1 Thessalonians 3 - Ma Zhiklè

¹ Gar haha nga slaha nga ɗishè a ma ma asaɓai. Nga huro, nga da nzi a géɗ nga te kokwar Athènes mènè,

² a nga zlinda kinè Timothée, kramam nga, ndo mizlinè Zhiklè te ma mbelaʼa man a Kristi, aman a va kinè wuɗai, a bid kinè te ncè-a-ndav kinè.

³ Ko staɗ da ngeza ɓai te matakwan haha! Aman kin suna, sèi nga si matakwan ndèzl.

⁴ Te va man nga zhè a sam kinè dai, nga gaɗa kinè: a di nga si matakwan. Te deɓaʼa nga sau, kin suna.

⁵ Gar haha i slaha a i ɗishè a ma ma asaɓai, a i zlindè a sam kinè, aman i cinè ma ncè-a-ndav kinè: ndo mpi ndo a wai a pe kinè a wi ɗè, nga gu mizlinè ambali ɗè?

⁶ Aman antanta Timothée a mshkè a deɓa a sam kinè ma, a ngaɗa nga labar ma kinè man amba, te ncè-a-ndav kinè, te mwoy-ndo kinè, ara man kin hér nga pèc pècèk amba, a mpataka nga a keɗ kinè lèmèlèmè ara mpataka kinè a keɗ nga.

⁷ A géɗ nasa, dalahimam nga, nga ngots skwi mbid nga te matakwan, te skwi ndzi nga. Ncè-a-ndav kinè a bid nga.

⁸ Aman antanta nga wuffè zaʼa, te man kin zlatsa taraʼa te Bai Yèsu.

⁹ Nga slaha nga shid gèɗ a Zhiklè a géɗ kinè a mè, a géɗ mwuffè tèlèba man nga ngots a sam kinè, a sam di Zhiklè.

¹⁰ Nga tsi rai a pats a vaɗ a vata, aman nga slaha nga rka kinè, a nga takaha kinè te skwi man kin ngatsa te ncè-a-ndav kinè di ɓai.

¹¹ Aman Zhiklè, Bab nga, nengaʼa a ri na, a Bi nga Yèsu, da wina nga civèɗ a sam kinè.

¹² Aman kinè, Bai Yèsu da gu aman kin grè a ma ma, a kin gi jèlèlè a ma ma te mwoy-ndo a ndav, ngiɗè a sam ngiɗè, lèmèlèmè ara nga a sam kinè.

¹³ Da nzala ndav kinè, mali da nza a pa ɓai, nkezlaʼa a sam Zhiklè, Bab nga, a sam Bai Yèsu a ndohi nengaʼa tèlèba.