B. ti abia 4 - Mbeti ti Nzapa - Tënë so amu fini

(Koli ni)

¹ Mo pendere mingi, mo so mbi ye mo so, mo pendere mingi! Na gbe ti mapia-bongo so mo bi na li ti mo, le ti mo apendere tongana ambipa. Kua ti li ti mo ayeke tongana gba ti angasa so alondo na li ti hoto ti Galaad ti zu na sese.

² Pembe ti mo ayeke tongana gba ti ataba so a fâ kua ti tere ti ala, so alondo na ndo so a sukula ala daa fafadeso ti ga. Ala kue ayeke na a-ita ti ala ti ngbo. Mbeni oko na popo ti ala so ayeke na ita pepe, ayeke daa pepe.

³ Poro ti yanga ti mo ayeke tongana kamba ti bengba bongo si yanga ti mo apendere. Na gbe ti mapia-bongo so mo bi na li ti mo, ngbangba ti mo ayeke tongana ndambo ti grenade.

⁴ Go ti mo ayeke tongana da ti David so lo sara ni pendere mingi, da so a sara ni ti bata aye ti bira daa. A kanga *avala saki oko na tere ni, kue gi angbongboro vala ti angangu turugu.

⁵ Ame ti mo use ayeke tongana amolenge use ti wuga, amolenge ti dengbe so a du ala angbo, so ayeke te pere na popo ti kongo.

⁶ Kozo titene pupu ti lakui alondo, tongana gbe ti de ahon, fade mbi yeke gue na ndö ti hoto ti *mire, mbi yeke gue na ndö ti kete hoto ti dukani.

⁷ Mo pendere ahon ndoni, mo so mbi ye mo so; mbeni sioni ye oko ayeke na tere ti mo pepe.

⁸ Mo so mo yeke ga wali ti mbi so, londo na hoto ti Liban, mo ga na tere ti mbi; londo na hoto ti Liban, mo ga na tere ti mbi si! Londo na li ti ahoto ti Amana, na li ti hoto ti Senir nga na ti Hermon, mo zu hio si! Mo zia du ti abamara, mo zia li ti ahoto ti ze so, mo hon.

⁹ Mo sara si be ti mbi afâ, ndali ti mo ita ti mbi ti wali, mo so mo yeke ga wali ti mbi so. Mo sara si be ti mbi afâ, gi na lege so mo bi le ti mo ti baa mbi, gi na lege ti lenge oko ti go ti mo.

¹⁰ Ita ti mbi ti wali, mo so mo yeke ga wali ti mbi so, yengo so mo ye na mbi ayeke nzoni mingi, yengo so mo ye na mbi ayeke nzoni ahon vin. Fungo ti yombo ti mo afun nzoni ahon fungo ti ayombo kue.

¹¹ Mo so mo yeke ga wali ti mbi so, tongana mbi su yanga ti mo, mo baa mo tene mafuta ti wotoro ayeke daa, mafuta ti wotoro na ngu ti me ayeke na gbe ti menga ti mo. Fungo ti abongo ti mo ayeke nzoni tongana fungo ti gbako ti Liban.

¹² Ita ti mbi ti wali, mo so mo yeke ga wali ti mbi so, mo yeke yaka ti mbi wani, mo yeke li ti ngu ti mbi, mo yeke ndo so ngu ayeke sigigi daa, so a bata ndali ti mbi.

¹³ Mo yeke tongana yaka ti *paradi so ade pendere mingi. Anzoni lengo ti keke ayeke daa; akongo so afun nzoni mingi nga na yombo ti nare;

¹⁴ yombo ti nare, safran na kanele, akeke nde nde so a sara ka na dukani; mire na aloes, nga na ayombo kue ti nzoni ni.

¹⁵ Biani, mo yeke li ti ngu ti ayaka, mo yeke du ti ngu so ayeke sua, alondo na Liban si ayeke sua.

(Wali ni)

¹⁶ Mo pupu ti Banga, mo londo! Mo pupu ti Mbongo, mo ga hio si! Ala ya na ndö ti yaka ti mbi si fion ti yaka ni afun amu ndo kue. Mo kamba ti be ti mbi, ga, mo li na ya ti yaka ti mo, mo te anzoni lengo ti yaka ni.