1 Corinthians 14 - Ma Zhiklè

Ngèɗè nèʼèn, nhèdè ma

¹ Va-woy mwoy-ndo a ndav! Aman va-woy skwi nte Mèzhèɓ Zhiklè ba, aman kin slaha a kin hèdè ma.

² Ndo man a gèɗè nèʼèn tsaɗ tsaɗ, a gèɗè a ndo ka ɓai, aman a Zhiklè. Ndo ngiɗè a cinè ma nengaʼa azɓai, te man a gèɗè skwi man nʼngheda te Mèzhèɓ.

³ Ndo man a hèd ma, a ngreda ta ndohai, a slebda ta, a senda ta, a bid ta.

⁴ Ndo man a gèɗè nèʼèn tsaɗ tsaɗ, a gi aman géɗ va na a grè; aman ndo man a hèd ma, a gi aman mpi ndohi Zhiklè ta grè a ma ma.

⁵ I woya te ndav ga, aman kin tèlèba kin slaha a kin gèɗè nèʼèn tsaɗ tsaɗ. Aman i skwi man i woy holholaʼa, kin slaha kin hèd ma. Ndo man a hèd ma, a fena ndo man a gèɗè nèʼèn tsaɗ tsaɗ, sèi man agassa ndo nʼngwèdè nèʼèn tsaɗ tsaɗ a ngrédè ma nengaʼa, aman mpi ndohi Zhiklè ta grè a ma ma a vna.

⁶ Anai, dalahimam ga, aman i dè a sam kinè, a i gaɗa kinè a ngèɗè nèʼèn tsaɗ, a i ngreda kinè ma man nʼnghedaʼa, a ma maya, a ma nhodko ma, a ma njè-ma azɓai, i takaha kinè a mè?

⁷ Lèmèlèmè a sam skwi man a slhè, man nshèffè a te pa ɓai: ara shingelèk, ara ganzavar. Man daʼai ta tsaɗ tsaɗ ka ɓai, ndo a sun ko tema, gar ta vèɗè shingelèk, gar ta tsi ganzavar?

⁸ Aman tolom a slhe ɓai ɗuv-ɗuvaʼa, ntil va na a ndè var wa?

⁹ Lèmèlèmè kinè, aman kin gèɗè nèʼèn tsaɗ num-numaʼa, tsaraya ka ɓai, nslaha a ntsena ngèɗè kinè wa? Ngèɗè skwaʼa ambalai!

¹⁰ Ma tsaɗ tsaɗ a zhè tʼherkeda, aman skwi ngiɗè azɓai, man daʼai na azɓai.

¹¹ Aman i sun ngèɗè ɓai, ndo ngiɗè a slaha a ncinè azɓai, a i slaha a i cinè ma ndo ngiɗè azɓai.

¹² Lèmèlèmè kinè: Aman kin woy skwi nte Mèzhèɓ, va-gu maya, aman kin ngècè kumba, aman mpi ndohi Zhiklè ta grè a ma ma.

¹³ Gar haha ndo man a gèɗè nèʼèn tsaɗ, da tsu rai, aman a slaha a ngwèdè ba.

¹⁴ Aman i tsi rai a nèʼèn tsaɗ, Mèzhèɓ ga a tsi rai, a shkè te nhér gèɗ ka ɓai.

¹⁵ Ani kè? I woya man i tsi ri te Mèzhèɓ, aman i woya man i tsi rai, a ndohi ta cinè ba. I woya man i sli dimèsh te Mèzhèɓ, aman i woya man ta cinè dimèsh ga ba.

¹⁶ Aman ka slébèrdè Zhiklè a ntsi ri te Mèzhèɓ, ndo man a nza a pa a ntsena ɓai, a slaha a ngi ‘Amen’ a géɗ man ka shüd gèɗ dè? A sun skwi man ka gèɗè ɓai.

¹⁷ Ka shüd gèɗ amba amba; aman ndo ngiɗè a grè a ma ma a vna azɓai.

¹⁸ I shid gèɗ a Zhiklè: i fen kinè tèlèba a ngèɗè nèʼèn tsaɗ tsaɗ.

¹⁹ Aman te ndav ga nfena man i gèɗè ma zlam a sam mpi ndohi Zhiklè, a i senda ta ndohi ngiɗè a vna, a ta cinèʼa, a géɗ ma 10.000 te ngèɗè nèʼèn tsaɗ.

²⁰ Dalahimam ga, kin ndeda va kinè a wudahi a sam mʼmbeɗi a ma ɓai!

