2 Corinthians 11 - Ma Zhiklè

Paul a ndohi sak ncèkèlma

¹ Ko i gèɗè a nrzlè te va kètè, da ambaha kinè genè!

² Aman i gi srak a géɗ kinè a srak Zhiklè; i woya kinè a ntsim staɗgenè, Kristi; ara medemai man nsossur ɓai.

³ Aman i gi zlau, lèmèlèmè ara zhüzhok a mpeda Eve a wai a maya na, nhér gèɗ kinè nzuraʼa a nlèɓèslèa te Kristi, a da gedas na.

⁴ Aman ndo a dè a sam kinè, a njè kinè Yèsu ngiɗè, man nga njè kinè ɓai, a kin ngècè mèzhèɓ ngiɗè, man kin ngots ka ɓai, a ma mbelaʼa ngiɗè tsaɗ, man kin co ka ɓai, tsam tsam kin fi gèɗèʼa.

⁵ I gi hérèʼa, ndohi sak kinè mbibihiaʼa ta fe-nyè azɓai.

⁶ Ko i düdüɓè ma genè, aman te gèɗ i sun skwai. A skwi man i suna, nga ngreda kinè tèlèba.

⁷ Aman i manda gèɗ a hai, a géɗ man ta nzal kinè. Man i njè kinè ma mbelaʼa man a Zhiklè ambalai i gu mali ɗè?

⁸ I co skwi te ri mpi ndohi Zhiklè ngiɗè, i ngots Suli te ri ta, aman i slaha a i gi mizlinè a sam kinè.

⁹ Aman i nza a sam kinè, a i ngatsa skwi ɓai, i rzla na va a gèɗ a ndo ɓai. Aman kramamhi man ta shkè te Macédoine, ta takahayè a skwi man i tèkwènaʼa. Gar haha te skwi tèlèba i rzla kinè va a gèɗ ɓai, a i woy a i gi arsa a ma ma.

¹⁰ Ara man ma nzuraʼa te Kristi a zhè te ndav ga a vava, labar njégèr va ga haha te kokwar Achaie da gedassa ɓai!

¹¹ Ehèmè? Te man i woy kinè ɓi ɗè? Zhiklè a suna.

¹² Aman skwi man i giaʼa, I woy a i gi a ma ma ba, a i gedassa civèɗ a tengaʼa man ta woy maya, a ta jégèr va a géɗ man ta gaɗa: nga lèmèlèmè ara tengaʼa.

¹³ Aman ndohi sak ncèkèlma a ndohi mizlinè nʼngwèdè ndo ta ngwèdè va ta a ndohi sak Kristi.

¹⁴ Nara nrkedi ka ɓai. Ko Sadan a ri na ba a ngwèdè va na a gol skwi nhèl sam.

¹⁵ Gar haha, ndohi ntakaha ba, ta ngwèdè va ta a ndohi ngi mizlinè nzuraʼa. Ndikèma tengaʼa a da gi ara mizlinè ta.

Paul a si matakwan

¹⁶ Aman i gaɗa kinè zaʼa: Ndo da rkayè ara ndo nrzlaʼa ɓai! Aman kin woyaʼa, va-fiyè a madaɗau, a i jégèr va kètè ma ba.

¹⁷ Ma man i gèɗè haha, a shkè te Bi Zhiklè ka ɓai, aman te nrzlè ga, te njégèr va.

¹⁸ Aman ndohi kumba ta slèbèrdè va a géɗ va ta, i ba i woya a i slèbèrdè va ba.

¹⁹ Kinè ndohi maya, ndohi nrzla ta ambaha kinè!

²⁰ Ndo ngiɗè a ga kinè ɓèlè, ndo ngiɗè a ga kinè wuɗai, ndo ngiɗè a gs kinè, ndo ngiɗè a Sala va a sam kinè, ndo ngiɗè a tsama kinè dai, a kin cè genè, kin gèɗ skwa azɓai.

²¹ Hori a dzayè; aman nga ga arsa ɓai, te man wuɗi nga azɓai. Aman ndo ngiɗè a fi va a géɗ skwi ngiɗè — i gèɗè ara ndo nrzlaʼa — i slaha a i fi va genè!

²² Tengaʼa ndohi Hébreu — i ba arsa! Tengaʼa ndohi Israel — i ba arsa! Tengahi tser Abraham — i ba arsa!

²³ Tengaʼa ndohi mizlinè Kristi – i gèɗè ara man gèɗ ga nza: I ba holholaʼa! I fen ta a mizlinè. I nza a dangai sak kumba a fena tengaʼa. Ta ndahyè holholaʼa. I beza a ndev matakwan mʼmetsai sak ngam ngam ba.

²⁴ Ndohi Juif ta tsyè 39, 39, sak zlam.

²⁵ I ngots gada sak makar. Ta kalyè a kwa sak staɗ. Wurom a géɗ iyam man iyè te pa, ngedas na sak makar, pats staɗ, mʼmèn staɗ iyè a géɗ woyam mbiaʼa.

²⁶ I sawala kumba, i ngots civèɗ mwuɗitpa te woyam, te ndev metsar hèshèkèɗ, sam mwuɗitpa a sam ndohi Juif, sam mwuɗitpa te ndev ndohi nte deɓa, sam mwuɗitpa te kokwar mbiaʼa, sam mwuɗitpa tʼhèshèkèɗ, sam mwuɗitpa a géɗ woyam mbiaʼa, sam mwuɗitpa te ndev kramamhi ncèkèlma.

²⁷ I gu mizlinè a vazaza. I nza a dai, mi a nkeɗyè, iyam a ndzayè, i jèkeda skwi nʼndai pats ngiɗè pats ngiɗè kumba, a mtasl, maslaka azɓai.

²⁸ A va skwi man a gayè haha tèlèba, pèc pècèk i hér gèɗ a géɗ mpi ndohi Zhiklè tèlèba. Ko i gèɗè njèkèɗia a va azɓai.

²⁹ Ndo man wuɗi na azɓai, lèmèlèmè ara ga, ngiɗè a zhi ɗè? Ndo man ta slafaɗama na sak, ndo man ndav a ndza na ara vogwa ara ga, ngiɗè a zhi ɗè?

³⁰ Anai aman i woy a i fi va, i war man i fi va a géɗ man wuɗi ga azɓai.

³¹ A Zhiklè, Bab Bi Yèsu, man ta slébèrdèʼa a mèdèp, a suna, i tsakala ma azɓai.

³² Te Damas gomna Bi Arétas a woya man a ngsyè,

³³ a ta bezdekay auda a nvakavar te gadagar, a ta viyè a hai a dergai, a i mbel ga te ri na.