Wungo ti azo 3 - Mbeti ti Nzapa - Tënë so amu fini

Akua nde nde ti azo ti mara ti Lévi

¹ So ayeke tënë ti sewa ti Aaron na ti Moïse na ngoi so *KOTA GBIA atene tënë na Moïse na li ti hoto ti Sinai.

² Iri ti amolenge ti Aaron ti koli ayeke so: kozo molenge ni ayeke Nadab. Na peko ti lo ayeke Abihu, Elazar na Itamar.

³ A tuku mafuta na li ti ala ti zia ala nde titene ala sara kua ti wayango-sandaga.

⁴ Me Nadab na Abihu akui na ya ti benyama ti Sinai na dawa ti KOTA GBIA, ngbanga ti so ala mu mbeni wâ nde na *sandaga na KOTA GBIA. Ala du amolenge pepe. Gi Elazar na Itamar laa angba ti sara kua ti wayango-sandaga, ala na babâ ti ala Aaron.

⁵ KOTA GBIA atene na Moïse:

⁶ “Mo tene na azo ti mara ti Lévi ti ga nduru na tere ti mo; mo zia ala na gbe ti wayango-sandaga Aaron titene ala mu maboko na lo.

⁷ Fade ala yeke sara kua ndali ti Aaron nga ndali ti bongbi ti azo ti Israel, na ya ti gbagba ti da ti bongo so KOTA GBIA na azo ti lo ayeke wara tere daa. Ala yeke sara akua nde nde ti da so a zia nde ndali ti KOTA GBIA.

⁸ Ala yeke baa lege ti akungba ti ya ti da ti bongo so KOTA GBIA na azo ti lo ayeke wara tere daa; ala yeke sara kua ndali ti azo ti Israel, ala yeke sara nga akua nde nde ti da so a zia nde ndali ti KOTA GBIA.

⁹ Fade mo yeke mu azo ti mara ti Lévi ti zia ala na gbe ti Aaron nga na gbe ti amolenge ti lo; a yeke mu ala na popo ti azo ti Israel si a yeke mu ala biani biani na Aaron nga na amolenge ti lo.

¹⁰ Mo zia Aaron na amolenge ti lo titene ala sara kua ti ala ti wayango-sandaga. Tongana mbeni zo nde aga nduru na tere ti kua ni, fade a yeke fâ lo.”

¹¹ KOTA GBIA akiri atene na Moïse:

¹² “Mbi wani laa mbi soro azo ti mara ti Lévi na popo ti azo ti Israel kue titene ala mu plase ti akozo molenge-koli, akozo molenge-koli kue so azi lege ti dungo na mama ti ala. Azo ti mara ti Lévi ayeke azo ti mbi.

¹³ Na ndembe so lani mbi sara si akozo molenge-koli ti azo ti Ezipte akui, na ndembe so laa mbi mu akozo molenge-koli ti azo ti Israel ti zia ala nde ndali ti mbi; ataa akozo molenge-koli ti zo wala ti nyama, ala yeke ti mbi. Mbi laa mbi yeke KOTA GBIA.”

Kozo dikongo wungo ti azo ti mara ti Lévi

¹⁴ *KOTA GBIA atene na Moïse na ya ti benyama ti Sinai, atene:

¹⁵ “Mo diko wungo ti azo ti mara ti Lévi na lege ti asewa ti ala oko oko nga na lege ti akete mara ti ala oko oko; diko akoli na amolenge-koli so kue ngu ti ala ato ndani na nze oko ti gue na ni.”

¹⁶ Moïse adiko wungo ti ala alingbi na yanga so KOTA GBIA amu na lo.

¹⁷ Iri ti amolenge ti Lévi ti koli ayeke so: Gershon, Kehat nga na Merari.

¹⁸ Iri ti amolenge ti Gershon na lege ti akete mara ti ala ayeke so: Libni na Shimei.

¹⁹ Amolenge ti Kehat na lege ti akete mara ti ala ayeke: Amram, Isar, Hebron nga na Uziel.

²⁰ Amolenge ti Merari na lege ti akete mara ti ala ayeke: Mali na Mushi. So ayeke akete mara ti Lévi na lege ti asewa ti ala oko oko laa.

²¹ Gershon ayeke nga kotara ti azo ti kete mara ti Libni na ti Shimei. So ayeke akete mara ti Gershon laa.

²² A diko wungo ti akoli na ti amolenge-koli ti azo ti mara ti Gershon, ti to ndani na nze oko ti gue na ni; wungo ti ala kue ayeke 7 500.

²³ Azo ti kete mara ti Gershon asara bâbâ ti ala na peko ti da so a zia nde ndali ti Nzapa, na mbage ti Do.

²⁴ Makonzi ti azo ti mara ti Gershon ayeke: Eliasaf, molenge ti Lael.

²⁵ Kua ti azo ti mara ti Gershon na ya ti da ti bongo so KOTA GBIA na azo ti lo ayeke wara tere daa ayeke so: ala yeke baa lege ti abongo ti li ti da ni, ti gigi ni, ti ya ni nga na ridoo ti yanga ti da ni.

²⁶ Ala yeke baa nga lege ti abongo na ridoo ti yanga ti gbagba ni; bongo ni angoro da ni nga na gbalaka. Ala yeke baa nga lege ti akamba so agbu li ti da ni na nduzu. Aye so kue, ala laa ayeke baa lege ni.

²⁷ Kehat ayeke kotara ti azo ti kete mara ti Amram, ti Isar, ti Hebron nga na ti Uziel. So ayeke akete mara ti Kehat laa.

