2 Corinthians 1 - Ma Zhiklè

Mbalai

¹ Paul, ndo sak Kristi Yèsu, ara man Zhiklè a woyaʼa, a nda Timothée, kramam nga, a sam mpi ndohi Zhiklè te kokwar Corinthe, a sam ndohi Zhiklè gedam te kokwar Achaie teleba:

² Pombai da zhe a nda kine, a gumai te Zhiklè, Bab nga, a Bai Yèsu Kristi!

Paul a shid gèɗ

³ Nga shid gèɗ a Zhiklè, Bab Bi nga Yèsu Kristi, Bab man ndo a sia te va, Zhiklè mbid ndo te skwi tèlèba,

⁴ man a bid nga te skwi nga tèlèba man wuɗitpa, a géɗ man nga slaha a nga bid ta tengahiaʼa ngiɗè te deɓaʼa ba, te skwi tengaʼa tsaɗ tsaɗ man wuɗitpa, a skwi man Zhiklè a bid nga a vna.

⁵ Aman ara man nga ngots matakwan Kristi kumba, nga ngots skwi mbid nga kumba ba te Kristi.

⁶ Aman ko nga ngots matakwan, nga ngotso a skwi mbid kinè, a skwi mʼmbel kinè. Skwi mbid nga, skwi mbid kinè; a kin ngècè wuɗai, aman kin cè matakwan te nzhèr skwia dai, matakwan lèmèlèmè ara matakwan nga.

⁷ Skwi man nga zhèrè te ndav a géɗ kinè, nga suna, a vava; nga suna, ara man kin ngots matakwan ba, kin da ngècè skwi mbid kinè ba.

⁸ Dalahimam nga, nga woya aman kin sun matakwan man a ga nga te kokwar Asie. Ta ga nga skwi mwuɗitpa, man a fena wuɗi nga, a nga gu zlau a géɗ nshèffè nga, a nga huro, nga da metsi nga.

⁹ Aman skwi haha a ga nga, a géɗ man nga fi gèɗ a wuɗi nga genè ka ɓai, aman a Zhiklè, man a slambaɗde ta ndohi mʼmetsaʼa,

¹⁰ man a mbel nga te mʼmetsi mbiaʼa arsa, a di a mbel nga zaʼa. Nga huro, a di a pats ngiɗè ba, a da mbelka nga auda.

¹¹ Ntsi ri kinè a géɗ nga ba a da takaha nga, a ndohi kumba ta da shid gèɗ, a géɗ pombi man Zhiklè a va nga.

Paul a n ngatsa civèɗ nde Corinthe ɓai

¹² Nga jégèr va a géɗ skwi haha: Mèzhèɓ ndav nga a gi malwuɗai, aman nga nza a maya te nshèffè nga tʼherkeda, holholaʼa a sam kinè: ndav nkezlaʼa, a ndav nzuraʼa, ara Zhiklè man a woyaʼa, a maya ndo ka ɓai, aman a pombi Zhiklè.

¹³ Nga winda kinè skwi ngiɗè azɓai, sèi skwi man kin jengèʼa, kin shinèʼa. Aman i zhèrè te ndav, kin shindè tèlè di ba,

¹⁴ ara man antanta kin sun nga kètè kètè ma, a kin jégèr va a géɗ nga, lèmèlèmè ara man nga jégèr va a géɗ kinè a pats Bi nga Yèsu.

¹⁵ Nshèlèkuraʼa i gaɗa i dè a sam kinè dai, a kin ngècè skwi mbelaʼa zaʼa.

¹⁶ Te deɓaʼa i dè a kokwar Macédo-ine, te Macéɗoine i minè a deɓa a sam kinè, a kin da feday ma a kokwar Judée.

¹⁷ Man i hur arsa, i gu fali ɗè? Aman i herda ma a hai, i hur ara fali ndo ɗè? I pu ma cèw dè?

¹⁸ Zhiklè a gi malwuɗai, aman nga pi ma cèw azɓai.

¹⁹ Aman kra Zhiklè, Kristi Yèsu, man nga a Timothée a Silvain nga njè kinè, ndzakaɓa a halau a aʼai ɓai; aman te nengaʼa sèi halau genè.

²⁰ Aman Yèsu, nengaʼa ‘halau’ a géɗ mpèsl ri Zhiklè tèlèba. Gar haha nga ba, aman nga gèɗè ‘Amen’ te Yèsu Kristi, nga slébèrdè Zhiklè a vna.

²¹ Zhiklè, nengaʼa a ngu aman nga nzi taraʼa a nda kinè te Kristi; nengaʼa a nkezla ndav nga,

²² a ndèda ndav nga a Mèzhèɓ nkezlaʼa, te di skwi man a da va nga.

²³ I cè Zhiklè a malwuɗi ga – aman i da tsakalma, da zedyè – I gaɗ i woya a i dè a deɓa a kokwar Corinthe ɓai, te man i woya a i ga kinè matakwan ɓai.

²⁴ Aman nga ara bihi ncè-a-ndav kinè ka ɓai. Aman nga, nga ndohi man nga mba a mwuffe a nda kinè, a kinè man kin zlatsa te ncè-a-ndav.