Jabuuroolu 26 - Mandinka Bible

Moo sootaaribaloo la duwaa

Dawuda la Jabuuroo.

¹ Hee Yaawe*, kiitiyo teyi n ye, kaatu m be baluuriŋ sootaaribaliyaa le kono, aduŋ n dankeneyaata i la le famfaŋ.

² Hee Yaawe, n kotobo, i ye n kisikisi. N sondomoo kono kusonsoŋ, aniŋ n na miiroolu,

³ kaatu n hakiloo ka tu i la kanu bambaloo kaŋ ne doroŋ. N dankeneyaata i la le, n na baluwo kono.

⁴ M buka sii neeneerilaalu kono, waraŋ ka m bula bunaafayoolu fee.

⁵ Ŋa kuu jawu kelaalu kafuñooyaa koŋ ne, aduŋ n niŋ moo kuruŋolu buka sii ñoo kaŋ.

⁶ Yaawe, ŋa m buloo kuu le ka n na sootaaribaliyaa yitandi. Niŋ m be baturoo la, n ka i la sadaajanidulaa* muruŋ-muruŋ ne,

⁷ ka tenturu suukuwo laa santo, ka i la kaawakuwolu bee seyinkaŋ.

⁸ Hee Yaawe, ŋa i taradulaa buŋo kanu le, i la semboo niŋ waroo be daameŋ to.

⁹ Kana n niŋ junubelaalu kasaara ñoo la, waraŋ ka n niŋ moofaalaalu niyo taa ñoo la.

¹⁰ Wo moolu buloo kalanta kuu jawu kewo la le, aduŋ ì ka tu dukoolu le muta la.

¹¹ Bari nte de, m be tara la baluuriŋ sootaaribaliyaa le kono. Balafaa n ye, i ye n kiisa.

¹² M be looñaa bambandiŋo le to. M be Yaawe tentu la a la moolu la beŋ baa to le.