Awayango-sandaga 11 - Mbeti ti Nzapa - Tënë so amu fini

YE SO AYEKE * NZONI NA YE SO AYEKE SIONI 11–16 Anyama so ayeke nzoni na anyama so ayeke sioni

¹ KOTA GBIA atene na Moïse na Aaron

² ti tene na azo ti Israel, atene: “Na popo ti anyama so kue ayeke na ndö ti sese so, anyama so ala lingbi ti te ni ayeke so:

³ ala so ya ti sokoto ti ala akangbi use si ala kiri ayeke te ya ti kobe so ala te kozoni awe.

⁴ Me na popo ti anyama so kue ya ti sokoto ti ala akangbi use na ala so akiri ayeke te ya ti kobe so ala te kozoni awe so, ambeni ayeke daa so ala lingbi ti te ala pepe; ayeke anyama tongana: – *zambala, lo kiri lo yeke te ya ti kobe so lo te kozoni awe, me ya ti sokoto ti lo akangbi use pepe. Fade ala yeke baa lo tongana nyama so ayeke *sioni.

⁵ – Leli, lo kiri lo yeke te ya ti kobe so lo te kozoni awe, me ya ti sokoto ti lo akangbi use pepe. Fade ala yeke baa lo tongana nyama so ayeke *sioni.

⁶ – Ndaramba, lo kiri lo yeke te ya ti kobe so lo te kozoni awe, me ya ti sokoto ti lo akangbi use pepe. Fade ala yeke baa lo tongana nyama so ayeke *sioni.

⁷ – Nguru, ya ti sokoto ti lo akangbi use, me kobe so lo te kozoni awe, lo kiri lo yeke te ya ni pepe. Fade ala yeke baa lo tongana nyama so ayeke *sioni.

⁸ Alingbi ala te kasa ti anyama ni so pepe, ala ndu nga kuâ ti ala pepe. Fade ala yeke baa ala tongana anyama so ayeke *sioni.

⁹ “Na popo ti anyama so kue ayeke na ya ti ngu, na ya ti kota ngu-ingo wala na ya ti bale, ala so ala lingbi ti te ala ayeke so maboko ti ala ti susu na *hali ti ala ayeke daa.

¹⁰ Me ala so kue ayeke na maboko pepe, wala ala so ayeke na hali pepe, ataa akete nyama so ayeke na ya ti ngu, wala ala so ayeke na ya ti kota ngu-ingo, wala na ya ti bale, alingbi ala te ala pepe,

¹¹ ala baa anyama ni so tongana ye ti sioni mingi. Ala te kasa ti ala pepe, ala baa kuâ ti ala tongana ye ti sioni mingi.

¹² Anyama so kue ayeke na ya ti ngu si amaboko ti ala ti susu na hali ti ala ayeke daa pepe, ala baa ala tongana mbeni ye ti sioni mingi.

¹³ “Na popo ti andeke, ala so ala lingbi ti baa ala tongana ye ti sioni mingi si ala lingbi nga ti te ala pepe ayeke so: *ngoalo, zipaete na ngoalo ti ngu,

¹⁴ milan nga na mara ti akota ndeke nde nde,

¹⁵ na mara ti *akpakpo nde nde,

¹⁶ *naamo, shuete, muete, na mara ti andeke nde nde ti gbungo kondo,

¹⁷ ndeke ti bi, kormoran, hilote,

¹⁸ efre, kete shuete, ndeke so ayeke te akuâ,

¹⁹ sigonye, na mara ti aheron nde nde, hipe nga na nyama ti ngia.

²⁰ “Akete nyama so kue kpangi ti ala ayeke daa si ala yeke na gere osio, ala baa ala tongana ye ti sioni mingi.

²¹ Me na popo ti akete nyama ni so, ambeni ayeke na gere ti hurungo na ni na ndö ti sese; ala so ala lingbi ti te ni senge;

²² ayeke akete nyama tongana: mara ti angadi na agbadola nde nde.

²³ Ti tanga ti akete nyama so kue kpangi ti ala ayeke daa si ala yeke na gere osio, ala baa ala tongana ye ti sioni mingi.”

Aye so zo andu si lo ga sioni

²⁴ “Anyama so ayeke sara si ala ga *sioni: zo so andu kuâ ti ala, lo yeke ngba *sioni ngbii asi na lakui.

²⁵ Zo so ayo kuâ ti ala, alingbi lo sukula bongo ti lo; lo yeke ngba *sioni ngbii asi na lakui.

²⁶ Anyama so kue ya ti sokoto ti ala akangbi use pepe, wala ala kiri ayeke te ya ti kobe so ala te kozoni awe pepe, ala baa ala tongana anyama so ayeke *sioni. Zo so andu ala, lo yeke ga *sioni.

²⁷ Anyama so kue ayeke na gere osio si ala yeke na sokoto pepe, ala baa ala tongana anyama so ayeke *sioni. Zo so andu kuâ ti ala, lo yeke ngba *sioni ngbii asi na lakui.

