1 Corinthians 11 - Ma Zhiklè

Ngwoz a nguraʼa te gi Zhiklè

¹ Va-lemda nshèffè kinè a iyè, lèmèlèmè ara iyè a Kristi!

² Sussai, sussai, aman kin héryè te skwi tèièba, a kin gia ara man i ngra kinè.

³ I senda kinè: Kristi bai a géɗ ngurhi tèièba. Nguraʼa bai a géɗ ngwoz. Bi Zhiklè bai a géɗ Kristi.

⁴ Nguraʼa staɗ staɗ tèièba man a tsi rai, man a hadka ma Zhiklè, a skwa te gèɗ, a pi hori a di na.

⁵ Ngwoz man a tsi rai, man a hadka ma Zhiklè, a skwa a te gèɗ ɓai fim-fimaʼa, a pi hori a di a Bi na; ambaɓai, lèmèlèmè ara man a sha gèɗ.

⁶ Aman a woya a mʼmènè skwa a gèɗ ɓai, dara da shoko gwots na auda. Aman ngwoz man a shi gèɗ, man a ɓècè gèɗ, ambaɓai; sèi da manda skwa a gèɗ.

⁷ Aman nguraʼa da feda skwa a gèɗ ɓai, te man nengaʼa ara mèzhèɓ nʼnjèl Zhiklè. Aman ngwoz, nengaʼa nʼnjèl nguraʼa.

⁸ Nguraʼa a mshkè te ngwoz ka ɓai. Aman ngwoz a mshkè te nguraʼa.

⁹ Nguraʼa nʼngaʼa a géɗ ngwoz ka ɓai, aman ngwoz a géɗ nguraʼa.

¹⁰ Gar haha sèi ngwoz da feda skwa a gèɗ, a sam di golahi Zhiklè.

¹¹ A civèɗ Bi Yèsu, ngwoz azɓai man nguraʼa azɓai; a nguraʼa azɓai man ngwoz azɓai.

¹² Aman lèmèlèmè ara man ngwoz a mshkè te nguraʼa, nguraʼa antanta a shkè te ngwoz. Aman skwi tèlèba a shkè te Bi Zhiklè.

¹³ Va-hur te ndav kinè a ri kinè, man ambaha ngwoz, man a tsi ri a Zhiklè, skwa a te gèɗ ɓai.

¹⁴ Ko skwi nʼngaʼa a géɗ herkeda a nsenda kinè ɓi ɗè? Ambaɓai a sam nguraʼa a gwots ndzuvaʼa te gèɗ;

¹⁵ aman gwots ndzuvaʼa ambaha ngwoz, ara nʼnjèl na. A nʼngots gwots man a nghédè gèɗ na.

¹⁶ Aman ndo a zhè te ndev kinè, man a woya a ngi gèjau a géɗèʼa, da suna, nga gi gèjau azɓai, a mpi ndohi Zhiklè lèmèlèmè.

Mɓicè va a maya man ambaɓai

¹⁷ Aman i fa kinè ma haha a gèɗ: skwi ngiɗè kin giaʼa, man i slaha a i slébèrdè kinè a vna ɓai; mɓicè va kinè a gi dara azɓai, ambaɓi holholaʼa.

¹⁸ Nshèlèkuraʼa i tsenaʼa, aman kin ɓicè va a sam mpi ndohi Zhiklè, gèɗ kinè nkezla. A i huro a vava, kin gi arsa.

¹⁹ Aman skwi man a kezla kinè gèɗ a zhè, a ndohi nzuraʼa te ndev kinè ta da ngrédè auda.

²⁰ Aman kin ɓicè va, kin ngècè ri azɓai, aman kin ndi skwi nʼndi Bi Yèsu,

²¹ te man ndo staɗ staɗ a gi gazawa a nʼndi skwi nʼndi na tsam tsam. Te deɓaʼa ngiɗè a zhè, man mi a keɗaʼa, ngiɗè a zhè, man zom a keɗaʼa.

²² Kin ngots gihi ɓi ɗè, aman kin slaha a kin ndi skwai, a kin si skwai te pa? Kin kwola mpi ndohi Zhiklè ɗè, a kin pa ta hori a di a ndohi man ta ngatsa skwa ɓi ɗè? I da gaɗa kinè ma kè? I slebarde kinè ɗè? Te skwi haha i slébèrdè kinè azɓai.

Nhinè nʼndi skwi nkezla a

²³ Aman skwi man i va kinè, i ngots te ri Bi Yèsu. A vaɗ man ta ga na ri a gèɗ, Yèsu a nco movar,

²⁴ a nshüd gèɗ, a ntsakaʼa, a ngaɗa: Na haha va ga, man i vau a géɗ kinè.

²⁵ Skwi haha va-gau, a kin héryè. Lèmèlèmè kokwi te deɓ skwi nʼndai, a ngaɗa: Na haha, kokwi nderzla nga a ma mɓuaʼa te pombaz ga. Skwi haha va-gu pèc pècèk, aman kin siaʼa, a kin héryè.

²⁶ Pèc pècèk aman kin ndi movar haha, a kin si kokwi haha, kin njè ma mʼmetsi Bi Yèsu, ha pats man a shkè a deɓa.

Nʼndi skwi nkezlaʼa a mali te ndav

²⁷ Gar haha ko wawa man a ndi movar, a si kokwi Bi Yèsu, a ndiaʼa, a siaʼa, a mali te ndav, a gi mali a vaʼa a géɗ Pombaz Bi Yèsu.

²⁸ Gar haha staɗ staɗ a ri na, da hur nshèffè na, ga a ndi movar, ga a si kokwai.

²⁹ Aman ko wawa man a ndiaʼa, a siaʼa, a ndi a si kita na a gèɗ na, a géɗ man a rka va Yèsu ara va nkezla ka ɓai.

³⁰ Gar haha ndohi kumba man wuɗi ta azɓai, ndohi matakwan kumba, ta zhè te ndev kinè, matrhiaʼa kumba ta mets ta.

³¹ Aman agassa nga wèr va nga a ri nga, ar nga ngècè kita azɓai.

³² Aman Bai Yèsu a ga nga kita, a keɗa nga gèɗa dai, a géɗ man a ɓer nga, a phomde nga a nda ndohi herkeda ngiɗè azɓai.

³³ Gar haha, dalahimam ga, aman kin ɓicè va, aman kin ndi skwai, va-zhèrda va a rai!

³⁴ Ndo man mi a keɗaʼa, da ndau skwi te ngwai, aman te deɓaʼa a sam mɓicè-va a skwi nʼndai, kita da da kala kinè a gèɗ ɓai. Skwi ngiɗè i woy a i tilèʼa, aman i do do a sam kinè.