1 Timothy 5 - Ma Zhiklè

Nʼnzi a va, ngiɗè a ngiɗè

¹ Ka gaɗa na a wuɗi a ndo nhalaʼa ɓai; rka ara bab ngaya! Golahai, rka ta ara kramamhi ngaya!

² Madangwozhai, rka ta ara mamhi ngaya! Dalahai, rka ta ara demamhi ngaya, ara ndo nlèɓèslèa.

³ Slebarde ta ngwozi mazai, tengaʼa man ta te diki a vava.

⁴ Aman wudahi ta, man wud wuda ta ta zhè, sèi ta lèɓèslè te gi ta nshèlèkuraʼa, a ta menda na skwi man bab ta a mam ta a takaha ta a vna, a deɓa arsa. Aranta ambaha Zhiklè.

⁵ Aman nengaʼa ngwoz diki a vava, man a nza a géɗ na, a pi ndav a Zhiklè, a tsi rai, a gi mbuh mbuh, a vaɗ a pats.

⁶ Aman ngwoz dikai, man a gi ntétékè, a wuffè a géɗ ntétékè, mʼmetsaʼa, ko a zhè a nshèffè.

⁷ Gaɗa ta skwi haha, a ta ngècè mali a sam ta azɓai.

⁸ Aman ndo man a wèr di a gwoli na azɓai, holholaʼa a ndohi gi na, a cèkèlma a géɗ ncè-a-ndav, ambaɓai a fena ndo man nca a ndav ɓai.

⁹ Nzlembaɗ ngwoz mazai, ta windè a ɗèlèwèr, sèi man a ndikè mvi 60. Sèi man baki na man a mets na, na staɗgenè, a ndohi ta slébèr-dèʼa a géɗ mizlinè nengaʼa man amba,

¹⁰ a gre ta wudahai, a pi mbrokihi a gai, a pana ta sak a ndohi Zhiklè, a takaha ta ndohi matakwan, a gi mizlinè man amba tèlèba.

¹¹ Aman ngwozi dikai, man ta ndikè mvi 60 di ɓai, jèke ta! Aman ta da ngeza a ma Yèsu, ta woy a ta ngècè baki ngiɗè,

¹² a ta ngècè kita, a géɗ man ta jèkeda ma man ta gaɗdahi nshèlèkuraʼa.

¹³ Ta gi wudar, ta jèjèr gi te ma te ma, a ta pceda gèɗ ta a pa. Skwi ambaɓi holholaʼa, ta tsi tsaval ambaɓi kumba, a ta kèlè ma cizlèv cizlèvaʼa, a ta gèɗè skwi man agassa ma ta ka ɓai.

¹⁴ Arsa i woya aman ngwozi dikai, man dali ngwozi dai, do do ngwoz, da yu wuda, da ɓer gai, a ta va na civèɗ a Sadan azɓai, man a gi ma a géɗ tengaʼa.

¹⁵ Aman antanta, ndohi ngiɗè ta mende va ta a deɓa, a ta jèjèr Sadan.

¹⁶ Aman ndo Zhiklè ngiɗè, ko nguraʼa, ko ngwoz, man ngwoz mazi te gi na, sèi nengaʼa a ntakaha, mpi ndohi Zhiklè ka ɓai; a mpi ndohi Zhiklè ta slaha ta takaha ta tengahi ngiɗè, man ta ngwozi dikai a vava.

¹⁷ Va-slebarde ta ndohi mɓer ndohi Zhiklè, man ta gi mizlinè zuraʼa, holholaʼa tengahi man ta njè ma Zhiklè, a ta jèngè ta ndohai.

¹⁸ Aman ɗèlèwèr Zhiklè a gaɗa: Ka va na dzala a ma mari man a kizlè dau ɓai! Ndo mizlinè staɗ staɗ tèlèba da ngots skwi ntul na.

¹⁹ Aman ta woy a ta pin ndo mɓer ndohi Zhiklè; ka fu zlembaɗa ɓai, sèi man ndohi malwuɗihi cèw, makar ta zhè.

²⁰ Ndohi man ta gi malai, ngreda ta auda a sam di ndo tèlè, aman ndohi ngiɗè ta gi zlau.

²¹ I gaɗa ka a sam di Zhiklè, a sam Yèsu Kristi, a sam golahi Zhiklè man a par ta, ɓür skwi haha tèlèba, ka por skwi mpèrè ɓai, a ka por ndo te di ɓai!

²² Ka fa na ri a gèɗ ndo tsam tsam ɓai, ka humda va a mali ndo ngiɗè ɓai!

²³ Ɓür ndav ngaya, ka lizha ɓai! Ka su iyam genè ɓai, su barassa kètè ba, a géɗ hwaɗ ngaya, man ka mbelakaɓai.

²⁴ Mali ndohi ngiɗè a ngrédè auda tsam tsam, ga ta dè kita. Aman mali ngiɗè a ngrédè auda sèi te deɓaʼa.

²⁵ Lèmèlèmè mizlinè man amba a ngrédè auda tsam tsam. Mizlinè ngiɗè, man ambaɓai, ta slaha nʼnghédè ɓai.