2 Corinthians 10 - Ma Zhiklè

Paul a njè ma a gèɗ mizlinè nèngaʼa

¹ Iyè, Paul, i bid kinè a ri ga a ndav nlüɓekwaʼa, a maya man amba te Kristi. Aman i a sam kinè, i gi huyo kokoʼa; aman i dra a sam kinè, i gèɗè a wuɗai.

² I tsa kinè rai, kin fay a gèɗ ɓai, aman i dè gèɗè a wuɗai, man i do do a sam kinè. I gi hérèʼa, i slaha a i gi a wuɗai a sam tengaʼa man ta rka nga ara ndohi man ta jèjèr ntétékè ta.

³ Ko nga tʼherkeda haha dai, nga gi var a ndohi herkeda ka ɓai.

⁴ Aman skwi var man nga gi var a vna, skwi ndo ka ɓai, aman wuɗi te ri Zhiklè, man a gedassa skwi nzalaʼa aussa.

⁵ Nga gédèshè skwi man amba man ta huro amba man a woya a gre gèɗ na a sam nshin Zhiklè, a nga gseda nhér gèɗ ndohi tèlèba a hai a ta fi gèɗ a ma Kristi.

⁶ Te deɓaʼa man kin fi gèɗ a Zhiklè zura ma, nga da gi kita a géɗ ngi mèdègèɗ tèlèba.

⁷ Kinè, kin dèl skwi ma a deɓa genè! Ndo man a huro, iyè a Kristi, da suna, nga a Kristi lèmèlèmè.

⁸ Ko i jégèr va a vaʼa a géɗ wuɗi-bi nga man Zhiklè a va nga, aman nga gi a kin grè a ma ma – nga gedas kinè ka ɓai — i gi hori azɓai.

⁹ I woya man i pra kinè zlau a va a ɗèlèwèr ga ɓai.

¹⁰ Ta gaɗa: Te ɗèlèwèrhi nengaʼa a gèɗè a wuɗai; aman te dèɓaʼa man a sam nga, a geɗ ngeɗe man wuɗi a te pa ɓai.

¹¹ Ndo man a gèɗ aranta, da suna, nga gèɗè te ɗèlèwèr man nga dra a sam kinè lèmèlèmè ara man nga zhè a sam kinè.

¹² Nga gi zlau aman nga ngré va nga a va ndohi man ta slébèrdè va ta a ri ta, a nga lèmdè va nga a tengaʼa. Ta rzla, a géɗ man ta ɗèl skwi ta a ri ta, a ta lèmdè va ta a va tengaʼa.

¹³ Aman nga woy a nga jégèr va kumba azɓai, sèi ara sam mizlinè man Zhiklè a ɗèlè nga a rai, a va nga, a nga ndikè a sam kinè ha.

¹⁴ Nga ngelka na di ɓai; nga ndika a sam kinè. Aman a vava, nga ndika a sam kinè a ma mbelaʼa te Kristi ma.

¹⁵ Nga jégèr va a géɗ mizlinè ndo ngiɗè azɓai; aman nga zhèrè te ndav, ara man ncè-a-ndav kinè a grè a ma ma, kin slebarde nga ba, ara mizlinè man nga gau.

¹⁶ Nga woya a nga njè ta ma mbelaʼa a tengaʼa ba te deɓ kokwar kinè; aman nga jégèr va azɓai a géɗ mizlinè man ndo ngiɗè ntila ma.

¹⁷ Aman ndo man a jégèr Va, da dzugor va a géɗ Bai Yèsu.

¹⁸ Ndo amba a géɗ man a slébèrdè va na a ri na ka ɓai; aman a géɗ man Zhiklè a slébèr-dèʼa.