Awayango-sandaga 27 - Mbeti ti Nzapa - Tënë so amu fini

Ambeni ndia: ngere ti aye so zo amu zendo ti mungo ni na Nzapa

¹ KOTA GBIA atene na Moïse:

² Tene na azo ti Israel, mo tene: “Tongana mbeni zo amu zendo ti mu mbeni zo na KOTA GBIA, lo lingbi ti mu nginza so alingbi na ngere ti zo ndali ti zendo so lo mu.

³ Ngere ti azo ni ayeke tongaso: “Ti koli ti ngu baleuse asi na ngu baleomene: ngere ti lo ayeke ale ti nginza baleoku, alingbi na wungo ti nginza so a yeke vo ka na ye na ndo so a zia nde ndali ti Nzapa;

⁴ ti wali: ngere ti lo ayeke ale ti nginza baleota.

⁵ “Ti maseka ti ngu oku asi na ngu baleuse: ti maseka-koli, ngere ti lo ayeke ale ti nginza baleuse; ti maseka-wali, ngere ti lo ayeke ale ti nginza baleoko.

⁶ “Ti molenge ti nze oko asi na ngu oku: ti molenge-koli, ngere ti lo ayeke ale ti nginza oku; ti molenge-wali, ngere ti lo ayeke ale ti nginza ota.

⁷ “Ti zo ti ngu baleomene wala ahon so: ti koli, ngere ti lo ayeke ale ti nginza baleoko na oku; ti wali, ngere ti lo ayeke ale ti nginza baleoko.

⁸ “Tongana zo ni ayeke wayere ahon ndoni si lo yeke na ngangu ti futa angere so pepe, zo so lo mu zendo ti mu lo na Nzapa so, lo yeke ga na zo ni na dawa ti wayango-sandaga. Wayango-sandaga ayeke fa ngere ti zo ni alingbi na ngangu ti zo so amu zendo so.

⁹ “Tongana zo ni amu zendo ti mu nyama na *sandaga na KOTA GBIA, nyama so zo ni amu na KOTA GBIA aga ye so a zia nde ndali ti lo awe.

¹⁰ Alingbi zo asanze nyama ni na mbeni nyama nde pepe, ataa nyama ni ayeke nzoni, wala ayeke sioni. Me tongana zo asanze nyama ni, anyama ni use kue ayeke ga aye so a zia nde ndali ti KOTA GBIA.

¹¹ “Tongana zo ni amu zendo ti mu nyama so ayeke *sioni, nyama so zo alingbi ti mu na sandaga na KOTA GBIA pepe, fade zo ni ayeke ga na nyama ni na dawa ti wayango-sandaga.

¹² Wayango-sandaga ayeke baa nyama ni, ayeke nzoni wala ayeke sioni si lo yeke fa ngere ni alingbi na ni. Zo kue ayeke luti gi na ndö ti ngere so wayango-sandaga afa.

¹³ Tongana wa ti nyama ni aye ti kiri ti vo nyama ni, fade lo yeke kangbi ya ti ngere ni oku, lo mu oko na popo ni si lo zia na ndö ti ngere so wayango-sandaga afa so.

¹⁴ “Tongana mbeni zo azia da ti lo nde ndali KOTA GBIA, fade wayango-sandaga ayeke baa da ni, ayeke nzoni wala ayeke sioni si lo yeke fa ngere ni alingbi na ni. Zo kue ayeke luti gi na ndö ti ngere so wayango-sandaga afa.

¹⁵ Tongana wa ti da ni aye ti kiri ti vo da ni, fade lo yeke kangbi ya ti ngere ni oku, lo mu oko na popo ni si lo zia na ndö ti ngere so wayango-sandaga afa so.

¹⁶ “Tongana mbeni zo azia nde mbeni yaka ti lo oko ndali ti KOTA GBIA, fade a yeke fa ngere ni alingbi na nengo ti ale ti kobe so alingbi ti lu na le ti yaka ni: ale ti nginza baleoku ndali ti kilo ti orze ngbangbo ota.

¹⁷ Tongana zo azia yaka ti lo nde ndali ti KOTA GBIA na ngu ti kiringo na nengo ti azo ti Israel, zo kue ayeke luti gi na ndö ti ngere ni so.

¹⁸ Tongana zo ni azia yaka ti lo nde na peko ti ngu ti kiringo na nengo ti azo ti Israel, wayango-sandaga ayeke fa ngere ni alingbi na ngu so angba ngbii ti si na ngu ti kiringo na nengo ti ala; fade lo yeke kiri na ngere ni na gbeni.

