1 Thessalonians 4 - Ma Zhiklè

Nshèffè man ambaha Zhiklè

¹ A vaʼa, dalahimam nga, nga bid kinè, nga fa kinè ma a gèɗ, te Bai Yèsu: Ara man kin ngotso a sam nga, vo-do arsa, ambaha Zhiklè. Skwi man kin giaʼa, va-gu holholaʼa a ma ma.

² Aman kin sun skwi man nga ngreda kinè te Bai Yèsu.

³ Aman na haha skwi man Zhiklè a woyaʼa: aman ndav kinè nkezla, a kin nzi dra a sam mphömè.

⁴ Staɗ staɗ te ndev kinè da slubordo ngwoz na, a ndav nkezlaʼa, a nlèɓèslè,

⁵ a géɗ ntétékè gada va genè ka ɓai, ara ndohi herkeda man ta sun Zhiklè ɓai.

⁶ Ko staɗ da beza zlawa ɓai, da ngwoda ri a kramam na te skwi haha ɓai. Zhiklè a da pela gèɗ skwi tèlèba, ara man nga gaɗa kinè, a nga ngreda kinè nshèlèkuraʼa.

⁷ Aman Zhiklè a baha nga a sam skwi nlizhè ka ɓai, aman a sam nkezlaʼa.

⁸ Ndo man a kwola ma haha, a kwola ndo ka ɓai, aman a kwola Zhiklè, man a va kinè Mèzhèɓ nengaʼa nkezlaʼa a ndav.

⁹ A géɗ mwoy kramama, nga winda kinè ma azɓai. Zhiklè a senda kinè a ri na, aman kin woy va kinè, ngiɗè da woy ngiɗè, ngiɗè da woy ngiɗè a ndav na.

¹⁰ Kin gi arsa a sam kramamhi tèlèba, man ta zhè te kokwar Macédoine. Aman nga bid kinè, dalahimam nga, aman kin grè a ma ma,

¹¹ a kin gi maya holholaʼa, aman kin nzi tètè, a kin gi mizlinè kinè a ri kinè, ara man nga gaɗa kinè;

¹² a kin nzi a maya a sam di ndohi nte deɓa, kin dzhoɗ skwa te ri ta ɓai.

Ndohi mʼmetsaʼa a ndohi a nshèffè, man Yèsu a shke a deɓa

¹³ Aman nga woy a kin suna, dalahimam nga, a géɗ ndohi man ta bazl ta: kin hur gèɗ zlau ɓai, ara njèkèɗiaʼa man ta zhèr skwi te ndav azɓai.

¹⁴ Aman nga co a ndav, Yèsu a mʼmets na, a nslambaɗkaɗauda zaʼa, lèmèlèmè tengaʼa man ta bazl ta a Yèsu te ndav, Zhiklè a da helka ta a nda nengaʼa.

¹⁵ Aman nga gaɗa kinè ma haha: Nga, man nga zhè a nshèffè, a nga nzi dai ha pats mshkè Bai Yèsu, nga da ngel ta ndohi man ta bazl ta a pa azɓai.

¹⁶ Aman Bai Yèsu a ri na a di a shkèhai te zhiklè, a nguzlai, a nhèzlèwè bigol Zhiklè, a ntsi tolom Zhiklè. A ndohi mbazl ta a Yèsu te ndav, ta da slèmbèɗè nshè-lèkuraʼa.

¹⁷ Te deɓaʼa nga, njèkèɗiaʼa man nga a nshèffè, nga dè a nga humdè va a tengaʼa te va vanai, a nga zli gèɗ a Bai Yèsu tʼhwaɗ giɗfèk. Gar haha, nga da nzi a nda Bai Yèsu pèc pèck.

¹⁸ Va-büd va kinè, ngiɗè a ngiɗè, ngiɗè a ngiɗè, a ma haha.