Niikuyaa Suukuwolu 2 - Mandinka Bible

Maariyo ye jaraboo meŋ laa Yerusalaamu kaŋ

¹ Ayiwaalii! Maariyo la kamfaa kamma la, a ye tawali dibiriŋo le wanka Siyoni* moolu kunto. A ye Banisirayila darajoo jindi bankoo to le, ka bo naŋ saŋo santo. A ye Siyoni muta le ko, a siŋ looraŋo le mu nuŋ, bari saayiŋ a ye a hakiloo bo a kaŋ ne, a la kamfaa waatoo la.

² Balafaabaliyaa niŋ kasaaroo, Maariyo ye wo le laa Yaakuba siidulaalu bee kaŋ. A ye Dimmusuriŋ* Yahuuda boyinkaŋ, a ye a saatee tatariŋolu bee le teyi, a la kamfaa baa kaŋ. A ye a la mansayaa boyindi duuma, aniŋ a maralilaalu, ì niŋ maloo tuta.

³ Biriŋ ì jawoolu naata ì kele, a ye a bulubaa buloo bo a la moolu koto. A la kamfaa saŋaroo kaŋ, a ye Banisirayila binoo bee kati. A la kamfaa malata Yaakuba kaŋ ne ko dimbaa wuleŋo, a ye feŋo bee kasaara taariŋ.

⁴ Dimmusuriŋ Siyoni ko, “Yerusalaamu kono jaŋ, a ye ǹ ñaabo moolu bee le faa. A ye a la kaloo ŋaaji ǹ kamma le ko jawoo, a ye a bulubaa buloo teeka ko ǹ konnantewo. A ye a la kamfaa jindi naŋ ne, a malata ko dimbaa.”

⁵ Ee, ayiwaalii nte! Maariyo keta le ko jawoo, a ye Banisirayila kunuŋ. A ye a maralilaalu la buŋolu kasaara, a ye a tatoolu tumbuŋ. Saŋakumboo niŋ woosiyo, a ye wo le juruma Yahuuda moolu ye.

⁶ Juuraloolu niŋ Loobula Luŋolu, Yaawe* ye wolu ke ñina kuwo le ti Siyoni. A ye a Batudulaa janjaŋ ne ko naakikono jembereŋo, a ye a la juurali dulaa kasaara. A la jusukandoo kono, a ye a koo dii mansakewo la le, aniŋ piriisoolu.

⁷ Hee, Maariyo ñoorita a la sadaajanidulaa* la le, a ye a koo dii a Batudulaa Senuŋo la. A tata sansaŋolu, a ye ì duŋ jawoolu bulu. Ì wuurita Yaawe Batudulaa kono ì la ì noo kaŋ, komeŋ juurali maakaŋ baa.

⁸ Ite Yaawe le hameta ñiŋ na, ka Siyoni saatee tata sansaŋolu boyi. I ye a sumaŋ wo kamma le, i maŋ hani i buloo talaa ka a kasaara, i ye a boyinkaŋ. Hani a tatoolu niŋ a sansaŋolu bee le kumboota, ì bee koririŋo ye i laa ñoo ti.

⁹ Jee dundaŋ daa tawundaŋolu jurumita bankoo to, Yaawe ye ì nee bantambiloolu kati, ka ì janjaŋ. A mansakewo niŋ maralilaalu be mutoo kono banku koteŋolu kaŋ. Yaawe la yaamaroolu buka karandi kotenke, annabiyomoolu buka jeroo soto a bulu fanaa.

¹⁰ Kooroo keta, Siyoni saatewo alifaalu siita bankoo le to deyoo kono, ka buutoo fayi ì kuŋolu kaŋ, ì ye booto funtoolu duŋ niikuyaa kamma. Yerusalaamu sunkutoolu ñoyita, ì ye ì foŋo loo bankoo to.

¹¹ Labaŋo la, n ñaa korita kumboo la, n niyo dewunta n kono, niikuyaa faata n kono fo a ka boŋ, ì ye n na saatee moolu kasaara ñaameŋ, dindiŋolu niŋ deenaanoolu ka ketu ñaameŋ, saatewo mbeedoolu kaŋ taariŋ.

