1 John 5 - Ma Zhiklè

Ncè-a-ndav a ngul herkeda

¹ Ndo man a nco a ndav, Yèsu, nengaʼa Kristi, nengaʼa nyaka te Bi Zhiklè. Ara man mwoy Zhiklè man a yaka nga, lèmèlèmè mwoy nengaʼa man Zhiklè a yau.

² Gar haha nga suna, aman nga woy wudahi Zhiklè, nga woy Zhiklè ba, a nga fi gèɗ a ma nkwèr nengaʼa.

³ Na haha mwoy Zhiklè: aman nga fi gèɗ a ma nkwèr nengaʼa. A ma nkwèr nengaʼa, wuɗi a te pa ɓai.

⁴ Ndohi Zhiklè, ko wawa, ta ga a ngul herkeda. A ncè-a-ndav nga, nga gaʼa a ngul herkeda.

⁵ Ngaʼa a ngul herkeda wa? Sèi nengaʼa man a nco a ndav, Yèsu nengaʼa kra Zhiklè.

Ma malwuɗi a géɗ kra Zhiklè

⁶ Yèsu Kristi a mshkè a iyam a Pombaz. A iyam genè ka ɓai, aman a iyam a pombaz. A Mèzhèɓ Zhiklè a gi malwuɗai, te man Mèzhèɓ nengaʼa nzuraʼa.

⁷ Aman skwi makar man ta gi malwuɗai:

⁸ Mè-zhèɓ Zhiklè, iyam, a pombaz. Te makar, ta ara nstaɗ.

⁹ Nga cè ma malwuɗi ndohai. Aman malwuɗi Zhiklè a fenaʼa. Nengaʼa malwuɗi Zhiklè, man a vau a géɗ kra nengaʼa.

¹⁰ Ndo man a nco kra Zhiklè a ndav, a nʼngots malwuɗi te ndav na. Ndo man a cè Bi Zhiklè a ndav na azɓai, a ga Zhiklè a ndo ncèkèlma, te man a nco malwuɗi nengaʼa man a vau a géɗ kra nengaʼa ɓai.

¹¹ Malwuɗi nengaʼa ar haha: Zhiklè a mva nga nshèffè man a ndivè azɓai a mèdèp. A nshèffè aranta a zhè te kra nengaʼa.

¹² Ndo man a ngots kra Zhiklè, a nʼngots nshèffè. Ndo man a ngatsa kra Zhiklè ɓai, a nʼngatsa nshèffè ɓai.

Nshin nshèffè man a ndivè azɓai a mèdèp

¹³ Ma haha i windè kinè, a woy kin suna, kinè man kin co nzlembaɗ kra Zhiklè a ndav, kin ngots nshèffè a mèdèp.

¹⁴ Skwi man nga ngotso, aman nga herda na va a Zhiklè a mwuffe: skwi ko mèmè man nga jhèɗè a tsi rai ara ndav nengaʼa man a woyaʼa, a tsena ma nga.

¹⁵ Lèmèlèmè ara man nga suna, a tsenaʼa, aman nga tsi rai, lèmèlèmè nga suna, skwi man nga dzhoɗo, nga co te ri nengaʼa.

¹⁶ Ndo man a rka, kramam nengaʼa a gi malai, mali mʼmetsi ka ɓai, da tsu ri a Zhiklè, gar haha a di a va na nshèffè a nengaʼa man a gu malai, mali mʼmetsi ka ɓai. Mali mʼmetsai a zhè, a géɗ nengaʼa i gèɗè azɓai, aman ndo da tsu rai.

¹⁷ Skwi man zura ka ɓi tèlèba, nengaʼa malai. Aman mali ngiɗè a zhè, nengaʼa mali mʼmetsi ka ɓai.

¹⁸ Nga suna, ndo man a yaka te Bi Zhiklè a gi mali azɓai. Aman ndo man a yaka te Bi Zhiklè, Zhiklè a ɓirèʼa, a nengaʼa man ambaɓai a da lama na azɓai.

¹⁹ Nga suna, nga ndohi Bi Zhiklè, a herkeda tèlèba a zhè te ri wuɗi nengaʼa man ambaɓai.

²⁰ Aman nga suna, kra Zhiklè a mshkè, a mva nga maya, aman nga sun nengaʼa, man nzuraʼa a vava. Nga te nengaʼa man nzuraʼa a vava, te Yèsu Kristi, kra nengaʼa. Nengaʼa Zhiklè nzuraʼa, nengaʼa nshèffè a mèdèp.

²¹ Wudahi ga, va-ɓür va kinè a sam mbèh skwi tèlèba!