²¹ Aman va-ndeda va kinè a wudahai a sam skwi ambaɓiaʼa! A sam skwi man kin mbeɗi a pa, va-goɗ ara ndohi ngraʼa! Ta Windo te ma kita: I woya man i gèɗè nèʼèn tsaɗ, a i gaɗa ta a daʼai tsaɗ a ndohi haha. Ko ar haha ta cinè ma ga azɓai, Bi Zhiklè a gaɗa.

²² Gar haha ngèɗè nèʼèn tsaɗ, skwi malwuɗi a sam ndohi nco Yèsu a ndav ka ɓai, aman a sam ndohi man ta ca a ndav ɓai. Nhèd ma, skwi malwuɗi a sam ndohi man ta ca a ndav bi ka ɓai, aman a sam ndohi nco a ndav.

²³ Aman mpi ndohi Zhiklè tèlèba ta ɓiceda va a sam nstaɗ, te deɓaʼa tèlèba ta gèɗè nèʼèn tsaɗ, ndohi man ta sun ɓai, a ndohi man ta ca a ndav ɓai a ta shkè a pa, ta gèɗè azɓi ɗè: skwi ngiɗè a ga kinè!

²⁴ Aman tèlèba, man ta hèd ma, ndo man a nca a ndav ɓai a ndo man a sun ɓai a ta shkè a pa, ta winè na dai a géɗ mali na.

²⁵ Skwi man nʼngheda te ndav na a ngredkoɗauda, a nengaʼa a dè kèlèhai a deɓ sak tengaʼa, a tsi ri a Zhiklè, a gaɗa: Zhiklè a zhè te ndev kinè a vava!

Ntil skwi tèlè te gi Zhiklè

²⁶ Ani kè, dalahimam ga? Aman kin ɓicè va, ndo ngiɗè da ngots dimèsh, ngiɗè njè-ma, ngiɗè nʼngrédè skwi auda, ngiɗè ngèɗè nèʼèn tsaɗ, ngiɗè nʼngwèdè ngèɗè sa. Va-gu tèlèba aman kin grè a ma ma!

²⁷ Man ta ngwèdè nèʼèn tsaɗ, sèi ndohi cèw man makar man ta gèɗèʼa, a ndo staɗ da ngwoda a deɓa.

²⁸ Aman ndo nʼngwèdèʼa azɓai, ndo ngèɗè nèʼèn tsaɗ sèi da nza tètè te va mpi ndohi Zhiklè, da goɗ ma a géɗ na a sam Bi Zhiklè.

²⁹ Aman ndohi nhèd ma, ko cèw, ko makar, va-va ta civèɗ man ta gèɗèʼa. A ndohi ngiɗè ta jkedè ma ta.

³⁰ Aman ndo ngiɗè man a nzi a pa a ngots skwi man a ngréɗè auda te ri Zhiklè, ndo nshelèkuraʼa da nze dai.

³¹ Kin slaha kin hèd ma tèlèba, aman sèi a nfina a nfina, aman tèlèba ta shindèʼa, a ta ngècè maya.

³² Sèi ndohi nhadka ma ta gi bi a géɗ maʼa;

³³ aman Zhiklè, Zhiklè sam ndzakaɓa ka ɓai, aman Zhiklè gumai.

³⁴ A sam mpi ndohi Zhiklè tèlèba, va-gu aman ngwozi ta nzi tètè a sam mɓicè-va. Da mbeɗa a ma ɓai. Sèi ta manda gèɗ ta a hai, ara ma kita a gaɗa.

³⁵ Aman ta woya a ta shindè skwai, sèi ta jhèɗè baki ta te ngwai. Ambaɓai aman ngwoz a gèɗ ma a sam mpi ndohi Zhiklè.

³⁶ Aman ma Zhiklè a shkè te kinè ɗè? A deda sam kinè genè ɗè?

³⁷ Aman ndo ngiɗè a huro, i ndo nhadka ma, Mèzhèɓ Zhiklè te ndav ga, da suna, ma man i winda kinè, ma nkwèr Zhiklè.

³⁸ Ndo man a cèʼa azɓai, sèi kin co nenga ɓi lèmèlèmè.

³⁹ Dalahimam ga, gar haha, va-gu gazawa, aman kin hèd ma; aman kin gedassa civèɗ ngèɗè nèʼèn tsaɗ tsaɗ ɓai!

⁴⁰ Va-gu tèlèba a di na a di na, va-tül skwi staɗ staɗ tèlèba!