B. ti abia 6 - Mbeti ti Nzapa - Tënë so amu fini

¹ Mo wali so mo pendere mo hon awali kue so, kamba ti be ti mo ague na ndo wa? Lege wa laa kamba ti be ti mo amu? Tongaso, fade e na mo, e gue ti gi lo.

(Wali ni)

² Kamba ti be ti mbi ague na yaka ti lo, na ndo so akongo ti yombo ayeke daa. Kâ, lo yeke wara kobe ti lo ti tengo ni si lo yeke ko apendere kongo.

³ Ti mbi, mbi yeke ti kamba ti be ti mbi si kamba ti be ti mbi ayeke ti mbi. Lo yeke gue na anyama ti lo ti te pere na popo ti akongo.

Tënë na ndö ti wali ni (Koli ni)

⁴ Mo wali so mbi ye mo so, mo pendere mingi tongana gbata ti Tirsa, mo pendere tongana Jérusalem, mo so songo tongana aturugu so ayeke tiri bira.

⁵ Kiri mo baa mbi pepe, ngbanga ti so le ti mo asara si li ti mbi aga kirikiri. Kua ti li ti mo ayeke tongana gba ti angasa so alondo na ndö ti hoto ti Galaad ti zu na sese.

⁶ Pembe ti mo avuru tongana gba ti amama ti taba so alondo na ndo so a sukula ala daa ti ga. Ala kue ayeke na a-ita ti ala ti ngbo, mbeni oko na popo ti ala aduti gi lo oko pepe.

⁷ Na gbe ti mapia-bongo so mo bi na li ti mo, ngbangba ti mo akpa ndambo ti grenade.

⁸ Gbia alingbi ti duti na awali baleomene, andeko balemiombe nga na amaseka-wali gbani gbani.

⁹ Ti mbi, gi lo oko wali na ndö ti dunia so, mbipa ti mbi, wali ti mbi so ayeke nzoni kue. Gi lo oko molenge-wali so mama ti lo adu lo, molenge so mama ni aye lo mingi. Amaseka-wali abaa lo, ala tene na lo: ti mo nzoni-oo! Awali ti gbia na andeko ti gbia ayeke gonda lo:

¹⁰ “Wali wa laa ayeke sigigi na ngia tongana lâ ti ndaperere so, lo pendere tongana nze so? Wali wa laa tere ti lo ayeke za zango tongana lâ, lo so songo tongana aturugu so ayeke tiri bira so?”

¹¹ Mbi gue na yaka so a lu akeke so a yeke te ale ni, ti baa akeke so asigigi na tere ti ngu, ti baa wala afini kugbe asigigi daa awe, ti baa wala afini maboko asigigi na tere ti keke ti vinye awe, wala akeke ti grenade asara kongo awe.

¹² Mbi hinga li ti mbi daa oko pepe, be ti mbi ayeke do ndali ti lo lakue, mbi so mbi yeke molenge-wali ti sewa ti akota zo.