Awayango-sandaga 20 - Mbeti ti Nzapa - Tënë so amu fini

Ambeni lege ti vorongo nzapa so ndia ake ni

¹ *KOTA GBIA atene na Moïse:

² Fade mo yeke tene na azo ti Israel, mo tene: “Tongana mbeni zo ti Israel wala mbeni wande so aduti na Israel amu mbeni molenge ti lo oko na *sandaga na nzapa Molek, alingbi a fâ lo. Fade azo ti kodro ayeke bo lo na têne ti fâ lo.

³ Ti mbi, fade mbi yeke ga na tere ti zo ni so. Mbi yeke tumba lo na popo ti azo ti Israel, ngbanga ti so lo mu mbeni molenge ti lo oko na sandaga na Molek. Sarango mara ti ye tongaso asara si ndo so a zia nde ndali ti mbi aga *sioni si iri ti mbi so ayeke nde si ayeke nzoni kue aga nga sioni.

⁴ Tongana azo ti kodro akanga le na ndö ti sarango ye ti zo ni so si ala fâ lo pepe,

⁵ fade mbi wani, mbi yeke ga na tere ti zo ni nga na tere ti azo ti sewa ti lo. Lo na azo so kue amu peko ti lo ti voro Molek, mbi yeke tumba ala na popo ti azo ti Israel.

⁶ “Zo so agi lege ti hunda yingo ti akuâ, so ayeke tongana vorongo anzapa nde, fade mbi yeke ga na tere ti lo si mbi yeke tumba lo na popo ti azo ti Israel.

⁷ “Ala sara ye tongana azo so ayeke nde si ayeke nzoni kue, ngbanga ti so mbi laa mbi yeke KOTA GBIA, Nzapa ti ala.”

Ambeni lege ti dutingo ti koli na wali so ndia ake ni

⁸ “Ala bata andia ti mbi, ala sara ye alingbi na ni. Mbi laa mbi yeke KOTA GBIA so mbi yeke sara titene ala duti nde si ala duti nzoni kue.

⁹ “Tongana mbeni zo adeba babâ ti lo wala mama ti lo, alingbi a fâ lo. Ngbanga ti mene ti lo akiri na li ti lo wani, ngbanga ti so lo deba babâ ti lo na mama ti lo.

¹⁰ “Tongana mbeni koli agi wali ti mba ti lo, alingbi a fâ ala use kue, koli ni na wali ni.

¹¹ “Tongana mbeni koli alango na wali ti babâ ti lo, andaa lo zia kamene na le ti babâ ti lo awe. Fade a yeke fâ ala use kue, koli ni na wali ni; ngbanga ti mene ti ala ayeke kiri na li ti ala wani.

¹² “Tongana mbeni koli alango na wali ti molenge ti lo, fade a yeke fâ ala use kue, koli ni na wali ni. Ye so ala sara so ayeke sioni mingi; ngbanga ti mene ti ala ayeke kiri na li ti ala wani.

¹³ “Tongana mbeni koli alango na mba ti lo koli tongana ti so koli ayeke lango na wali, ye so ala use kue asara so ayeke sioni mingi. Fade a yeke fâ ala; ngbanga ti mene ti ala ayeke kiri na li ti ala wani.

¹⁴ “Tongana mbeni koli amu wali si lo kiri lo mu mama ti wali ni titene ala ga awali ti lo, so sarango ye ti kamene mingi laa. Fade a yeke gbi koli ni na awali use so kue na wâ; tongaso si sarango ye ti kamene aduti na popo ti ala pepe.

¹⁵ “Tongana mbeni koli abongbi na mbeni nyama, alingbi a fâ koli ni nga na nyama ni.

¹⁶ “Tongana mbeni wali abongbi na mbeni nyama, alingbi a fâ wali ni nga na nyama ni. Ngbanga ti mene ti ala ayeke kiri na li ti ala wani.

¹⁷ “Tongana mbeni koli amu ita ti lo ti wali so babâ ti lo adu, wala ita ti lo ti wali so mama ti lo adu ti ga wali ti lo si lo lango na lo, so sarango ye ti kamene laa. Fade a yeke tumba ala na le ti azo ti Israel kue. Ndali ti so koli ni alango na ita ti lo ti wali, sioni ti lo ayeke kiri na li ti lo wani.

¹⁸ “Tongana mbeni wali abaa ya ti lo si mbeni koli alango na lo, fade a yeke tumba ala use kue na popo ti azo ti Israel. Biani, ala use asigigi na nda ti mene ti wali ni awe.

¹⁹ “Alingbi ala lango na mama-kota, wala mama-kete wala omba ti ala pepe. Tongana mbeni koli alango na mbeni zo ti ya ti sewa ti lo, fade ngbanga ti sioni ti ala use kue ayeke kiri na li ti ala.

²⁰ “Tongana mbeni koli alango na omba ti lo, andaa lo zia kamene na le ti babâ-kota wala babâ-kete ti lo awe. Fade ngbanga ti siokpari ti ala ayeke kiri na li ti ala use kue, ala yeke du amolenge pepe ngbii ala kui.

²¹ “Tongana mbeni koli amu wali ti ita ti lo ti ga wali ti lo, so sarango ye ti zende laa. Lo zia kamene na le ti ita ti lo awe, lo na wali ni ayeke du molenge pepe.

²² “Ala bata andia ti mbi kue na atënë ti ndia ti mbi kue. Ala sara ye alingbi na ni, tongaso si kodro so mbi yeke gue na ala titene ala duti daa, kodro ni atumba ala pepe.

²³ Amara so mbi tumba ala na dawa ti ala, azo ti Israel so, alingbi ala mu peko ti sarango ye ti amara ni so pepe. Ndali ti so amara ni asara ando asioni ye so kue laa be ti mbi ake ala.

²⁴ Mbi tene lani na ala azo ti Israel, mbi tene: ‘Ala laa ayeke mu ande sese ti amara ni titene aga ti ala. Mbi laa mbi yeke mu sese ni na ala titene aga ti ala: *sese so ngu ti me ti bagara na mafuta ti wotoro asi singo daa!’ Mbi laa mbi yeke KOTA GBIA, Nzapa ti ala so mbi zia ala nde na popo ti amara nde.

²⁵ Ndani laa, alingbi ala kangbi popo ti anyama so ayeke *nzoni na anyama so ayeke *sioni, andeke so ayeke *nzoni na andeke so ayeke *sioni. Alingbi ala ga sioni pepe na lege ti ndungo aye so ayeke *sioni: anyama, andeke wala akete nyama so ayeke hara harango na sese. Mbi sara kangbi so titene ala hinga anyama so ayeke *sioni.

²⁶ “Ayeke nzoni ala duti nde, ala duti nzoni kue ndali ti mbi, ngbanga ti so mbi KOTA GBIA, mbi yeke nde si mbi yeke nzoni kue. Mbi zia ala nde na popo ti amara nde titene ala ga azo ti mbi.

²⁷ “Tongana mbeni koli wala mbeni wali ayeke hunda yingo ti akuâ, fade a yeke fâ ala: a yeke bo ala na têne si ala kui. Ngbanga ti mene ti ala ayeke kiri na li ti ala wani.”