B. ti abia 1 - Mbeti ti Nzapa - Tënë so amu fini

¹ Bia so apendere ahon abia kue. Bia ti Salomon.

Lisoro na popo ti koli na wali so aye tere (Wali ni)

² Su yanga ti mbi, su yanga ti mbi ma! Yengo so mo ye na mbi anzere ahon vin,

³ afun pendere ahon ayombo ti mo. Iri ti mo ayeke yombo so afun amu ndo kue, ndani laa amaseka-wali aye mo mingi so.

⁴ Gbu maboko ti mbi, e kpe loro. Gbia ti mbi, gue na mbi na ya ti kubu ti mo, e sara si tere ti e anzere, e sara si e duti na ngia ndali ti mo. Ngia so mo sara na tere ti mbi so, e gonda ni ahon vin. Taa-tënë, amaseka-wali aye mo na legeni.

⁵ Amaseka-wali ti Jérusalem, Mbi vuko vukongo, me mbi yeke pendere tongana ada ti azo ti Kedar ti bongo, tongana aridoo ti da ti Salomon.

⁶ Poro ti tere ti mbi so avuko vukongo so, ala zia be ti ala daa pepe: lâ laa avuko tere ti mbi ni. A-ita ti mbi ti koli asara ngonzo na tere ti mbi, ala gbu mbi na ngangu ti bata ayaka ti vinye. Me yaka ti vinye ti mbi wani, mbi wara lege ti batango ni pepe.

⁷ Mo so mbi ye mo so, fa na mbi ndo so mo yeke gue na anyama ti mo daa titene ala wu tere na bekombite. Tongaso si mbi tambula kirikiri pepe na tere ti anyama ti amba ti mo.

(Awabatango-taba)

⁸ Mo so mo yeke pendere mo hon awali kue so, tongana mo hinga pepe, mo mu peko ti gere ti ataba, mo fa lege na akete nyama ti mo, ngbii asi na tere ti agbefa ti awabatango-taba.

(Koli ni)

⁹ Mo kamba ti be ti mbi, mbi baa mo tongana pendere mbarata so ayeke kpe na pusu ti gbia ti Ezipte.

¹⁰ So pendere ngbangba laa mo yeke na ni na popo ti aye ti mê so! So pendere go laa mo yeke na ni na popo ti aye ti go so!

(Awabatango-taba)

¹¹ E yeke mu lôro ti sara na aye ti mê na mo, e yeke kpo anzoroko ti wen ti nginza na tere ni.

(Wali ni)

¹² Na ngoi so kue gbia ti mbi ayeke duti ti te ye ti lo, fion ti yombo ti *nare ti mbi ayeke fun, amu ndo kue.

¹³ Kamba ti be ti mbi ayeke tongana kete kete bozo ti yombo ti *mire so ayeke lango na kate ti mbi.

¹⁴ Kamba ti be ti mbi ayeke tongana kongo so afun nzoni na yaka ti En-Gedi.

(Koli ni)

¹⁵ Mo pendere mingi, mo so mbi ye mo so, mo pendere mingi! Le ti mo apendere tongana ambipa.

(Wali ni)

¹⁶ Kamba ti be ti mbi, mo pendere mingi, mo pendere ahon ndoni! Fini pere laa ayeke gbogbo ti e.

¹⁷ Akeke ti sedre ayeke tongana da ti e, akeke ti sipre ayeke tongana dere ti da ti e.