1 Corinthians 15 - Ma Zhiklè

Nslambaɗkaɗ Kristi auda te mʼmetsai

¹ Dalahimam ga, i hodko kinè ma mbelaʼa a gèɗ. Ma mbelaʼa man i njè kinè, a kin co a ndav, te nengaʼa kin nza,

² te nengaʼa kin mbel kinè, man kin gshèʼa a ri cèw, ara man i njè kinè; man ɓai, ncè-a-ndav kinè skwi ambali genè.

³ Skwi man i njè kinè nshèlèkuraʼa, ara man iyè ba i ngotso: Kristi a mʼmets na a géɗ mali nga, ara ɗèlèwèr Zhiklè a gaɗa;

⁴ ta raʼa a vèvèɗ. Aman te mʼmèn mamakaraʼa Zhiklè a nslambaɗda, ara ɗèlèwèr a gaɗa;

⁵ te deɓaʼa Pierre, a tengahia 12, ta rkaʼa.

⁶ Te deɓaʼa kramamhi te Kristi a fena 500 ta rkaʼa, a sam staɗ; tengahi mba man ta nzi a nshèffè dai a patsna ba, matrhiaʼa ta mets ta.

⁷ Te deɓaʼa Jacques a nrkaʼa, te deɓaʼa ndohi sak tèlèba ta rkaʼa.

⁸ Te deɓ tengaʼa tèlèba, i ba i rkaʼa, iyè man Zhiklè a yiyè a fènègèɗ.

⁹ I ntabawaʼa te va ndohi sak Yèsu, iyè amba man ta bahayè ndo sak Yèsu ɓai, a géɗ man i paraha ta mpi ndohi Zhiklè.

¹⁰ Aman te pombi Zhiklè, iyè ara nʼnzi ga antanta. Pombi nengaʼa a gu a sam ga ambali ka ɓai. I gu mizlinè a fena tengahia tèlèba. Aman iyè ka ɓai, aman pombi Zhiklè man a zhè a sam ga.

¹¹ Aman ko tengaʼa, ko iyè: nga njè ma arsa, a kin co a ndav arsa.

Nslambaɗkaɗ ndohi mʼmetsa a

¹² Aman nga njè Kristi, ara man Zhiklè a slambaɗda te ndev ndohi mʼmetsaʼa, tengahia ngiɗè te ndev kinè ta gaɗa: nslambaɗkaɗauda te ndev ndohi mʼmetsaʼa azɓai èhèmè?

¹³ Aman agassa a vava, Kristi ba a nslambaɗa ɓai.

¹⁴ Aman Zhiklè a nslambaɗda Kristi ɓai, njè-ma nga skwi ambalai, ncè-a-ndav kinè ba, skwi ambalai.

¹⁵ Aman nga gi malwuɗi Zhiklè, ara man a slambaɗda Kristi te mʼmetsai, ndèkèm a nslambaɗda ɓai, a ndohi mʼmetsaʼa ta slambaɗkaɗauda ɓai, ar ta da ngats nga a ndohi malwuɗihi ncè-kèlma a géɗ Zhiklè.

¹⁶ Aman ndohi mʼmetsaʼa ta slambaɗkaɗauda ɓai, Kristi a nslambaɗkaɗauda ɓai lèmèlèmè.

¹⁷ Aman Kristi a nslambaɗkaɗauda ɓai, ncè-a-ndav kinè skwi ambalai, kinè tʼhwaɗ mali genè.

¹⁸ Man ar haha, ndohi man ta bazl ta te Kristi, ta za mènè.

¹⁹ Aman nga zhèr Kristi te ndav, te nshèffè nga a géɗ herkeda haha genè, nga mbelawhi holholaʼa, a fena ndohi ngiɗè tèlèba.

²⁰ Aman antanta Kristi a nslambaɗkaɗauda te ndev ndohi mʼmetsaʼa, nʼngaʼa a tsuvom ndohi mʼmetsaʼa.

