1 Corinthians 13 - Ma Zhiklè

Mwoy-ndo

¹ Ko man agassa i gèɗè ma ndohai, a ma golahi Zhiklè, aman mwoyndo a ndav ga azɓai, i lèmèlèmè ara züdo, ara ngurlèlèi man a slhè.

² Ko man agassa i slaha a i hodko ma, a i sun skwi man nʼngheda tèlèba, a i ngots maya tèlèba, a ncè-a-ndav tèlèba, a i slaha a i cè za a i ngeda a sam ngiɗè, aman mwoy-ndo a ndav ga azɓai, iyè skwi ambalai.

³ Ko man agassa i va ta skwi ga tèlèba a ndohi ntawassaʼa, a i kalda va ga aussa, aman mwoy-ndo a ndav ga azɓai, a takahayè azɓi genè.

⁴ Mwoy-ndo a ndav a zhèr skwia dai, a ndav amba. Mwoy-ndo a ndav a tétékè skwi azɓai. Mwoy-ndo a ndav a grè gèɗ azɓai, a fi va azɓai,

⁵ a gi skwi hori azɓai, a hér skwi na azɓai, ta slaha ta poko na gèɗ auda ɓai, a gshè ndo te ndav azɓai.

⁶ A wuffè a géɗ skwi man zura ka ɓai, azɓai; aman a wuffè a géɗ skwi nzuraʼa.

⁷ A fa na kwa a gèɗ skwi tèlèba, a cè skwi tèlè a ndav, a zhèr skwi tèlè te ndav, a zhüɓ skwi tèlèba.

⁸ Mwoy-ndo a ndav a ndivè azɓai a mèdèp, aman nhèdè ma a di a ndev na, a ngèɗè nèʼèn tsaɗ tsaɗ a ndev na, a shin skwai a ndev na.

⁹ Skwi man nga suna, skwi nkèshkata di genè, nhèdè ma, skwi nkèshkata di genè.

¹⁰ Aman skwi nʼngaʼa jèlalaʼa ma, skwi nkèshèa kala a deɓa.

¹¹ Te va man i kra dai, i gèɗ ma ara kra, maya ga ara kra, i hér skwi ara kra. Aman i gra ma, i jèkeda skwi kra.

¹² Antanta nga rka skwi ara te ndev koturmai, bizhèw-bizhèwaʼa. Te deɓaʼa nga da pi di a iyam-di iyam-dai. Antanta i sun skwi kètè genè. Te deɓaʼa i da shinè tèlè, ara man Zhiklè a senyè, kala va ga tèlè.

¹³ Anai, ncè-a-ndav, nzhèr skwi te ndav, mwoy-ndo a ndav, te makar ta nzi dai. Aman mwo-ndo a ndav a fen ta tèlèba.