1 Corinthians 16 - Ma Zhiklè

Mɓicè skwai, mvi skwi a ndohi Zhiklè

¹ A géɗ skwi man ta cèkèlèʼa, a ta takaha ta ndohi Zhiklè ngiɗè a vna, i gaɗa kinè: Va-gu lèmèlèmè ara man i gaɗa ta mpi ndohi Zhiklè te Galate.

² Pèc pècèk, a pats nshèlèkuraʼa te luma, ndo staɗ staɗ da feda skwi a hai, da ɓica skwi a sam na, ara man a slaha. Te deɓaʼa, man i do do a sam kinè ma, skwi ntsakala ma.

³ Aman i do do a sam kinè ma, i woya man i zlinde ta ndohi man kin sla ta ndohi nlèɓèslèa a ɗèlèwèr, aman ta da skwi man kin vau, a kokwar Jérusalem.

⁴ Aman kin woya aman i ba i dè a pa, nga dè a nda tengaʼa.

Nhér ndè nshèwèlè a Corinthe

⁵ I woy a i dè a sam kinè, pats man i tsa gèɗ ga te kokwar Macédoine ma. I woy a i bizhè a kokwar Macédoine dai.

⁶ Aman kin woyaʼa, i da nzi a sam kinè, ko a via. Te deɓaʼa kin da feday ma a sam man i da dè a pa.

⁷ Aman i bizhè a pa antanta, i woy a i dè a sam kinè di azɓai, te man i huro, i da shin va a sam kinè kètè, man Zhiklè a vay civèɗ.

⁸ I nzi te Ephèse, ha pats Pentecôte.

⁹ Civèɗ mwinèa a ma ga, a géɗ mizlinè mbiaʼa, ko ndohi mayamhi ta zhè a vata.

¹⁰ Aman Timothée a dè, va-gu maya, aman a slaha a nʼnzi a sam kinè a zlau ka ɓai. Aman nengaʼa ba a gi mizlinè Bai Yèsu, lèmèlèmè ara ga.

¹¹ Kin rka ara ndo ambali ɓai! Va-fedko na ma a gumai, aman a shkè a sam ga. Nga a kramamhi ga, nga zhèrèʼa.

¹² A géɗ Apollos, kramam nga, kin suna, i fa na ma a gèɗ kumba, aman a dè a sam kinè a nda kramamhi ngiɗè. Aman nengaʼa a woya a ndè antanta azɓai; aman a di a dè, a zhèr pats ngiɗè dai.

Mbalai, a mpshè ma

¹³ Va-nza a dai, va-nza taraʼa te ncè-a-ndav, va-nza ara ngurhai, va-nzala va kinè!

¹⁴ Va-gu aman skwi kinè tèlèba a gi te mwoy-ndo a ndav.

¹⁵ I fa kinè ma a gèɗ, dalahimam ga: Kin sun gi Etienne, tengahi tsuvomhi te kokwar Achaie, a ta ge ta a ndohi ntakaha ta ndohi Zhiklè.

¹⁶ Kinè ba, va-manda gèɗ a hai a sam ndohi ar haha, a sam tengahi tèlèba man ta mbi a mizlinè, a ta ngeza te pa.

¹⁷ I wuffè aman Etienne a Fortunatus a Achaicus ta shkè. Aman i ngats kinè ɓai, i ngots tengaʼa te di man a kinè.

¹⁸ Ndav ga mʼmanahi ma, a ndav kinè ba. Va-slebarde ta ndohi arsa!

¹⁹ Mpi ndohi Zhiklè te Asie ta ga kinè mbalai. Aquilas a Priscille ta ga kinè mbali kumba te Bai Yèsu, a ndohi Zhiklè tèlèba te gi ta.

²⁰ Kramamhi tèlèba ta ga kinè mbalai. Va-gu mbalai, ngiɗè a ngiɗè, a nkèlèw ri a daʼai ndohi Zhiklè!

²¹ Ma haha, mbali ga, iyè Paul, man i Windo a ri ga.

²² Ndo man a woya Bai Yèsu te ndav ɓai, da phomda! Bai Yèsu, washkè!

²³ Pombi Bi Zhiklè da zhè a nda kinè!

²⁴ I woy kinè a ndav ga tèlèba te Kristi Yèsu!