²¹ Ara man mʼmetsai a mshkè, a géɗ ndo staɗ, lèmèlèmè nslambaɗkaɗauda te ndev ndohi mʼmetsaʼa, a mshkè, a géɗ ndo staɗ.

²² Ara man ta bazl ta tèlèba te Adam, lèmèlèmè ta ngècè nshèffè tèlèba te Kristi.

²³ Aman staɗ staɗ, ngiɗè te deɓ ngiɗè, ngiɗè te deɓ ngiɗè: ndo nshèlèkuraʼa, Kristi; te deɓaʼa, a pats man a shkè a deɓa, ndohi man ta a Kristi.

²⁴ Te deɓaʼa ndikèma skwi tèlèba, aman a va na kokwar-Bi a ri a bab na, a wusheda bihai, wuɗi-bai a wuɗi tèlèba.

²⁵ A woy Kristi a gi bai, ha Zhiklè a pe ta mayamhi tèlèba a hwaɗ sak nengaʼa.

²⁶ Mayam, man a gédèshè te deɓ tèlèba, mʼmetsai.

²⁷ Aman ɗèlèwèr Zhiklè a gaɗa: Zhiklè a mpeda skwi tèlèba a hwaɗ sak nengaʼa. Aman a gaɗa: Skwi tèlèba tʼhwaɗaʼa, a ngredèʼa, ara man njèkè staɗ, nengaʼa man a mva na tèlèba a hwaɗ sak na.

²⁸ Aman skwi tèlèba tʼhwaɗ sak na, ko kra ba, te ri nengaʼa man a mva na tèlèba a hwaɗ sak na. Te deɓaʼa Bi Zhiklè a géɗ skwi tèlèba, te skwi tèlèba.

²⁹ Man arsa ka ɓai, ndohi man ta gi baptême a géɗ ndohi mʼmetsaʼa ta gi mè? Aman ndohi mʼmetsaʼa ta slèmbèɗè auda azɓai, ta ga ta baptême a géɗ ndohi mʼmetsaʼa èhèmè?

³⁰ Nga te ri mʼmetsi pèc pècèk èhèmè?

³¹ Pèc pècèk i tʼhwaɗ ri mʼmetsai; i ngredèʼa, ara man i ngots skwi njégèr va a géɗ kinè, dalaimam ga, te Kristi, Bi nga.

³² Aman nga huro ara ndohi genè, ar nga bozl va a skwi dak te Ephèse ɗè? Aman agassa ndohi mʼmetsaʼa ta slèmbèɗè azɓai, ar nga gèɗèʼa: ngo-ndokoya, ngo-sokoya, aman a di nga metsi nga!

³³ Ndo da pe kinè a wi ɓai: Mandalahi ambaɓihiaʼa ta gedassa maya mbelaʼa.

³⁴ Va-ciɗa di zuraʼa, kin gu mali ɓai! Aman matrhiaʼa ta sun Zhiklè ɓai. I gaɗa kinè ma haha, aman i pa kinè hori a dai.

Ara man nga slèmbèɗè auda te mʼmetsai

³⁵ Aman ndo ngiɗè a gaɗa: Nslambaɗkaɗ ndohi mʼmetsaʼa, ara mè? Ta shkè auda, ta ara mè?

³⁶ Nrzla-va! Skwi man ka zlekau, dimaʼa a shkè auda azɓai, sèi a husl na.

³⁷ Skwi man ka zlekau, ka zleki gada azɓai, sèi tsera, ko dau, ko tser skwi mèmè.

³⁸ Aman Zhiklè a va na va ara ndav nengaʼa man a woyaʼa, a va nengaʼa tsaɗ tsaɗ, ara tser na.

³⁹ Zluèɗ tèlèba, zluèɗ staɗgenè ka ɓai, aman zluèɗ va ndo tsaɗ, zluèɗ skwi ndzham tsaɗ, zluèɗ ɗiakihi tsaɗ, zluèɗ klèfihi tsaɗ.