¹⁹ “Tongana wa ti yaka ni aye ti kiri ti vo ni, fade lo yeke kangbi ya ti ngere ni oku, lo mu oko na popo ni si lo zia na ndö ti ngere so wayango-sandaga afa. Na pekoni, yaka ni ayeke ga ti lo.

²⁰ “Tongana lo kiri lo vo yaka ni pepe si lo ka ni na mbeni zo, lege titene lo kiri lo vo ni ayeke daa pepe.

²¹ Na ngu ti kiringo na nengo ti azo ti Israel, fade a yeke zia yaka ni nde ndali ti KOTA GBIA si ayeke ga ti awayango-sandaga; ayeke ga tongana yaka so a zia nde ndali ti KOTA GBIA biani biani.

²² “Mbeni zo alingbi ti zia nde mbeni yaka ndali ti KOTA GBIA; lo vo yaka ni vongo, me lo wara ni na peko ti kua ti babâ ti lo pepe.

²³ Wayango-sandaga ayeke fa ngere ni alingbi na ngu so angba ngbii ti si na ngu ti kiringo na nengo ti azo ti Israel. Wa ti yaka ni ayeke futa nginza so a fa so gi na oko lango ni. Fade a yeke zia nginza ni nde ndali ti KOTA GBIA.

²⁴ Na ngu ti kiringo na nengo ti azo ti Israel, yaka ni ayeke kiri ti ga ti zo so avo ni lani so, so ti tene, ti zo so awara ni na peko ti kuâ ti babâ ti lo so.

²⁵ “Fade a yeke fa ngere ti aye so kue zo amu zendo ti mu na KOTA GBIA alingbi na nginza so a yeke vo ka na ye na ndo so a zia nde ndali ti Nzapa: nengo ti le ti nginza ni ayeke grame baleoko.”

Asandaga nde nde

²⁶ “Akozo molenge ti koli so kue nyama adu, zo alingbi ti zia ni nde ndali ti KOTA GBIA pepe. Biani, kozo molenge ti bagara, ti taba wala ti ngasa aga ye ti KOTA GBIA awe.

²⁷ Tongana nyama ni ayeke *sioni si lo du kozo molenge ti lo, wa ti lo alingbi ti kiri ti vo lo. Lo yeke kangbi ya ti ngere ti nyama ni oku, lo mu oko na popo ni si lo zia na ndö ti ngere so wayango-sandaga afa. Tongana wa ti nyama ni akiri avo lo pepe, wayango-sandaga alingbi ti ka nyama ni na mbeni zo nde alingbi na ngere so lo fa.

²⁸ “Na ndoni, ye so kue zo ayeke na ni: zo, wala nyama, wala yaka so lo wara na peko ti kuâ ti babâ ti lo si lo zia ni nde ndali ti KOTA GBIA biani biani, lo lingbi ti ka ni wala ti kiri ti vo ni pepe. Ye so kue zo azia nde ndali ti KOTA GBIA biani biani, aga ye so ayeke nde si ayeke nzoni kue ahon atanga ni ndali ti KOTA GBIA.

²⁹ Ataa zo laa a zia lo nde ndali ti KOTA GBIA biani biani, zo alingbi ti kiri ti vo lo pepe: fade a yeke fâ lo.

³⁰ “Aye so kue zo amu na *dime: ale ti kobe ti yaka, wala ale ti keke ayeke ti KOTA GBIA: ayeke ye so ayeke nde si ayeke nzoni kue ndali ti KOTA GBIA.

³¹ Tongana mbeni zo aye ti kiri ti vo ye so lo mu na dime, fade lo yeke kangbi ya ti ngere ni oku, lo mu oko na popo ni, lo zia na ndö ti ngere ni si lo mu na wayango-sandaga.

³² Âdu ti abagara, ataba na angasa, fade a yeke zia nzoroko na tere ti nyama oko na popo ti anyama baleoko si a yeke zia oko ni nde ndali ti KOTA GBIA.

³³ Alingbi wa ti anyama ni asoro popo ti ala sorongo pepe ti gi ala so ayeke nzoni wala ala so ayeke sioni. Tongana lo sanze mbeni nyama ni, anyama ni use kue, a yeke zia ala nde ndali ti KOTA GBIA: lo lingbi ti kiri ti vo ala pepe.”

³⁴ So ayeke atënë ti ndia so KOTA GBIA amu na Moïse ndali ti azo ti Israel na li ti hoto ti Sinai laa.