1 John 1 - Ma Zhiklè

Ma nshèffè

¹ Nasa skwi man a zhe te nhinkaɗ na, a géɗ ma nshèffè, man nga tsenaʼa, man nga rka a di nga, man nga wora, man nga lama na a ri nga.

² A nshèffè a ngudko va a dai, a nga rkaʼa, a nga gi malwuɗi nengaʼa, a nga njè kinè nshèffè mbiaʼa man a ndivè azɓai, a mèdèp, man a zhè a sam Bab nga, a ngudoko nga va a dai.

³ Skwi man nga rka ma, nga tsenaʼa, nga njè kinè, aman kinè ba kin hümdè a nda nga; a nga, nga hümdè a nda Bab nga, a nda kra nengaʼa, Yèsu Kristi.

⁴ Ma haha nga winda kinè, aman mwuffè nga a gi jèlèlèʼa.

Zhiklè, skwi nhél sam

⁵ Ma haha, nga tsenaʼa a sam Yèsu, a nga njè kinè: Zhiklè, skwi nhél sam, ruva az a sam na ɓai.

⁶ Aman nga gaɗa, nga humda a nengaʼa, a nga dè te ruva genè, nga cèkèlma, nga jèjèr ma nzuraʼa ka ɓai.

⁷ Aman nga dè te ndev sam nhelaʼa, lèmèlèmè ara nengaʼa ba te ndev sam nhelaʼa, nga humda, ngiɗè a ngiɗè. A Pombaz Yèsu, kra nengaʼa, a pan nga te mali staɗ staɗ tèlèba.

⁸ Aman nga gaɗa, mali nga azɓai, nga pi va nga a wai a ri nga, a ma nzuraʼa a te ndav nga ɓai.

⁹ Aman nga ngreda mali nga auda, nengaʼa nlèɓèslèa a nzuraʼa, aman a pra nga mali nga, a pan nga te skwi man nzura ka ɓai tèlèba.

¹⁰ Aman nga gaɗa, nga ga mali ɓai, nga ga Zhiklè a ndo ncèkèlma, ma nengaʼa a te ndav nga ɓai.