⁴⁰ Va-hi te zhiklè te géɗèʼa, a va-hi ndohi tʼherkeda, tsaɗ tsaɗ. Aman nʼnjèl va te zhiklè tsaɗ, nʼnjèl va tʼherkeda tsaɗ.

⁴¹ Nsi di pats tsaɗ, nsi di kia tsaɗ, nsi di bantihi tsaɗ; ko bantihi ba, ngiɗè a si di lèmèlèmè ara ngiɗè azɓai.

⁴² Lèmèlèmè nslambaɗkaɗauda te ndev ndohi mʼmetsaʼa. Ta zleki man a huslè, a slèmbèɗè nhusl ɓai.

⁴³ Ta zleki man nʼnjèl na azɓai wuɗi nʼazɓai, a slèmbèɗè, nʼnjèl na zhè, wuɗi na a zhè ma.

⁴⁴ Ta zleki gada va ndo, a slèmbèɗè, va Mèzhèɓ. Aman va ndo herkeda a zhè, va Mèzhèɓ ba a zhè.

⁴⁵ Ara man ta Windo: Adam, ndo nshèlè-kuraʼa a gu a ndo, a nshèffè te ndav. A Adam man a deɓa a gu a Mèzhèɓ, man a vi nshèffè.

⁴⁶ Va nshèlèkuraʼa, va Mèzhèɓ ka ɓai, va herkeda. Va Mèzhèɓ a shkè te deɓaʼa.

⁴⁷ Ndo nshèlèkuraʼa a mshkè tʼherkeda, skwi herkeda. Ndo man a shkè te deɓaʼa, skwi zhiklè.

⁴⁸ Ara man ndo nʼngaʼa a mberfenèk, lèmèlèmè ndohi tèlèba ta mberfenèk. Lèmèlèmè ndohi zhiklè ta da gi ara ndo te zhiklè.

⁴⁹ Ara man nga ngots mèzhèɓ skwi herkeda a va, lèmèlèmè nga da ngècè mèzhèɓ skwi zhiklè a va.

⁵⁰ Aman i gaɗa kinè, dalahimam ga, ndo a slaha a ngècè kokwar-Bi Zhiklè a va nengaʼa haha ɓai. Skwi man a huslè, a slaha a ndi a skwi man a huslè azɓi ɓai.

⁵¹ Na haha i gaɗa kinè skwi man nʼnghedaʼa: Nga metsi nga tèlèba azɓai; aman va nga a da ngwèdèʼa tèlèba,

⁵² tsam tsam, njiɗè mpcèkodai, man tolom man a deɓa a da tsai. Aman ta tsi tolom, ndohi mʼmetsaʼa ta da slèmbèɗè, a va man a huslè azɓai, a va nga a ngwèd na.

⁵³ Aman skwi man a huslè haha, sèi a feda skwi man a huslè azɓai, a va. A skwi man a metsi haha, sèi a feda skwi man a metsi azɓai, a va.

⁵⁴ Aman skwi man a huslè haha a feda skwi man a huslè azɓai a va ma, skwi mʼmetsi haha a feda skwi man a metsi azɓai a va ma, te deɓaʼa nʼngaʼa ara ɗèlèwèr Zhiklè man a gaɗa:

⁵⁵ Ngul mʼmetsai a ngerɗa mʼmetsi a ma ma. Mʼmetsai, ngul ngaya tema? Mʼmetsai, skwi ntizhè ngaya tema?

⁵⁶ Aman wuɗi mʼmetsai, malai. Wuɗi malai, ma kita Zhiklè.

⁵⁷ Aman nga shid gèɗ a Zhiklè, man a va nga, a nga gi a ngul skwai te Bi nga Yèsu Kristi.

⁵⁸ Gar haha, dalahimam ga, va-nze taraʼa, kin gudzu ɓai, va-gra te mizlinè Bai Yésu pèc pècèk, te man kin suna, mizlinè kinè a gi ambali te Bai Yèsu azɓai.