2 Corinthians 12 - Ma Zhiklè

Skwi Zhiklè man a rkeda a Paul

¹ I woy a i jégèr va, ko ambaɓi ba. I woy a i dè a ma ma a i ngréɗè skwi man Bai Yèsu a ngrayè.

² I sun ndo ngiɗè staɗ te Kristi. A gi mvi 14 ma, gar nte gada va na, gar nte gada va na ka ɓai, i sun ɓai, aman Bi Zhiklè a suna. A ta ceda a zhiklè a géɗèʼa.

³ I sun ndo sa – gar nte gada va, gar nte gada va ka ɓai, i sun ɓai, aman Bi Zhiklè a suna.

⁴ Ta daʼa a géɗèʼa, a sam mbelaʼa, a ntsena ma, man amba a ngèɗ ɓai.

⁵ I war i jégèr va a géɗ va ga ka ɓai, sèi a gèɗ ndo sa zaʼa, i war aman i jégèr va a géɗ va ga ka ɓai, sèi a géɗ man wuɗi ga azɓai.

⁶ Ko i wasl te ma ɓai, aman i sun skwi te gèɗ, a géɗ man i goɗ a nzuraʼa. Aman i gèɗè azɓai. Ndo ngiɗè man a tsena ma ga, da rkayè ara ndo mbia ɓai.

⁷ A géɗ man i dzogor va azɓai, te man skwi mbiaʼa a erkayè a dai, skwi man a tezay va ga a zhè; gol Sadan, man a ɗutsyè, man i grè gèɗ ɓai.

⁸ I tsu ri a Bi Zhiklè a géɗ nengaʼa sak makar, aman a jèkyè;

⁹ a nengaʼa a ngaɗayè: Pombi ga da dèʼa ka, aman wuɗi ga a gi te ndohi man wuɗi ta azɓai. Gar haha i woya man i jégèr va nshèlèkuraʼa a géɗ man wuɗi ga azɓai, a wuɗi Kristi a nzi a sam ga.

¹⁰ Gar haha ndav ga langlangaʼa a sam man wuɗi ga azɓai, a sam man ta derɗyè, a sam matakwan, a sam man ta parahayè, a sam skwi mwuɗitpa a géɗ Kristi. Man wuɗi ga azɓai, wuɗi Kristi a zhè.

Paul a hér gèɗ a géɗ mpi ndohi Zhiklè te Corinthe

¹¹ I ndaʼa a ndo nrzla ma! Kin fay a gèɗ arsa! A woy kin slebardyè, te man ndohi sak kinè mbibihiaʼa ta fenyè azɓai, ko iyè ndo ambalai.

¹² Aman skwi malwuɗi mizlinè ga ara ndo sak a ngu a sam kinè kumba, a skwi man nʼngreda auda, a nrkedai, a wuɗai.

¹³ Skwi man kin ngatsa ara mpi ndohi Zhiklè ngiɗè ɓai, mè? Sèi man i dzhaɗa skwi te ri kinè ɓai. I yak ga sèi kin pray mali ga.

¹⁴ Na haha i til va man i dè a sam kiné mamakaraʼa, a i woy skwi te ri kinè ka ɓai. I woy skwi kinè ka ɓai, aman i woy kinè. Ambaɓai aman wudahi ta ɓica skwi mèshèlè a bab ta a mam ta. Sèi bab a mam wudahai ta va ta wudahai.

¹⁵ A ga ambahayè, man i vi skwai, a i vi nshèffè ga a géɗ kinè. Aman i woy kinè holholaʼa. Kin woy iyè arsa azɓai ɗè?

¹⁶ Arsa ka ɓi ɗè: i dzhaɗa skwi te ri kinè ɓai. Aman kin gaɗa: i bid kinè a maya ngwèdè ndo, a i ngats kinè.

¹⁷ I zlündo ndo a sam kinè man a nda ngwod kinè pats ngiɗè ɗè?

¹⁸ I zlündo Tite a sam kinè, a kramam ngiɗè. Kos Tite nʼngwode kinè ɗè? Nhér gèɗ nga lèmèlèmè ka ɓi ɗè? Mizlinè nga lèmèlèmè ka ɓi ɗè?

¹⁹ Gar kin hérèʼa, nʼnzi a zhè nga goɗ ma man nga tsoko gèɗ nga auda a sam kinè genè. Aman nga gèɗè te Kristi a sam di Zhiklè. Dalahimam ga, skwi tèlèba a gi aman a kin grè a ma ma.

²⁰ I gi zlau man i da shkè, i da ngats kinè ɓai, ara man i woyaʼa. A kinè ba, kin da ngatsyè azɓai, ara man kin woyaʼa: ngi ndav, srak, shèwa, ndzoan, ntsi derngasl, ngre ndo, nfi va, skwi ndzakaɓaʼa, a zhè.

²¹ I gi zlau man i dè zaʼa, Zhiklè a da pay hori a dai a sam kinè, a i lèyè a gèɗ ndohi kumba, man ta gu malai te va nasa, a ta ngwode ndav ta ɓai, a géɗ skwi man ta lizha va ta a vna, man ta beza zlawa a ta gu mphömè.