²⁸ Zo so ayo kuâ ti ala, alingbi lo sukula bongo ti lo; lo yeke ngba *sioni ngbii asi na lakui. Ala yeke baa anyama ni so tongana anyama so ayeke *sioni.

²⁹ “Na popo ti akete nyama so ayeke gbani na ndö ti sese, ala so ala lingbi ti baa ala tongana *sioni ayeke so: tope, deku nga na mara ti akota kada nde nde,

³⁰ kete kada, kada ti gbako, kada ti ngu, nzanga nga na kolingo.

³¹ Na popo ti akete nyama kue, ala baa ala ni so tongana anyama so ayeke *sioni. Zo so andu anyama ni tongana ala kui, lo yeke ngba *sioni ngbii asi na lakui.

³² Tongana mbeni kete nyama ni so akui si ati na ndö ti mbeni ye, ye ni ayeke ga *sioni; ataa sembe so a sara na keke, ataa bongo, ataa poro wala sake, ataa sembe so kue a yeke sara na kua, fade a yeke sukula ye ni; ye ni ayeke ngba *sioni ngbii asi na lakui. Na pekoni, ye ni ayeke kiri ti ga *nzoni.

³³ Tongana kuâ ti mbeni nyama ni ati na ya ti ta ti sese, ye so kue ayeke na ya ti ta ni ayeke ga *sioni. Alingbi ala fâ ya ti ta ni.

³⁴ Tongana a tuku ngu ti ya ti ta so na ndö ti mbeni kobe ti tengo ni, kobe ni ayeke ga *sioni. Tongana a tuku ngu ni na ndö ti mbeni ye ti nyongo ni, ataa ta ni ayeke tongana nyen, fade ye ti nyongo ni so ayeke ga *sioni.

³⁵ Tongana kuâ ti mbeni kete nyama ni so ati na ndö ti mbeni ye, ye ni so ayeke ga *sioni. Tongana ye ni ayeke fur, wala duke, alingbi ala kungbi ni, ngbanga ti so aga *sioni awe; ala baa ni tongana *sioni.

³⁶ Me tongana kuâ ti nyama ni ati na ya ti li ti ngu nga na ya ti du ti ngu, ngu ni ayeke ngba *nzoni. Me zo so ayeke zi kuâ ti nyama ni ti sigigi na ni, lo yeke ga *sioni.

³⁷ Tongana kuâ ti mbeni nyama ni ati na ndö ti ale ti kobe ti lungo ni, ale ti kobe ni ayeke ngba *nzoni.

³⁸ Me tongana a zia ngu na ndö ti ale ti kobe ni awe si kuâ ti mbeni nyama ni ati na ndö ni, fade ala yeke baa ale ti kobe ni tongana ye so ayeke *sioni.

³⁹ “Tongana mbeni nyama so ala lingbi ti te ni akui, zo so andu kuâ ni, lo yeke ngba *sioni ngbii asi na lakui.

⁴⁰ Zo so ate kuâ ti nyama ni so, alingbi lo sukula abongo ti lo; lo yeke ngba *sioni ngbii asi na lakui. Zo so ayo kuâ ti nyama ni so, alingbi lo sukula abongo ti lo; lo yeke ngba *sioni ngbii asi na lakui.

⁴¹ “Akete nyama so kue ayeke gbani na ndö ti sese, alingbi ala baa ala tongana ye ti sioni mingi; ala te ala pepe.

⁴² Akete nyama so kue ayeke gbani na ndö ti sese, alingbi ala te ala pepe; ataa ala so ayeke hara harango, ataa ala so ayeke tambula na ndö ti gere osio, wala gere ti ala ahon osio, ala baa ala tongana ye ti sioni mingi.

⁴³ Ala ga *sioni na lege ti ndungo akete nyama ni so pepe; ala zia akete nyama ni so andu tere ti ala pepe si ala ga *sioni pepe; tongaso pepe, fade ala yeke ga *sioni ndali ti ala.

⁴⁴ Mbi laa mbi yeke KOTA GBIA Nzapa ti ala: alingbi ala sara ye tongana azo so ayeke nde si ayeke nzoni kue, ngbanga ti so mbi yeke nde si mbi yeke nzoni kue. Akete nyama so ayeke gbani na ndö ti sese, alingbi ala ga *sioni ndali ti ala pepe.

⁴⁵ Biani, mbi KOTA GBIA laa, mbi sara si ala sigigi na kodro ti Ezipte titene mbi duti Nzapa ti ala. Tongaso, ayeke nzoni ala duti azo so ayeke nde si ayeke nzoni kue, ngbanga ti so mbi yeke nde si mbi yeke nzoni kue.”

⁴⁶ So ayeke ndia ndali ti anyama, andeke, anyama so ayeke na ya ti ngu nga na akete nyama so ayeke gbani na ndö ti sese laa.

⁴⁷ Ndia so ayeke mu lege na zo ti hinga anyama so ayeke *nzoni na ala so ayeke *sioni; ala so zo alingbi ti te ala na ala so zo alingbi ti te ala pepe.