Jabuuroolu 66 - Mandinka Bible

Jayiroo Alla la beteyaa to Banisirayila ye

Meŋ be suukuulaa ñaatonkayaa la: Jabuura suukuwo le mu.

¹ Duniyaa moolu bee, ali seewooriŋ baa ye Alla jayi santo.

² Ali suukuwo laa ka a too senuŋo horoma, ali ye jayiroo kidimandi a ye.

³ Ali Alla jayi ka a fo a ye ko, “I ka kuwolu mennu ke, ì kaawakuuyaata le. I semboo warabaata le, a ye a tinna le i jawoolu ka kiripa i koto.

⁴ Duniyaa moolu bee ka ite le batu. Ì ka suukuwolu laa le ka i jayi, ì ka i jayi i too le la.” S

⁵ Ali naa ka a je Alla ye kuwolu mennu ke, a ye kuu baalu mennu ke hadamadiŋolu ye.

⁶ A ye baa yelemandi banku jaaroo ti le, a la moolu ye boloŋo teyi ì siŋo la. Ǹ seewoota jee le ñiŋ kamma la a ye meŋ ke.

⁷ A la sembe waroo kaŋ, ate le be tu la maraloo la fo abadaa. A ka tara bantala bankoolu* koroosi kaŋ ne, wo to balannaalu kana i loo ate fee. S

⁸ Duniyaa moo bee, ali ntolu la Alla jayi, ali a jayi fo moolu ye ali kaŋo moyi.

⁹ Ate le ye ntolu niyolu tankandi ka tara baluwo to, aduŋ a maŋ soŋ n siŋo ye bo n koto.

¹⁰ Hee Alla, i ye ntolu kotobo le, i ye ǹ ke le komeŋ kodiforoo ka yelundi ñaameŋ, ka a seneyandi.

¹¹ I ye m̀ bulandi jaloo le daa, i ye duni kuliŋo laa ǹ koolu to.

¹² I ye ǹ jawoolu niŋ ì la suwoolu bula le ka bori ǹ kuŋolu kaŋ. M̀ bulata dimbaa niŋ waamoo le kono, bari saayiŋ i ye ǹ samba naŋ dulaa neemariŋo le to.

¹³ M be jani sadaalu* le samba la naŋ i Batudulaa to. M be n na laahidoolu timmandi la i ye le.

¹⁴ Kabiriŋ m be mantooroo kono ŋa laahidoo dii i la le, aduŋ saayiŋ m be a timmandi la le.

¹⁵ M be batundoolu le bondi la i ye jani sadaalu ti: Saakotoŋolu, baakotoŋolu, ninsituuraalu, ka ì bondi i ye jani sadaalu ti, ì siisiyo ye taa i ye santo. S

¹⁶ Alitolu mennu ye Alla ñaasilaŋo soto, ali naa i lamoyi, aduŋ m be a fo la ali ye le a ye meŋ ke n ye.

¹⁷ N kumboota a ye le ka m maakoyi, ŋa a jayi suukuwolu la.

¹⁸ Niŋ ŋa n ñaa laa n na junuboolu kaŋ nuŋ, tennuŋ Maariyo te i lamoyi la n na.

¹⁹ Bari tooñaa-tooñaa, Alla ye i lamoyi n na le, aduŋ a ye n na duwaa muta le.

²⁰ Tentoo be Alla ye, kaatu a maŋ balaŋ n na duwaa muta la, waraŋ ka m bali a la kanu bambaloo la.