a nʼnza a nshèffè a wuɗi Zhiklè. Ko nga te nengaʼa, wuɗi nga azɓai, nga da ngrédè nshèffè auda a nda nengaʼa a sam kinè a wuɗi Zhiklè.

⁵ Vo-jkudo ncè a ndav kinè a ri kinè, gar kinè nza te nce-a-ndav, gar kin nza ɓai. Vo-jkudo ndav kinè a ri kinè! Kin sun ndav kinè a ri kinè ɓi ɗè? Kin sun Kristi te ndav kinè ɓi ɗè? Man ɓai, kin ngatsa ɓai.

⁶ Aman i zhèrè te ndav, kin da shinka, nga ndohi man nga ngotso.

⁷ Nga tsi ri a Zhiklè, aman nga mbeɗama kinè ndav azɓai. Nga gi zlau azɓai, aman ta rka nga ara ndohi man nga slaha skwi ɓai. Nga woy a kin gi skwi man amba, ko ta rka nga ara ndohi man nga slaha skwi ɓai.

⁸ Nga slaha nga Sala va a sam ma nzuraʼa ɓai, sèi nga gi mizlinè a géɗ ma nzuraʼa.

⁹ Nga wuffè, aman wuɗi nga azɓai, aman kinè, wuɗi kinè a zhè. A nga tsi rai, aman kin gi jèlèlèʼa.

¹⁰ A géɗ nasa i windè ma haha, man i dra a sam kinè. Aman te deɓaʼa, man i do do a sam kinè ma, i gèɗè a wuɗi azɓai. Zhiklè a mvay wuɗai aman i ɗizlè skwai, i mbeɗa ka ɓai.

¹¹ Te deɓaʼa, dalahimam ga, va-wuffa, va-tül nshèffè kinè zaʼa, vo-co ma man nga bid kinè a vna, va-hur ma a ndav staɗ, va-woy gumai! A mwoy-ndo Zhiklè a gumai a da nzi a nda kinè.

¹² Vagu mbali a va a nkèlèw ri a daʼai ndohi Zhiklè. Ndohi Zhiklè tèlèba ta ga kinè mbalai.

¹³ Pombai Bi Yèsu Kristi, a mwoyndo Zhiklè, a Mèzhèɓ Zhiklè nkezlaʼa man a humde nga, da zhè a nda kinè tèlèba!