²⁸ A diko wungo ti akoli na ti amolenge-koli ti azo ti mara ti Kehat, ti to ndani na nze oko ti gue na ni; wungo ti ala kue ayeke 8 600. Ala laa ayeke sara kua ti da so a zia nde ndali KOTA GBIA.

²⁹ Azo ti kete mara ti Kehat asara bâbâ ti ala na mbage ti Mbongo ti da so a zia nde ndali ti KOTA GBIA.

³⁰ Makonzi ti azo ti kete mara ti Kehat ayeke: Elisafan, molenge ti Uziel.

³¹ Kua ti ala ayeke ti batango sanduku ti *mbuki, meza, gere ti alamba, agbalaka na akungba nde nde ti sarango na kua na ya ti da so a zia nde ndali ti KOTA GBIA; ala yeke bata nga ridoo ti ya ti da ni. Aye so kue, ala laa ayeke baa lege ni.

³² Kota makonzi ti azo ti mara ti Lévi kue ayeke Elazar, molenge ti wayango-sandaga Aaron. Lo laa lo yeke baa ndo na ndö ti akoli so ayeke sara kua ti da so a zia nde ndali ti KOTA GBIA.

³³ Merari ayeke kotara ti azo ti kete mara ti Mali nga na ti Mushi. So ayeke akete mara ti Merari laa.

³⁴ A diko wungo ti ala, akoli na amolenge-koli, ti to ndani na nze oko ti gue na ni; wungo ti ala kue ayeke 6 200.

³⁵ Makonzi ti azo ti kete mara ti ala ayeke Suriel, molenge ti Abihail. Ala sara bâbâ ti ala na tere ti da so a zia nde ndali ti Nzapa, na mbage ti Banga.

³⁶ Kua ti azo ti mara ti Merari ayeke ti baa lege ti akadere ti da ni, alate ni, angbongboro wen ti da ni, agere ti da ni, na aye nde nde ti sarango na kua ti da ni. Aye so kue, ala laa ayeke baa lege ni.

³⁷ Ala yeke baa nga lege ti angbongboro wen ti gbagba ni na agere ni so a zia ni angoro tere ti gbagba ti da ni kue, na wen so ala kpo ti gbu awen ni na nduzu, na akamba ni kue.

³⁸ Moïse, Aaron na amolenge ti lo asara bâbâ ti ala na dawa ti yanga ti da ti bongo so KOTA GBIA na azo ti lo ayeke wara tere daa, na mbage ti To. Kua ti ala ayeke ti baa ndo na ndö ti da so a zia nde ndali ti KOTA GBIA, ndali ti azo ti Israel. Tongana mbeni zo nde aye fade ti ga nduru na tere ti da ni, ka a yeke fâ lo.

³⁹ Azo ti mara ti Lévi so Moïse na Aaron adiko wungo ti ala na lege ti akete mara ti ala oko oko laa; akoli na amolenge-koli, ti to ndani na nze oko ti gue na ni, alingbi na yanga so KOTA GBIA amu na ala. Wungo ti ala kue ayeke: 22 000.

Akozo molenge-koli ayeke ti KOTA GBIA

⁴⁰ *KOTA GBIA atene na Moïse: “Mo diko wungo ti akozo molenge-koli na popo ti azo ti Israel kue, ala so ngu ti ala ato ndani na nze oko ti gue na ni. Mo su iri ti ala oko oko kue na mbeti.

⁴¹ Fade mo yeke mu azo ti mara ti Lévi titene ala ga ti mbi. Mbi laa mbi yeke KOTA GBIA. Mo yeke mu azo ti mara ti Lévi na plase ti akozo molenge kue ti azo ti Israel, mo yeke mu nga anyama kue ti azo ti mara ti Lévi na plase ti akozo nyama ti azo ti Israel.”

⁴² Moïse adiko wungo ti akozo molenge ti azo ti Israel kue alingbi na yanga so KOTA GBIA amu na lo.

⁴³ Akozo molenge-koli so a diko wungo ti ala, ngu ti ala ato ndani na nze oko ti gue na ni si a su iri ti ala oko oko kue na mbeti, wungo ti ala kue ayeke: 22 273.

⁴⁴ KOTA GBIA atene na Moïse:

⁴⁵ “Mu azo ti mara ti Lévi na plase ti akozo molenge kue ti azo ti Israel; mo mu nga anyama ti azo ti mara ti Lévi na plase ti akozo nyama ti azo ti Israel; azo ti mara ti Lévi ayeke ti mbi. Mbi laa mbi yeke KOTA GBIA.

⁴⁶ Wungo ti akozo molenge ti azo ti Israel awu ahon wungo ti azo ti mara ti Lévi na azo 273.

⁴⁷ Tongaso, fade ala yeke futa le ti nginza oku ndali ti azo 273 oko na oko; ala yeke mu nginza so azo ayeke vo ka na ye na ndo so a zia nde ndali ti Nzapa ti futa na ni, nengo ti le ti nginza ni alingbi na grame baleoko.

⁴⁸ Mo yeke mu nginza ni na Aaron nga na amolenge ti lo titene ala vo na akozo molenge ti azo ti Israel so wungo ti ala ahon wungo ti azo ti mara ti Lévi so.”

⁴⁹ Moïse awara nginza ni na maboko ti akozo molenge ti azo ti Israel so wungo ti ala ahon azo ti mara ti Lévi.

⁵⁰ Lo wara nginza ni na maboko ti akozo molenge ti azo ti Israel, wungo ni ayeke ale ti nginza 1 365; ayeke ale ti nginza so azo ayeke vo ka na ye na ndo so a zia nde ndali ti Nzapa.

⁵¹ Tongaso Moïse amu nginza ni na Aaron nga na amolenge ti lo alingbi na yanga so KOTA GBIA amu na lo.