¹² Maasiiboo keta! Dindiŋolu ka a fo ì baañolu ye ko, “M̀ be muŋ ne domo la, aniŋ m̀ be muŋ ne miŋ na?” Ì ka lamfu ko kelediŋ baramariŋolu saatewo mbeedoolu kaŋ taariŋ, ì niyo be domaŋ-domaŋ bo kaŋ, ì baañolu karoo koto.

¹³ N Dimmusuriŋ Yerusalaamu, n kanuntewo, n si muŋ ne fo noo i ye, ka i la kuwo misaali? Ite Dimmusuriŋ Siyoni, n si i la kuwo niŋ muŋ ne laa ka i sabarindi? I la baramoo diinonta le ko fankaasoo, jumaa le si i jaara noo?

¹⁴ Ñiŋ loŋ ko, i la annabiyomoolu ko ì ye meŋ je, faniyaa kenseŋo niŋ neeneeri kumoolu le mu. Ì maŋ i la junuboo yita i la, ka i dandalaa, fo i kana taa mutoo kono, bari ì ye jeroo meŋ bankee i ye, faniyaa kenseŋo niŋ filindiroo le mu.

¹⁵ Ŋa a je, mennu ka tambi siloo kaŋ ka buloo kosi i ma le, ì ka ciipuroo ke ka ì kuŋo jiijaa, ka Dimmusuriŋ Yerusalaamu ñaawali ko, “Fo ñiŋ ne maŋ ke saatewo ti ì ka a fo meŋ na, a la ñiiñaa timmata, a ka bankoolu bee seewoo le?”

¹⁶ “Ŋà a kasaara le!” I jawoolu ka wo le fo. Ì bee ka ì daa loo i kaŋ. Ì ka i ciipu, ka ì ñiŋolu jaa i kaŋ, ka wuuri i ma ko, “Allaŋ, ǹ ka ñiŋ luŋo le batu nuŋ! A futata le, ŋà a je!”

¹⁷ Paree ka soŋ ñiŋ na ko, Yaawe la natoo keta i la le, a ye a la kumoo timmandi le. A ye kaŋo meŋ dii biriŋ koomanto, a ye i kasaara niŋ balafaabaliyaa le la. A ye i jawoolu sawoo londi i ma le, a ye ì binoo wulindi ka ì semboo warandi.

¹⁸ Rip, a duuta le! Moolu ka wuuri santo Maariyo ye. Hee, Siyoni tata sansaŋo, i ñaajiyo ye woyi ko baajiyo, suutoo niŋ tiloo! Kana i foño fereŋ, sako i ñaakesoo si dahaa.

¹⁹ Suutoo la, suutoo tuma-wo-tuma la, wuli, i ye kumboo santo! I sondomoo kono kuwolu yelema ko jiyo Maariyo ñaatiliŋo la. I buloolu wulindi a ye ka duwaa, i diŋolu niyo ye, mennu ka ketu konkoo la, mbeedi kuŋolu kaŋ taariŋ.

²⁰ Tiñaaroo keta! Yaawe, a juubee baŋ! I nene ye ñiŋ laa jumaa le kaŋ? Muna fo musoolu ñanta ì diŋolu domo la le baŋ, ì faŋolu ye diŋolu mennu bambaane? Muna fo ì ñanta piriisoolu faa la le baŋ, aniŋ annabiyomoolu, Maariyo la Batudulaa Senuŋo kono?

²¹ Woyi muna! Dindiŋolu niŋ keebaalu furewolu be laariŋ bankoo le to, mbeedoolu kaŋ taariŋ. N na sunkutoolu niŋ fondinkewolu, ì ye ì faa niŋ hawusaroo* la. I la kamfaa waatoo la, i ye ì faa niŋ balafaabaliyaa le la.

²² Yaawe ye n jawoolu kumandi n kaŋ karoo bee la, ko mennu ka naa feeti luŋo le to. A la kamfaa waatoo la, moo maŋ kana ka tu baluuriŋ. Ŋa diŋolu mennu yeŋyeŋ, ka ì kuluu, n jawoo naata a ye ì faa.