1 Thessalonians 1 - Ma Zhiklè

Mbalai

¹ Paul a Silvain a Timothée, a sam mpi ndohi Zhiklè te Thessalonique, a nzlembaɗ Bab Zhiklè, a Bai Yèsu Kristi: Pombai a gumai da zhè a nda kinè!

Ncè-a-ndav ndohi Thessalonique

² Nga shid gèɗ a Zhiklè pèc pècèk a géɗ kinè tèlèba, a nga hér kinè te ntsi ri nga,

³ a nga hér mizlinè kinè te ncè-a-ndav pèc pècèk, a mizlinè kinè te mwoy-ndo a ndav, ara man kin nzi te nzhèr Bi nga Yèsu Kristi te ndav, a sam Zhiklè, Bab nga.

⁴ Aman kramamhi nga, man Zhiklè a woy kinè: nga suna, kinè ndohi man Zhiklè a mpar kinè.

⁵ Nga njè kinè ma mbelaʼa a ma genè ka ɓai, aman a wuɗi ha, a Mèzhèɓ nkezlaʼa, a nfi gèɗèʼa. Kin suna nga gu arsa a sam kinè, a géɗ kinè.

⁶ A kin lèmdè va kinè a nga, a Bai Yèsu. A kin co ma mbelaʼa te va man matakwan a zhè, a kin wuffa te Mèzhèɓ Zhiklè nkezlaʼa.

⁷ A kin gaʼa a skwi man ndohi ncè-a-ndav te Macédoine a Achaie ta lèmdè va tengaʼa a vna.

⁸ Te kinè ma Bai Yèsu a ndo a ma ma a kokwar Macédoine a Achaie genè ka ɓai, aman labar ma kinè man kin co Zhiklè a ndav, a ndo a sam tèlèba, a nga gèɗè ma ngiɗè a vaʼa asaɓai.

⁹ Ko wawa ngreda a géɗ nga a ri na, ara man nga ngots civèɗ a sam kinè, ara man kin menkaɗa deɓa a sam Zhiklè, te ri vrihai, a kin gi mizlinè Zhiklè nzuraʼa, man a zhè a nshèffè,

¹⁰ a kin zhèr kra nengaʼa te zhiklè, nengaʼa man a slambaɗda te ndev ndohi mʼmetsaʼa; Yèsu, man a mbel nga a sam ndzoan man a di a shkè.